Nivola Ampondrani-Balama Iny

Fa ho 40 tao zay ty nirioriovani-Israelita reo tan-diomonto any. Fa naharesy tanà maro rozy. Niavy tamy sakasakani-Moaba teo amy zay rozy, zany hoe tantinanani-Vavaranoni-Jordana teo. Sisa kely le hilitsy amy Tany Nampitamany iny ao rozy. Natahotsy Balaka, azy mpanjakani-Moaba iny hoe halàni-Israelita reo iaby ty taniny. Farany nikaiky lahilahy raiky mana anara Balama zay ie, soa hanozo ty Israelita.

Fe nivola tamy Balama Jehovah hoe: ‘Tsy mahazo manozo ani- Israelita reo iha.’ Farany nijano Balama. Nikaiky azy ndraiky Balaka, le nampitamà azy hoe hameany azy iaby ze raha teany. Fe mbo tsy nimety avao Balama. Le hoy Ndranahary taminy: ‘Tsy manahy ndre mandeha iha, fe ze ampivolaniko anao avao ro volano.’

Nitikitsy amy ampondrany iny amy zay Balama, le nandeha a Moaba any. Fa niraràni-Jehovah ie tsy hanozo ani-Israelita reo, fe mbo tsy mety avao. Nisy anjelini- Jehovah amy zay nanaka azy intelo tan-dala teny. Tsy hitani-Balama anjely io, fa ampondra iny ro nahita azy. Nivio nana an-tonda any tse ampondra iny tamy voalohany. Bakeo ie nianky tamy lakoro vato raiky zay, le nipìtry tao ty tomboni-Balama. Nizizo tanivon-dala teo ie tamy farany, ka tsy nahefa nandeha. Nivangovangoani-Balama avao ampondra iny saky niola.

Nataoni-Jehovah mivola amy zay ampondra iny, ka nivola tamy Balama hoe: ‘Manino aho vangovangoanao avao ’o?’ Le hoy ty navaliny: ‘Ka iha manafa baraka ahy ka! Laha zaho aza nana meso, le nitsibohiko iha.’ Le hoy ampondra iny: ‘Haelani-naha ampondranao ahy zay va, le fa nanao ho zao taminao aho?’

Nataoni-Jehovah hitani-Balama amy zay anjely iny. Nivola anjely iny hoe: ‘Tsy fa nivolanini-Jehovah moa iha hoe tsy mahazo manozo ani-Israelita reo.’ Le hoy Balama: ‘Diso vatany aho. Ao fa himpoly aho.’ Fe nivola anjely iny hoe: ‘Mahazo mandeha a Moaba any iha, fa ze ampivolanini-Jehovah anao avao ro volano.’

Niova amy zay va Balama? Aha. Mbo ta ho nanozo ani-Israelita reo intelo ie, fe nampanjarini-Jehovah ho tso-drano ze raha nivolaniny. Nanafiky ani-Moaba Israelita reo tafarani-zay, le nimaty Balama. Tsy ho nimaty ie zay laha mba nanoriky ty safàni-Jehovah avao!