Mpitariky Vaovao Noho Ampela Roe Nahasaky Raha

Maromaro tao zay Josoa ro nitariky ty vahoaki- Ndranahary. Nanompo ani-Jehovah avao Israelita reo tamy zay. Fe nimaty ie lafa 110 tao, le nanompo sampy manahaky Kananita rey Israelita reo. Farany nengani-Jehovah hampijaly an-drozy Jabina. Jabina io mpanjaka kananita. Naharary rozy ka nangataky fanampea tamy Jehovah. Farany nameani- Jehovah mpitariky vaovao rozy. Baraka ty anarany. Hanampy an-drozy himpoly amy Jehovah ie.

Nisy mpaminanivavy mana anara Debora zay tamy zay. Zao ty nivolaniny tamy Baraka: ‘Manandesa lahilahy 10 000 hoasani-Jehovah, le ndany mialy amy maramilani-Jabina reo amy vavaranoni-Kisona eny. Haharesy ani-Sisera azy sefoni- maramilani-Jabina iny iha.’ Le hoy Baraka tamy Debora: ‘Ho any aho laha miaraky amiko manany iha.’ Le hoy Debora: ‘Ndao moa. Fe zao, tsy ho matinao Sisera, hoasani-Jehovah. Misy ampela raiky zay hamono azy.’

Nandeha niaraky tamin-dry Baraka noho maramilany rey nana amy Vohitsy Tabara eny Debora, lafa rozy nioma hialy. Laha vo naharè ani-zay Sisera, le navoriny tamy sakasaka tambany eny kalesiny noho maramilany rey. Hoy ty asani-Debora tamy Baraka: ‘Hataoni-Jehovah resinao reo amy andro androany toy.’ Nijotso baka amy vohitsy iny eny amy zay ry Baraka noho maramilany 10 000 rey fa hialy amy maramilani-Sisera rey.

Nataoni-Jehovah be amy zay vavaranoni-Kisona iny. Niresin-dry Baraka noho maramilany rey maramilani- Sisera rey, fa Sisera nilay. Nipàky tamy fotaky ao kalesiny iny. Farany ie nijotso le nilay. Nilay avao ie, le nivony tamy tranolaini-ampela raiky zay ao. Jaela ty anarani-ampela io. Nameany ronono Sisera hinominy, bakeo nilombofany bodo, le niazon-droro. Nitingatinga namonjy azy Jaela. Nitombohiny fantsiky bevata biby amy zay ty lohani-Sisera. Nimaty Sisera.

Nanoriky ani-Sisera Baraka. Niboaky baka amy tranolainy ao Jaela, le nivola hoe: ‘Milira fa hatoroko anao olo ilànao zao.’ Lafa nilitsy Baraka, le Sisera fa maty ro nihitany. Nanao hira fiderà ani- Jehovah amy zay Baraka noho Debora, satria nampeany handresy ani-fahavalon-drozy rey ty Israelita. Niada soa ndraiky ty Israelita tanatini-40 tao tafarani-zay.