Fianara 6

Mbo ho Hitantsika Ndraiky va ty Longontsika fa Nimaty?

1. Ino ty vaovao soa ho ahinolo mana longo fa nimaty?

Marta noho Maria falifaly mahita any Lazarosy baka nivelomy tamy maty

Fa nimaty efatsy andro lazarosy nama Jesosy, zay vo niavy ta Betania tanà tsy lavitsy Jerosalema tao ie. Nandeha niaraky amy Marta noho Maria anabavy Lazarosy tan-dolo any Jesosy. Tsy ela le nimaro olo ty teo. Nivelomy Jesosy ndraiky Lazarosy. Tsy isalasalà fa falifaly bibiky Maria noho Marta lafa nahitaky raha zay.—Vakio Jaona 11:21-24, 38-44.

Vaovao soa ty hoe hovelomy Jehovah hiay an-tany etoy ndraiky ty olo fa nimaty. Fa nihay Marta raha zay.—Vakio Joba 14:14, 15.

2. Manao akory ty olo lafa maty?

Ty namorona Adama, bakeo ty nifatezany — Nivola tamy Adama Ndranahary hoe: ‘Lemboky iha sady himpoly ho lemboky ndraiky.’—GENESISY 3:19.

Lemboky ro nanamboara ty olombelo. (Genesisy 2:7; 3:19) Tsy misy fanahy miala amy ty vatantsika lafa maty tsika. Simba ty betro, ka tsy afaky mieritseritsy sasy ty olo lafa maty. Zay ro nahavy Lazarosy tsy nitantara ty raha niseho taminy tanaty fotoa nahafaty azy. Tsy mahatiaro ndre ino ndre ino ty olo lafa maty.—Vakio Salamo 146:4; Mpitoriteny 9:5, 6, 10.

Mampijaly olo fa nimaty amy afobe any vatany va Ndranahary? Mivola ty Baiboly fa tsy mahatiaro ndre ino ndre ino ty olo lafa maty. Midika raha zay fa diso fampianara mikasiky afobe io. Manasara raha raty Jehovah raha zay. Farany ze hala Jehovah ty manoro olo amy afo.—Vakio Jeremia 7:31.

Henteo ty video hoe Manao Akory ty Olo Lafa Maty?

3. Afaky miresaky amintsika va ty olo fa nimaty?

Tsy afaky mivola noho tsy maharè ty olo lafa maty. (Salamo 115:17) Fe misy anjely raty miresaky aminolo, ka feonolo fa nimaty ro alàny tahaky soa hamitaha olo. (2 Petera 2:4) Rarà Jehovah ty miresaky aminolo fa nimaty.—Vakio Deoteronomia 18:10, 11.

4. Ia iaby ro hovelomy ndraiky?

Lahilahy raiky nivelomy tamy maty, amy Paradisa any. Mianatsy mikasiky Ndranahary lahilahy iny, bakeo mampianatsy olo hafa nivelomy tamy maty koa.

An-tapitrisany aminolo fa nimaty ro mbo hovelomy Ndranahary hiay an-tany etoy ndraiky. Hovelomy koa ze nanao raty fe tsy nahay Ndranahary.—Vakio Lioka 23:43; Asan’ny Apostoly 24:15.

Mila mianatsy ty marina mikasiky Ndranahary, noho mila mampiseho amy ty fiainany fa mino Jesosy olo nivelomy reo. (Apokalypsy 20:11-13) Ho velo tsy misy farany an-tany etoy rozy laha manao raha soa.—Vakio Jaona 5:28, 29.

5. Ndranahary manao akory Jehovah laha hentea ty fameloma ty olo fa nimaty?

Atokisa fa ho velo vatany ty maty satria nandefa ty anany ho maty ho antsika Ndranahary. Be fitiava noho soa fanahy Jehovah, laha hentea ty fameloma ty olo fa nimaty. Lafa hovelomy ndraiky ty maty, ia ro teanao ho hita marè?—Vakio Jaona 3:16; Romanina 6:23.

Henteo toko 6 noho 7 amy boky Ino ty Azonao Ianara amy Baiboly Ao? laha teanao ty hahazo fanazavà maromaro.