Niazoni-Jakoba Lova Iny

Nifanambaly Isaka noho Rebeka tamy Isaka 40 tao. Teani-Isaka marè valiny io. Nanan’anakilahy hamba rozy tafara tatoy.

Esao ty zoky, le Jakoba ty zay. Tea miboaky Esao, sady mahay mila biby an’ala any. Fa Jakoba mpijano an-trano ao avao.

Tamy andron-drozy, le ze farany zoky ro namea tany noho drala maro lafa maty ty baban-drozy. Lova ty fikaiha ani-raha rezay. Mbo lova ho ahi-ty fianakavian-dry Isaka koa ty hoe ho tafilitsy amy raha nampitama- nini-Jehovah ani-Abrahama iny. Tsy de nidareani-Esao loatsy fampitamana reo, kanefa tena vatan-draha tamy Jakoba.

Nihaza biby an’ala any Esao ndraiky andro. Vozaky biby ie lafa noly bakany. Naharè fofon-kany manitsy biby niketrehini- Jakoba ie, ka hoy ty asany: ‘Kerè aho zao! Ameo voamaina aho! Ameo mena tse aho!’ ‘Hameako iha’, hoasani-Jakoba, ‘fe mifantà tse hoe hameanao ahy ty lovanao.’ Le hoy Esao: ‘Ahoako ino lova zao! Andeso ho anao any. Hany henanizao ro ilàko.’ Nahihitsy va Esao, laha henteanao raha nataony zay? Aha, tsy nahihitsy ie. Natakalony voamaina boly raiky avao ty raha lafovily tokony ho niazony.

Lafa niantitsy marè Isaka, le tokony hanome tso-drano ho ahi-ty anakilahiny voalohany. Fe Jakoba ro nampeani-Rebeka hahazo ani-tso-drano iny, ndre mbo zaini- Esao aza. Lafa nihaini-Esao raha zay, le neloky marè ie ka nieritseritsy hamono ani-hamba aminy iny. Ta hanampy ani-Jakoba Isaka noho Rebeka, ka nanoro hevitsy azy hoe: ‘Ndany, mipetraha amy Labana dadatoanao any zisiky tsy mampeloky ani-Esao.’ Naneky Jakoba, le nilay nanany.