Manao Akory ro Anaova ty Filan-kevi-pitantana ty Asany Henanizao?

‘Ty apostoly noho ty anti-panahy ta Jerosalema tao’ ro filan-kevi-pitantana tamy taonjato voalohany. Lafa misy fanapahan-kevitsy bevata horambesy amy fiangona Kristiana, le rozy ro manao raha zay. (Asan’ny Apostoly 15:2) Manaraky soa ty raha amy Baiboly ao noho ty fitariha ty fanahy masy rozy lafa hanapa-kevitsy. (Asan’ny Apostoly 15:25) Mbo ho zay avao ro atao henanizao.

Ampiasà Ndranahary hanao ty sitrapony. Mahay noho fa zatsy mitariky asa amy fampandehana soa ty fandamina ty rahalahy voahosotsy amy Filan-kevi-pitantana ao. Mivory in-draiky san-kerinandro rozy, amy fotoa zay rozy ro mandiniky ty raha ilà ty rahalahy Kristiana iaby an-tany etoy. Manahaky tamy taonjato voalohany, lafa misy fanapahan-kevitsy rambesin-drozy, le atao mifototsy amy Baiboly, ndre atao amy taratasy io ndre ampandesy mpiandraikitsy mpitety faritany. Mahavy ty vahoaky Ndranahary ho raiky noho hanao raha mitovy avao raha zay. (Asan’ny Apostoly 16:4, 5) Manoma raha baka amy Baiboly ao koa ty Filan-kevi-pitantana soa hazoto hitory ty Kristiana. Hentean-drozy soa ty fifiliana rahalahy mpiandraikitsy amy fiangona.

Manaraky ty fitariha fanahy masy Ndranahary. Manoriky ty torolala baka amy Jehovah azy Mpanjaka ty Raha Iaby iny noho Jesosy azy Loha ty fiangona iny ty Filan-kevi-pitantana. (1 Korintianina 11:3; Efesianina 5:23) Tsy mihevitsy ty vatan-drozy ho mpitariky ty vahoaky Ndranahary rozy. Mitovy amy ty Kristiana voahosotsy hafa avao rozy, le ‘manoriky Anak’aondry [Jesosy] iny avao ndre aia ndre aia ty ombany.’ (Apokalypsy 14:4) Tea ty Filan-kevi-pitantana laha mivavaky ho ahy ndrozy zahay soa hahavitan-drozy ty asa nampanovy an-drozy.

• Ia ty filan-kevi-pitantana tamy taonjato voalohany?

• Ino ro ahità fa manoriky ty torolala Ndranahary ty Filan-kevi-pitantana henanizao?