Baka Amy Ndranahary Vatany va ty Vaovao Soa Amy Baiboly Ao?

1. Ahinia ty hevitsy amy Baiboly ao?

Voasoratsy amy Baiboly ao ty vaovao soa, tsy ino raha zay fa ty hoe, ho velo tsy misy farany amy tany toy eto ty olo. (Salamo 37:29) Bokikely 66 ro mahaforo ty Baiboly. Lahilahy 40 teo ho eo ro nampanoraty Ndranahary raha io. Mosesy ro nanoratsy ty boky limy voalohany amy Baiboly ao, fa ho 3 500 tao lasa zay. Apostoly Jaona ro nanoratsy ty boky farany ao, fa ho 1 900 tao lasa zay. Ahinia ty hevitsy amy Baiboly ao? Nampiasa fanahy masy Jehovah soa hanambarà ty hevitsiny tamy mpanoratsy Baiboly reo. (2 Samoela 23:2) Ty hevitsy Ndranahary ro nisoratin-drozy fa tsy ty ahin-drozy. Midika raha zay fa hevitsy Jehovah ro amy Baiboly ao.—Vakio 2 Timoty 3:16; 2 Petera 1:20, 21.

Henteo ty video hoe Baka Amin’ia ty Baiboly?

2. Manino tsika ro mivola fa marina ty Baiboly?

Baka amy Ndranahary ty Baiboly. Marina ty raha volaniny ao satria voasoratsy mazava soa ao iaby, ndre ty raha mbo hiseho. Tsy misy olo mahavita raha zay. (Josoa 23:14) Ndranahary mana hery faratampony Jehovah. Ie raiky avao ro mahay ty raha mbo ho avy amy fiaina ty olombelo.—Vakio Isaia 42:9; 46:10.

Tsy misy manahaky azy ty boky baka amy Ndranahary, ho zay vatany ty Baiboly. Fa misy amy fivolana an-jatony boky io sady fa anarivo tapitrisa ro fa naboaky. Mifanaraky amy siansy ty Baiboly ndre fa ela ro nampisy azy. Tsy misy raha mifanohitsy ty ao ndre lahilahy 40 aza ro nanoratsy azy.a Resahy ty Baiboly koa fa be fitiava Ndranahary. Afaky mampiova ty fiaina ty olo ho soa boky io. Zay ro mahavy ty olo maro haneky fa baka amy Ndranahary ty Baiboly.—Vakio 1 Tesalonianina 2:13.

Henteo ty video hoe Ino ty Porofo fa Marina ty Baiboly?

3. Ino iaby ty raha volany amy Baiboly ao?

Mivola ty Baiboly fa tea Ndranahary hana fiaina farany ze soa ty olombelo. Vaovao soa io ro fototsy ty raha volàny ao. Resahy ao koa fa nana fiaina soa tamy paradisa tan-tany etoa ty olo. Nanino raha zay ro tsy misy henanizao? Manao akory ro hahavy tany toy ho paradisa ndraiky?—Vakio Apokalypsy 21:4, 5.

Misy lalàna noho torolala voho torohevitsy amy Baiboly ao. Misy tantara maro mikasiky ty fomba nandaisa Ndranahary ty olo koa ty ao. Hita baka amy tantara reo hoe Ndranahary manao akory ie. Afaky manampy anao hahay Ndranahary ty Baiboly. Volaniny ao ty raha hahavy anao ho namany.—Vakio Salamo 19:7, 11; Jakoba 2:23; 4:8.

4. Ino ro hanampy anao hahay ty raha volany amy Baiboly ao?

Hanampy anao hahay ty raha volany amy Baiboly ao bokikely toy, satria manaraky ty fomba fampianara Jesosy. Nangalaky andini-teny baka amy Baiboly ao ie bakeo nanazava soa ‘ty hevitsy baka ao.’—Vakio Lioka 24:27, 45.

Tsy misy raha soa mandilatsy ty vaovao soa baka amy Ndranahary. Fe maro ty olo tsy midary raha io, ty sisany manohitsy. Fe ka kivy. Mila mianatsy hahay Ndranahary iha. Hahavy anao ho velo tsy misy farany raha zay.—Vakio Jaona 17:3.