Fa Nangiky noho Navaka va Iha?

Henteo ajà amy sary etia tia. Mangiky noho mavaka ty fanentea azy. Sa tsy zay? Fa nanahaky zay koa va iha?... Samby tratsy raha zay ty olo iaby kindraiky. Miresaky mikasiky ty nama Jehovah nangiky noho navaka koa ty Baiboly. Elia ty anara ty raiky. Ndao hianarantsika ty mikasiky azy.

Olo nipetraky ta Israely tao, fa ela taloha ty niteraha Jesosy, Elia. Ahaba ro mpanjaka ty Israely tamy zay. Tsy nivavaky tamy Jehovah, azy Ndranahary marina iny ie. Nivavaky tamy Bala, ndranahary diso, Ahaba noho Jezebela valiny. Farany nanjary maro ty Israelita nivavaky tamy Bala. Nampijaly sady ta hamono ze olo nivavaky tamy Jehovah, Jezebela valy mpanjaka. Teany hovonoa koa Elia. Hainao va ty raha natao Elia?...

Nilay Elia! Nandeha an-tany lavitsy any ie, le nietaky tanaty lakato. Araka ty hevitsinao, nanino ie ro nilay?... Zay, navaka Elia. Fe tsy tokony havaka ie. Ino ty antony? Satria fa hainy fa afaky manampy azy Jehovah. Fa natoro Jehovah, Elia, ty heriny talohany zay. Namaly ty vavaky natao Elia, Jehovah ndraiky andro, ka nandefa afo baka an-danitsy any. Hita baka amy zay, fa afaky nanampy Elia koa Jehovah tamy fotoa io!

Niresaky tamy Elia Jehovah tamy ie tanaty lakato ao. Nanontany ie hoe: ‘Manino atoa iha io?’ Namaly Elia hoe: ‘Zaho raiky avao sisa ro mbo mivavaky aminao. Mavaka aho tsy no hovonoa koa.’ Nieritseritsy Elia hoe fa nimaty iaby mpanompo Jehovah ilany rey. Fe nivola taminy Jehovah hoe: ‘Aha, tsy marina zao. Mbo misy olo 7 000 mivavaky amiko. Manàna herim-po, fa mbo maro ty asa hampanoviko anao!’ Araky ty hevitsinao, nahafalifaly Elia va ty naharè raha zay?...

Ino ty ianaranao baka amy ty tantara Elia?... Tsy tokony hangiky noho havaka mihintsy iha. Mana nama maro tea Jehovah sady tea anao iha. Mahery koa Jehovah, ka hanampy anao avao! Falifaly va iha mahay hoe tsy ho raiky zao mihintsy iha?...