Andevo Raiky Nanoriky ty Safà-Ndranahary

Anakilahini-Jakoba faramparany Josefa. Nihitani-zokiny rey hoe ie ro teani-baban-drozy marè amy anakilahiny reo. Nanao akory hoasanao rozy? Nialona ani-Josefa rozy, sady nalay azy. Nanonofy raha hafahafa Josefa ndraiky zay, ka nitantaraniny tamy rahalahiny reo. Midika nofy io hoe hiankohoky aminy rozy ndraiky andro any. Vomaiky nanjeky ty falainan-drozy azy!

Niaraky aondry tanilani-Sekema tany rahalahini-Josefa reo ndraiky andro, ka nirahini-Jakoba ho any Josefa mba hanenty an-drozy. Mbo lavidavitsy Josefa le fa hitan-drozy. Nifampiresaky amy zay rozy hoe: ‘Ingy mpanonofy iny. Ndao koahy hovonoantsika!’ Nisamborin-drozy ie, bakeo natorakin-drozy tanaty lavaky laliky biby zay tao. Fe nivola Joda hoe: ‘Ka vonoa zalahy ie! Aleo ie havilintsika ho andevo.’ Nisy Midianita mpamarotsy amy zay nandalo fa handeha a Ejipta any. Navilin-drozy farantsa volafoty 20 tamy mpama- rotsy rey ie.

Najobon-drozy tamy lion’aosy amy zay ty akanjoni-Josefa, bakeo nampa- naterin-drozy tamy baban-drozy any. Hoy rozy: ‘Tsy akanjon’anakinao iny va toy?’ Nieritseritsy Jakoba hoe nivono- ani-bibinala Josefa. Nalahelo biby ie ka tsy nety nitambitambezy mihintsy.

Navarotsy ndraiky Josefa lafa ta Ejipta tany, ka nanjary andevoni- lahilahy manan-kaja atao hoe Potifara zay. Fe nanampy ani-Josefa avao Jehovah. Nihitani-Potifara fa haini-Josefa soa ty asany sady azo atokisa ie, ka nitendreny hiandraikitsy ty hananany iaby.

Tovolahy Josefa sady soa fitsanga, ka nitao azy hanao firaisa avao valini-Potifara iny sanandro. Fe ino ty nataoni-Josefa? Tsy nimety ie fa nivola hoe: ‘Aha. Tsy mety zao. Iha valini-tompoko, sady zaho koa atokisany. Laha manao firaisa aminao aho, le manota amy Ndranahary!’

Ndraiky andro, niforosevani-valini-Potifara iny hanao firaisa taminy Josefa. Nitanjahiny tamy akanjony Josefa, fe nilay. Lafa niavy amy zay Potifara, le navandy ie fa nao nandrava azy zao Josefa. Neloky biby Potifara, ka nigadrany Josefa. Fe tsy nanalino ani-Josefa mihintsy Jehovah.