Fianara 14

Ty Fomba Andamìna ty Vavolombelo’i Jehovah

Nombia ty nanomboha’ty Vavolombelo’i Jehovah ami’y andro henany zao? (1)

Manao akore ty fandeha’ty fivoria’y Vavolombelo’i Jehovah? (2)

Manao akore ty fiantòha ty drala lany? (3)

Ia ro mitari-dàla ami’y fiangòna kiraidraiky? (4)

Ino iaby ty fivoria hafa fatao isan-tao? (5)

Asa ino ro atao ami’y foibe, noho ami’y birô’y sampana ane reo? (6)

1. Nanomboke tami’y tao 1870 ty Vavolombelo’i Jehovah, ami’y andro henany zao. Nokaìhy hoe Mpianatsy Baiboly roze, tam-boaloha’e tany. Fe tami’y 1931, le nampiasan-droze anara hoe Vavolombelo’i Jehovah io. Anara baka ami’y Baiboly ao ie’io. (Isaia 43:10) Kelikele ty fikambanan-droze tam-panomboha’e tane. Fe, nitombo roze, ka fa misy an-tapitrisa’e maro henany zao, mazoto mitory ami’y tany mihoatse ty 230.

2. Manao fivoria in-telo isan-kerinandro ty ankamaroa’ty fiangòna’y Vavolombelo’i Jehovah. Mitao anao zahay ho avy ane. (Hebreo 10:24, 25) Ty Baiboly ro loharano’ty fampianara ao. Atomboke noho faràna ami’y vavake fivorìa reo. Misy kea “hira mikasike an’Andranahare” mampihetsi-pò, hirà ami’y ankamaroa’y fivoria reo. (Efesianina 5:18, 19) Tsy misy drala alòa ndra fanatàza rakitsy ty any.—Matio 10:8.

3. Ty ankamaroa’ty fiangòna le manao fivorìa ami’y Efitrano Fanjakà ane. Trano tsotra ie’io matetike. Mpiasa an-tsitrapò Vavolombelo’i Jehovah avao ro nanamboatse aze. Tsy hahita sary masy na lakroa, ndra raha manahake zay iha ami’y Efitrano Fanjakà ane. Ty drala lany le antòfa ami’ty fanomeza ze foim-pò. Misy boaty zay ao, ho ahi’ze ta hanome.—2 Korintianina 9:7.

4. Misy anti-panahy, ndra mpikarakara, ami’ty fiangòna kiraidraike. Mitarike ty fampianara ami’y fiangòna ao roze reo. (1 Timoty 3:1-7; 5:17) Manampe an-droze ty mpanampe ami’y fanompoa. (1 Timoty 3:8-10, 12, 13) Tsy anabo mihoatse ty olo hafa iaby ami’y fiangòna ao lahilahy reo. (2 Korintianina 1:24) Tsy amea anaram-boninahitse manòka roze. (Matio 23:8-10) Tsy manao akanjo miavake roze. Tsy karamà kea roze. Ami’ty sitrapò’e ro ikarakarà’ty anti-panahy ty raha ara-panahy ilà’ty fiangòna. Afake manome fampionòna ndreke tari-dàla roze laha fa misy raha manahìra.—Jakoba 5:14-16; 1 Petera 5:2, 3.

5. Manao fivoriambe isan-tao kea ty Vavolombelo’i Jehovah. Fiangòna maro ro miarake mivòry ami’zay fotoa zay. Fandaharam-pampianàra manoka baka ami’y Baiboly ao ro azon-drozy ane. Saky misy fivoriambe, le misy fanaòva batisa ty mpianatsy vaovao.—Matio 3:13-17; 28:19, 20.

6. A New York ane ty foibe maneran-tani’ty Vavolombelo’i Jehovah. Ane ro misy ty Filan-kevi-pitantàna, mikarakara ty fiangòna ami’ty tany manontolo. Anti-panahy maromaro fa zatse asa rozy reo. Misy birô’y sampana maheri’ty 100 kea ami’y tany manontolo. Ami’y toera reny, le misy mpiasa an-tsitrapò manampe ami’ty famoàha noho ty fandefàsa boky mikasike ty Baiboly. Ane kea ro manome tari-dàla mikasike ty fandamìna ty asa fitorìa. Nanino iha laha manao fandahàra mba handalòva ami’ty birô’y sampana fara’y ze marìny anao?