Davida Noho Goliata

Ho zao ty nivolanini-Jehovah tamy Samoela: ‘Mandehana amin-dry Jese any, fa ty raiky amy anakilahiny rey ro ho mpanjakani-Israely.’ Nana amy Jese any amy zay Samoela. Laha vo nihitany talanoloni-Jese iny, le nieritseritsy ie hoe: ‘Toy vasa olo zao.’ Fe nivola taminy Jehovah hoe: ‘Tsy ie io. Ty am-pony ao ro henteako fa tsy ty ivelany etoy.’

Mbo nisy anakilahini-Jese eny hafa koa nandesiny teo. Fe hoy Samoela: ‘Tsy misy nifilini-Jehovah retoa. Mbo misy anakilahinao hafa va?’ Namaly Jese hoe: ‘Mbo miaraky aondry any Davida, azy anakilahiko farany iny.’ Laha vo nilitsy Davida, le hoy Jehovah tamy Samoela: ‘Io ro ie!’ Nilinani-Samoela menaky amy zay ty lohani-Davida, satria ie ro ho mpanjakani- Israely.

Nialy tamy Filistinina ty Israelita tafara atoy. Nisy lahilahy filistinina bevata biby zay nivazavaza ty Israelita sanandro. Goliata ty anarany. Nikorakoraky ho zao ie: ‘Alefaso bakao ze lahilahy hialy amiko. Laha resiny aho le ho mpanomponareo zahay. Fa laha zaho ro mandresy, le nareo ro ho mpanomponay.’

Nanatitsy hany ho ahi-ty zokiny Davida tamy zay, satria maramila zokiny rey. Reny safàni-Goliata iny, le hoy ty asany: ‘Engao aho hialy aminy!’ Le hoy Saoly Mpanjaka: ‘Iha anakajà tia va?’ Le hoy Davida: ‘Hanampy ahy Jehovah.’

Nampisikinini-Saoly ani-Davida ty akanjo fandesiny mialy, fe hoy ty asani-Davida: ‘Tsy mahay manday ani-toa aho.’ Nalany pilatsiny iny, le nandeha an-drano eny ie. Bakeo nitimpo vato kaliso limy ie, le nataony anatini-kitapony ao. Nilay nana amy Goliata eny amy zay ie. Nikorakoraky ndraiky Goliata hoe: ‘Andeso bakao hakelikelinao ty. Hataoko hanini-voro noho bibinala iha amy toy.’ Tsy navaka Davida. Namaly aza ie hoe: ‘Iha manday sabatsy noho lefo, fa zaho mamonjy anao amy anarani- Jehovah. Tsy zahay ialianao ’o fa Ndranahary. Ho hitanareo soa fa mahery vatany Jehovah. Tsy ampy azy ndre ty sabatsy ndre ty lefo. Hataony resinay nareo.’

Nasiani-Davida vato raiky pilatsiny iny, le nantarany toraky marè biby. Nataoni-Jehovah niemotsy tan-kandrini-Goliata teo vato iny. Niravoky ambany eo Goliata, le nimaty. Nilay iaby Filistinina rey. Matoky ani-Jehovah manahaky ani-Davida koa va iha?