Fianara 10

Fomba Hala-Ndranahare

Manao akore ty toko’e hihevera’ao raha volàni-Ndranahare fa raty reo? (1)

Karàza fiaràha amin’olo ino iaby ro raty? (2)

Akore ro toko’e hihevera’ty Kristiana ty hoe mavandy? (3) ty miloka? (3) ty mangalatse? (3) ty hasatà? (4) ty fisà aòly? (5) ty hamamòa? (6)

Akore ro ialà ami’ty fomba raty? (7)

1. Tea’ty mpanompo-Ndranahare ty raha soa. Fe, toko’e hianatse halày raha raty kea rozy. (Salamo 97:10) Midika zay fa isitàha’e lavitse fomba hala-Ndranahare reo. Ino iaby raha rezay?

2. Fijangajangà: Ty fandrea amin’olo aloha’ty fanambalìa, ty fandrantòva, ty fandrea ami’y biby, ty fandrea amin’olo faly, voho ty fandrea’ty samby lahilahy ndra ty samby ampela, le fahotà bevata ami-Ndranahare iaby. (Levitikosy 18:6; Romanina 1:26, 27; 1 Korintianina 6:9, 10) Laha fa misy olo roa, tsy mpivaly vita soratse fe miharo trano, le toko’e hisarake tseky roze, na hisoratsy ami’y fanjakà.—Hebreo 13:4.

3. Mavandy, miloka, mangalatse: Tsy mahay mavande Andranahare. (Titosy 1:2) Toko’e tsy havande ze ta ho tea’e. (Ohabolana 6:16-19; Kolosianina 3:9, 10) Misy fitiavan-drala laha fa mety ho filokà. Ka tsy miloka mihitsy ty Kristiana, ndra lôtery io, ndra filokà ami’ty filaìsan-tsôvaly, ndra lôtô, ndre ino ndre ino. (Efesianina 5:3-5) Tsy mangalatsy kea ty Kristiana. Tsy mivìly raha hai’e fa halatsy roze, na mangalake raha tsy nierà.—Eksodosy 20:15; Efesianina 4:28.

4. Meloke maré, satà: Mety ho satà raty ty olo tsy mahay meloky. (Genesisy 4:5-8) Tsy ho nama-Ndranahare mihitsy ty olo satà. (Salamo 11:5; Ohabolana 22:24, 25) Raty ty mikinìa ndra mamaly ty raty natao’ty hafa tamintsika.—Ohabolana 24:29; Romanina 12:17-21.

5. Vorike noho fisà aòly: Misy mikaike angatse, soa hahazo hery hitahà arete. Misy kea mamorike ty rafi’e soa hamparare aze, ndra hahafate aze mihitsy aza. Satana ro hery ambaliky raha iaby rezay. Ka tsy toko’e hanao raha rezay ty Kristiana. (Deoteronomia 18:9-13) Ty fitoera’ao ho anila’i Jehovah ro fiaròva soa bibike, ami’ty toky raty mety hatao’ty hafa anao.—Ohabolana 18:10.

6. Hamamòa: Tsy raty ty mino divay kelikele, ndra labiera, ndra toake hafa. (Salamo 104:15; 1 Timoty 5:23) Fe, hala-Ndranahare ty olo miboboke toake noho mamo lava. (1 Korintianina 5:11-13; 1 Timoty 3:8) Mety hanimba ty fahasalama’ao noho handrava ty fanambalia’ao ty finòman-toake maro maré, sady ho mora voa’ty fakam-panahy hafa kea iha, ami’zay.—Ohabolana 23:20, 21, 29-35.

7. “Tsy handova ty fanjakà’Andranahare” ze zatsy manao raha volàni-Ndranahare fa raty. (Galatianina 5:19-21) Laha tea’ao vata’e Andranahare ka ta hampifale aze iha, le toko’e hialà’ao fomba raty rezay. (1 Jaona 5:3) Mianara malày ze raha volàni-Ndranahare fa raty. (Romanina 12:9) Miaràha amin’olo mana fahazàra soa. (Ohabolana 13:20) Afake manampe anao ty Kristiana matanjake ara-panahy nama’ao reo. (Jakoba 5:14) Fe soa mandilatsy raha iaby rezay, ty fiantehera’ao ami’ty fanampea-Ndranahare, ami’y vavake.—Filipianina 4:6, 7, 13.

[Sary, pejy 20, 21]

Hala-Ndranahare ty hamamòa, ty fangalàra, ty filokà voho ty hasatà raty