Fianara 11

Raha Inoa Ndreke Fombafomba Hala-Ndranahare

Raha inoa noho fombafomba manao akore ro raty? (1)

Toko’e hino va ty Kristiana fa Telo Fe Raike Andranahare? (2)

Ino ty anto’e tsy ankalazà’ty Kristiana Noely, Paka, ndra fahatiaròva’ty andro nahateraha? (3, 4)

Afake manisy raty ty velo va ty maty? (5)

Maty tami’y lakroa va Jesosy? (6)

Ty mampifale an’ia ro soa maré? (7)

1. Tsy raty iaby laha fa kila raha inoa noho ty fombafomba misy. Fe, hala-Ndranahare raha reo laha baka ami’ty fivavàha diso, ndra mifanohitse ami’ty fampianara’ty Baiboly.—Matio 15:6.

2. Andranahare Telo Fe Raike: Andranahare Telo Fe Raike va Jehovah? Aha! “Andranahare vata’e tò raike avao”, Jehovah Rae. (Jaona 17:3; Marka 12:29) Ana’e talanolo Jesosy, ndreke mbo ambany fahefà’e. (1 Korintianina 11:3) Ty Rae le anabo mihoatse ty Anake. (Jaona 14:28) Tsy olo ty fanahy masy, fa hery ampiasà-Ndranahare.—Genesisy 1:2; Asan’ny Apostoly 2:18.

3. Noely noho Paka: Tsy terake tami’y 25 Desambra Jesosy. Terake tokotoko’e ho tami’y 1 Oktobra ie. Fotoa fiaràha aondry haly an’ala eny tami’io. (Lioka 2:8-12) Tsy nivòla ty Kristiana mba hankalaza ty nahateraha’e mihitsy Jesosy. Fe, nivòla ty mpiana’e ie mba hahatiaro ty nahafatesa’e. (Lioka 22:19, 20) Baka ami’y fivavàha diso taloha ty Noely noho ty fombafomba miarake ami’e. Manahake zay kea ty fombafomba atao ami’y Paka; ohatsy, ty fampiasà atoly noho bitro. Tsy nankalaza Noely, ndra Paka, ty Kristiana tam-boaloha’e tane. Ka tsy mankalaza ani’zay kea ty Kristiana vata’e henany zao.

4. Fahatiaròva ty andro nahateraha: Roe avao ty fankalazà fahatiaròva ty andro nahateraha resàfy ami’y Baiboly ao. Olo tsy mpivavake tami’i Jehovah ro nanao aze. (Genesisy 40:20-22; Marka 6:21, 22, 24-27) Tsy nankalaza fahatiaròva ty andro nahateraha’e ty Kristiana tam-boaloha’e tane. Baka ami’y fivavàha diso taloha ty fombafomba fankalazà andro nahateraha. Afake manome fanomeza noho miarake manao fety ty Kristiana ami’y fotoa hafa.

5. Favakà ty maty: Tsy afake manao ndra ino ndra ino, na mahatiaro ndre ino ndre ino ty maty. Tsika tsy afake manampe aze, sady tsy afake manisy raty antsika ie. (Salamo 146:4; Mpitoriteny 9:5, 10) Laha fa maty ty olo le maty, fa tsy misy fiaìna hafa afara’y zay. (Ezekiela 18:4) Fe kindraindraike, le misy anjele raty, kaìhy hoe demonia, misandoke ho fanahin’olo fa nimaty. Raty iaby laha fa kila fombafomba atao noho’ty favakà ty maty, na fombafomba andesy hivavàha ami’e.—Isaia 8:19.

6. Lakroa: Tsy maty tami’y lakroa teo Jesosy. Maty tami’y tsato-kazo raike’ie. Hazo raike avao tsy misàmpa ro dika’y safà grika nadika hoe “lakroa” ami’y Baiboly maro ane. Baka ami’ty fivavàha diso taloha ty lakroa. Tsy nampiasa lakroa, sady tsy nivavake tami’io ty Kristiana tam-boaloha’e tane. Ka, mety va ami’ao ty mampiasa lakroa laha fa mivavake?—Deoteronomia 7:26; 1 Korintianina 10:14.

7. Mety ho sarotse ialà ty sasa’e ami’y raha inoa noho fombafomba reo. Mety hisy longo ndreke nama’ao hanao ze tsy hialà’ao ami’y raha fa ninòa’ao reo. Fe, raha bevata mandilatse ani’zay ty mampifale an’Andranahare, fa tsy ty mampifale olo.—Ohabolana 29:25; Matio 10:36, 37.

[Sary, pejy 22]

Tsy Telo Fe Raike Andranahare

[Sary, pejy 23]

Baka ami’y fivavàha diso taloha tane ty Noely noho ty Paka

[Sary, pejy 23]

Tsy misy anto’e toko’e hivavàha ami’ty maty ndra havakà an-droze