Manao Akory ty Fomba Hitanjaha Drala?

Mila drala tsika mba hahafahantsika manome ze raha ilà ty fianakaviantsika. (Ohabolana 30:8) “Fiarova koa ty drala.” (Mpitoriteny 7:12) Mety hanahira ty mpivaly ty hiresaky mikasiky drala, fe ka engà hiteraky raha manahira aminareo raha zay. (Efesianina 4:32) Tokony hifampatoky ty mpivaly sady hifampiresaky lafa hanapa-kevitsy amy ty fomba hampiasà drala.

1 DINIHO SOA TSE

HOY TY BAIBOLY: “Ia aminareo, ohatsy, ro ta hanory tilikambo fe tsy mipetraky tse mikontikonty ze ho lany, mba hahità laha ampy hamità raha io ty ananany?” (Lioka 14:28) Mila dinihinareo roe sandrany hoe manao akory ty hampiasà drala. (Amosa 3:3) Henteo hoe ino ty raha hovilinareo, le hotrino ty drala azonareo ampiasà amy raha zay. (Ohabolana 31:16) Tsy hoe lafa manan-drala hivilia raha raiky iha, le tsy maintsy hivily. Miezaha tsy hitrosa, sady ka mandany drala mihoatsy ty anananao.—Ohabolana 21:5; 22:7.

TOY MISY HEVITSY:

• Laha misy ambiny ty dralanareo amy faravola, le miaraha manapa-kevitsy amy ze hanaovanareo azy

• Laha tsy mahalìny faravola ty dralanareo, le diniho ze azo atao mba hampihenà ty fandania. Azo atao, ohatsy, ty miketriky fa tsy mikalo hany masaky

2 KA MAMONIVONY RAHA SADY EKEO TY RAHA MISY

HOY TY BAIBOLY: Manaova raha “amim-pahamarina, tsy amaso Jehovah avao, fa amasonolo koa.” (2 Korintianina 8:21) Ambarao amy valinao ty karamanao, sady ka avony azy ty drala nilanìnao.

Mivolàna amy valinao avao lafa misy fanapahan-kevitsy bevata mikasiky drala. (Ohabolana 13:10) Hanampy anareo hifandramby soa avao ty firesaha mikasiky drala. Ka eritserety ho dralanao raiky avao ty drala azonao, fa ahinareo trano raiky.—1 Timoty 5:8.

TOY MISY HEVITSY:

• Mifanaraha hoe hotrino ty drala azo ty kiraidraiky lanỳ ndre tsy mila miera

• Ka mandìny hoe misy raha manahira zay vo hiresaky drala amy valinao