Fianara 10

Manao Akory ro Ahaizanao hoe Ia ty Fivavaha Marina?

1. Misy firy ty fivavaha marina?

Jesosy mampianatsy — ‘Manaova soa tsy ho voafitaky ty mpaminany sandoky’—MATIO 7:15.

Nampianatsy ty mpanoridia azy Jesosy fa raiky avao ty fivavaha marina. Mitovy amy lala mitariky ty olo ho velo tsy misy farany raha io. Nivola Jesosy fa ‘tsy maro ty olo mahitaky’ lala io. (Matio 7:14) Ty fivavaha manaraky soa ty raha volany amy Baiboly ao avao ro tea Ndranahary. Mitovy raha inoa ty olo iaby amy fivavaha marina ao.—Vakio Jaona 4:23, 24; 14:6; Efesianina 4:4, 5.

Henteo ty video hoe Ekè-Ndranahary va Lafa Atao Fivavaha?

2. Ino ro nivolany Jesosy mikasiky ty fivavaha diso?

Mpitariky fivavaha mivola anaty eglizy. Bakeo mitso-drano maramila analy any. — ‘Mivola aminolo iaby rozy hoe mahay Ndranahary fe hita amy ty raha anoviny fa tsy maneky azy rozy.’—TITOSY 1:16.

Fa nivola Jesosy fa hisy mpaminany sandoky hamitaky ty olo amy fivavaha marina ao. Laha hentea rozy le sahala hoe mpanaraky fivavaha marina io. Fe ndre eo raha zay, misy avao ty raha amantara ty fivavaha marina. Ty fivavaha marina avao ro ahità Kristiana manoriky soa ty safà Ndranahary.—Vakio Matio 7:13-23.

3. Ino ty amantara ty olo amy fivavaha marina ao?

Misy famantara limy retoa:

Eken-drozy fa safà Ndranahary ty Baiboly. Orihin-drozy ze raha volany ao. Fivavaha maro ro mampianatsy hevitsy baka aminolo. Tsy mitovy amy zay ty fivavaha marina. (Matio 15:7-9) Orihy ty olo amy fivavaha marina ao iaby ze raha ampianariny baka amy Baiboly ao.—Vakio Jaona 17:17; 2 Timoty 3:16, 17.
Manome voninahitsy ty anara Ndranahary hoe Jehovah rozy. Nanome voninahitsy ty anara Ndranahary Jesosy, lafa nanambara raha zay taminolo. Nampeany ty olo hahay soa Ndranahary. Nampianariny hivavaky koa rozy soa hanome voninahitsy ty anara Ndranahary. (Matio 6:9) Ia ty fivavaha manambara ty anara Ndranahary amy tanà misy anareo eny?—Vakio Jaona 17:26; Romanina 10:13, 14.
Mitory mikasiky Fanjakà Ndranahary rozy. Nirahy Ndranahary hanambara vaovao soa mikasiky ty Fanjakany Jesosy. Fanjakà Ndranahary io avao ro afaky manavotsy ty olombelo. Niresaky mikasiky raha io avao Jesosy zisiky ie nimaty. (Lioka 4:43; 8:1; 23:42, 43) Nivolaniny koa ty mpanoridia azy hanambara Fanjakà io aminolo. Laha misy olo miresaky mikasiky Fanjakà Ndranahary io aminao, baka amy fivavaha manao akory ie?—Vakio Matio 24:14.
Tsy nama ty olo tsy manaraky ty raha tea Jehovah rozy. Ho hainao rozy satria tsy militsy amy politiky. (Jaona 17:16; 18:36) Tsy manao ze raha raty fatao ty olo maro koa rozy, manahaky hoe tea aly, noho ty fomba raty hafa.—Vakio Jakoba 4:4.
Mifankatea rozy. Ianaran-drozy baka amy Baiboly ao fa tsy mila manavakavaky olo rozy. Tsy militsy amy aly ty olo amy fivavaha marina. (Mika 4:1-3) Mampiasa ty fotoa noho ze raha ananany rozy, hanampea olo.—Vakio Jaona 13:34, 35; 1 Jaona 4:20.

4. Ino iaby ro amantara ty fivavaha marina?

Retoa iaby ty amantara ty fivavaha marina: Mampianatsy raha baka amy Baiboly ao, manome voninahitsy ty anara Ndranahary, manambara aminolo fa ty Fanjakà Ndranahary avao ro ho afaky manavotsy ty olombelo, mifankatea noho tsy militsy amy aly. Mahay fivavaha manaraky raha reo va iha?—Vakio 1 Jaona 3:10-12.

Henteo toko 15 amy boky Ino ty Azonao Ianara amy Baiboly Ao? laha teanao ty hahazo fanazava maromaro.