Jesosy Kristy: Mesia Nampitamàny Iny

MBA hahaizantsika hoe ia Mesia io, le naniraky mpaminany maro Ndranahary hanoratsy raha malinidiniky mikasiky ty fahateraha Mpamonjy nampitamàny io noho ty fanompoany voho ty fahafatesany. Tanteraky tamy Jesosy Kristy iaby faminania amy Baiboly ao rey. Mahatseriky fa marina noho maro raha malinidiniky faminania rey. Handiniky faminania vitsivitsy miresaky ty fahateraha ty Mesia noho ty nahakely azy tsika, mba hahità raha zay.

Nivola Isaia mpaminany hoe ho baka amy taranaky Davida Mpanjaka ty Mesia. (Isaia 9:6) Le baka amy taranaky Davida vatany ro niavia Jesosy.—Matio 1:1, 6-17.

Nivola koa Mika mpaminany Ndranahary hoe hanjary mpanday ajà io, sady ho teraky a “Betlehema Efrata” ao. (Mika 5:2) Nisy tanà roe nikaihy hoe Betlehema ta Israely any, tamy fotoa nahateraha Jesosy. Ty raiky tanila Nazareta tavaratsy any, le ty raiky tsy lavitsy Jerosalema, a Joda any. Tao Jesosy ro nateraky, mifanaraky soa amy faminania iny!—Matio 2:1.

Misy faminania hafa koa mivola hoe hokaihy “hiala baka Ejipta” ty Anaky Ndranahary. Nandesy ta Ejipta any Jesosy tamy ie mbo nikely. Nandesy nimpoly baka any ie, tafara ty nahafatesa Heroda, ka tanteraky faminania iny.—Hosea 11:1; Matio 2:15.

Ahità raha malinidiniky maro mikasiky ty Mesia andinin-teny amy tabilo hoe “Faminania Mikasiky Ty Mesia,” ambany soratsy hoe “Faminania.” Ampitovizo amy andininy ambany soratsy hoe “Fahatanterahany” eo reo rozy. Hahavy anao hatòky ty fahamarina amy Safà Ndranahary ao ty fanaova raha zay.

Lafa mamaky andininy reo iha, le tiarovo hoe fa an-jatony tao taloha ty nahateraha Jesosy, ro nanorata ty faminania sisany hita ao. Hoy Jesosy: “Tsy maintsy tanteraky ze raha iaby nisoraty mikasiky ahy amy lalàna Mosesy noho ty Mpaminany voho ty Salamo.” (Lioka 24:44) Azonao hentea soa amy Baibolinao ao fa tanteraky vatany ndre ty malinidiniky amy faminania reo!