Tea Manampy Olo Timoty

Pamaraky tea manampy olo Timoty. Nandeha tamy tanà maro ie mba hanampy olo. Nahavy ty fiainany ho soa raha zay. Teanao ho re va tantara zay?...

Nibe tamy tanà raiky kaihy hoe Lystra, Timoty. Loisa ty anara ty bebeny, le Eonika ty reniny. Mbo nikelikely Timoty, le fa nampianarin-drozy mikasiky Jehovah. Ta hanampy olo hahay mikasiky Jehovah ie lafa nihabe.

Lafa pamaraky Timoty, le nitaomy Paoly hiaraky hitory aminy mbamy tany hafa any. ‘Eka’ hoy ty asa Timoty. Parè handeha noho hanampy ty olo hafa ie.

Niaraky tamy Paoly ta Tesalonika any Timoty. A Makedonia any ty misy tanà io. Nila nandeha an-tomboky ela biby rozy, le bakeo niondra sambo, zay vo niavy any. Nampianatsy olo maro mikasiky Jehovah rozy lafa niavy. Fe neloky an-drozy ty olo sisany, ka nampijaly an-drozy. Niala tao Paoly noho Timoty, le nitory tamy tanà hafa.

Vola maromaro tafarany zay, le nirahy Paoly himpoly a Tesalonika any Timoty mba hanenty rahalahy any rey. Be herim-po ty olo hahasaky mimpoly amy tanà mampatahotsy io ao! Fe nandeha Timoty satria nampiasa loha azy hoe nanao akory zay rahalahy any rey. Nanday vaovao soa ho ahy Paoly ie lafa bakany. Tsy nanahy rahalahy ta Tesalonika any rey!

Niaraky niasa tamy Paoly tanaty ty tao maro Timoty. Nanoratsy Paoly ndraiky zay hoe Timoty ro olo natokisany marè, azony irahy hanampy fiangona reo. Tea any Jehovah noho tea olo Timoty.

Tea olo noho ta hanampy olo hianatsy mikasiky Jehovah va iha?... Ho soasoa manahaky ty ahy Timoty ty fiainanao, laha zay ro ataonao!