Manao Akory ro Anampea ty Anti-panahy ty Fiangona?

Tsy misy mpitariky fivavaha karamà amy fandamina misy anay ao. Tamy vo niforo ty fiangona Kristiana, le fa nisy mpiandraikitsy voafily ‘hiamby ty fiangona Ndranahary.’ (Asan’ny Apostoly 20:28) Lahilahy mana finoa mantanjaky ty anti-panahy. Rozy ro finily hiamby noho hitariky amy fiangona ao ‘fe tsy forosè fa sitrapo noho tsy hoe ta hahazo raha baka amy tsy marina, fa mila mazoto marè avao.’ (1 Petera 5:1-3) Ino iaby ty asa anovy ty anti-panahy ho ahinay ?

Mikarakara noho miaro anay ty anti-panahy. Manampy ty olo amy fiangona ao hifandramby soa amy Jehovah avao ty anti-panahy. Hevitsy baka amy Baiboly ao ro ampiasan-drozy. Hain-drozy fa Ndranahary ro nanome asa io. Mikarakara soa fa tsy masiaky amy mpanompo Ndranahary reo rozy satria tean-drozy ho falifaly avao olo reo. (2 Korintianina 1:24) Mikarakara soa ty aondriny kiraidraiky ty mpiaraky aondry, manahaky zay koa ty anti-panahy, ataony ze ahaiza soa ty olo kiraidraiky amy fiangona ao.—Ohabolana 27:23.

Mampianatsy anay hanao ty sitrapo Ndranahary rozy. Ty anti-panahy ro mitariky fivoria atao ty fiangona san-kerinandro, mahavy anay hana finoa matanjaky raha zay. (Asan’ny Apostoly 15:32) Mitariky amy fanaova asa fitoria koa rozy noho mampianatsy anay ty raha iaby mila atao lafa manao raha zay.

Ampean-drozy zahay kiraidraiky soa ho afaky hifandramby amy Jehovah. Ampea ty anti-panahy ty olo kiraidraiky amy fiangona ao soa hifandramby soa amy Jehovah. Misafo anay an-tranonay any na miresaky aminay amy Efitrano Fanjakà any rozy. Mampiasa Baiboly rozy lafa manao raha zay soa hahazo hery andesy manompo Jehovah zahay.—Jakoba 5:14, 15.

Tsy asa amy fiangona ao avao ro ataon-drozy fa mbo mana asa fiveloma koa rozy noho mikarakara fianakavia. Hajanay soa rahalahy reo satria miasa marè ho ahinay.—1 Tesalonianina 5:12, 13.

• Ino iaby ty asa atao ty anti-panahy amy fiangona ao?

• Manao akory ty ikarakara ty anti-panahy ty olo kiraidraiky amy fiangona ao?