Nampitamà ani-Jehovah Rozy

Niavy tamy Vohitsy Sinay eo Israelita rey, roe vola tafarani-nialan- drozy baka Ejipta any, le nananga tranolay teo. Niakatsy tamy vohitsy iny eny Mosesy. Bakeo nikaiky azy Jehovah ka nivola hoe: ‘Fa nanavotsy ani-Israelita reo aho. Ka laha manoriky ty safàko noho manaja ty lalànako avao rozy, le ho oloko.’ Nimpoly tamy Israelita rey teo Mosesy, le nambarany an-drozy safàni-Jehovah zay. Namaly rozy hoe: ‘Ao fa hataonay iaby ze raha ampanovini-Jehovah.’

Niakatsy tamy vohitsy iny eny ndraiky Mosesy. Le hoy Jehovah: ‘Hiresaky aminao aho lafa afaky telo andro, ka volano vahoaky reo tsy hiakatsy amy Vohitsy Sinay etoy.’ Nijotso ndraiky Mosesy, le nampioma ani-Israelita rey soa rozy ho parè hijanjy ani-Jehovah.

Nahita helatsy noho rahona mainty biby tamy vohitsy iny eo rozy, telo andro tafarani-zay. Naharè hotroky marè biby noho feon’antsiva koa rozy. Nisy afo koa nijotso tamy vohitsy iny teo, le sahala hoe nijotso teo Jehovah tamy zay. Navaka Israelita rey ka nangitikitiky. Feno setroky vohitsy iny sady nihozonkozo marè biby. Nihamarè biby avao feon’antsiva iny. Nivola amy zay Ndranahary hoe: ‘Zaho ro Jehovah. Tsy mahazo mivavaky amy ndranahary hafa nareo.’

Nimpoly amy vohitsy iny eny ndraiky Mosesy. Nameani-Jehovah lalàna maromaro ie soa ho hain-drozy hoe akory ty atao lafa mivavaky aminy, le ino ty tokony hatao noho tsy tokony hatao. Nisoratini-Mosesy lalàna rey, bakeo nivakiny tamy Israelita rey. Nampitamà rozy hoe: ‘Hataonay iaby ze raha ampanovini-Jehovah anay.’ Nataon-drozy vatany va raha nampitamanin-drozy ani-Jehovah zay?