Nirahini-Jehovah Hitory Jeremia

Nifily ani-Jeremia Jehovah mba hitory amy ty vahoakini-Joda. Nirahiny ie mba hitory amy vahoaky reo, noho hivola an-drozy mba tsy hanao raha raty sasy. Nivola Jeremia hoe: ‘Ka zaho Jehovah mbo kelikely. Tsy mahay miresaky amin’olo maro aho.’ Le hoy ty asani- Jehovah: ‘Ka matahotsy fa hambarako anao ze raha hovolaninao. Hanampy anao aho.’

Nirahini-Jehovah amy zay Jeremia, ka navoriny ty anti-panahy tamy vahoaky teo, bakeo nipotepotehiny talohan-drozy teo gorogoro tanimanga zay, sady nivola ie hoe: ‘Ho potipotiky manahaky ani-zao Jerosalema.’ Lafa nanao raha nivolanini-Jehovah iny Jeremia, le neloky biby anti-panahy rey. Mpisoro mana anara Pasora zay aza namangovango azy. Nigadrany amy hazo rezay iaby ty tanani-Jeremia noho ty tombony, ka tsy nahafihetsiky ie zisiky maraindray. Lafa nabototsini-Pasora amy zay ie, le nivola hoe: ‘Hieny aho, fa tsy zakako toy. Aleoko tsy mitory sasy.’ Nieny vatany va ie? Aha. Lafa nieritsereti- ni-Jeremia soa raha zay, le nivola ie hoe: ‘Manahaky afo anatiko atoa ty safàni-Jehovah. Tsy maintsy mitory avao aho.’ Tsy nieny Jeremia, fa nivolaniny avao vahoaky rey soa tsy hanao raha raty sasy.

Tao maromaro tafarani-zay, le nanjary mpanjaka ta Joda tao Zedekia. Nihalani-mpisoro noho mpaminany sandoky reo ty raha nitorini-Jeremia. Nivola tamy andriana rey rozy hoe: ‘Tokony hovonoa rahabe tia.’ Nivola amy zay Jeremia hoe: ‘Mamono olo tsy manan-tsiny nareo laha mamono ahy. Safàni-Jehovah ambarako zao, fa tsy raha ty ahy.’ Lafa naharè ani- zay andriana rey, le nivola hoe: ‘Tsy tokony hovonoa avao rahabe tia.’

Mbo nitory avao Jeremia. Neloky biby andriana rey, farany nangataky amy mpanjaka mba hamono ani-Jeremia. Nivola Zedekia hoe: ‘Anovonareo ze teanareo hatao aminy.’ Nisamborin-drozy amy zay Jeremia. Nalatsakin-drozy tanaty vovo laliky biby feno fotaky zay tao ie soa ho maty. Nilentiky tsikelitsikely tanaty fotaky ao Jeremia.

Nandeha amy mpanjaka any tandapa raiky mana anara Ebeda-meleka zay, le nivola hoe: ‘Natorakini-andriana rey anaty vovo any Jeremia! Ho maty ie laha engà ao.’ Nivolanini-Zedekia amy zay Ebeda-meleka mba handay lahilahy 30 hampiboaky ani-Jeremia baka anaty vovo ao. Tsy nieny Jeremia, fa nitory avao ndre nanao akory ndre nanao akory. Tsy tokony hanahaky azy koa va tsika?