Tan-davakini-Liona tao Daniela

Nisy lahilahy Medianina zay nanjary mpanjakani-Babylona. Dariosy ty anarany. Hitany hoe niavaky Daniela, ka nataony sefoni-olo manan-kaja marè amy tany iny eo. Nialona azy olo reo ka ta ho namono azy. Hain- drozy fa nivavaky amy Jehovah intelo sanandro Daniela, ka nivola tamy Dariosy rozy hoe: ‘Mpanjaka, tokony hisy lalàna hoe tokony hivavaky aminao raiky avao ty olo iaby. Tokony hatoraky an-davakini-liona any ze tsy manoriky ani-zay.’ Niteani-Dariosy raha zay, farany nataony sonia lalàna iny.

Laha vo naharè ani-lalàna iny Daniela, le nandeha an-tranony any. Nivohany lafonetiny iny, le nandohaliky eo ie sady nivavaky amy Jehovah. Nilitsy an-tranony ao lahilahy be fialona rey, le nahatratsy azy nivavaky. Nilay nana amy Dariosy any rozy, le nivola hoe: ‘Tsy manoriky ty safànao lahy Daniela! Mivavaky amy ty Ndranahariny avao ie, intelo sanandro.’ Tsy teani-Dariosy ho maty Daniela. Nieritseritsy ty fomba hiarovany ani-Daniela avao ie tamy andro iny. Fe ndre ty mpanjaka aza tsy afaky nanova ty lalàna fa vita sonia. Tsy maintsy naniraky olo hanoraky ani-Daniela anaty lavaky feno liona masiaky ao ie.

Tsy niazon-droro Dariosy tamy halin’iny satria niasa loha marè amy Daniela. Lafa niavy ty maraindray, le nilay nana amy lavaky iny any ie, bakeo nikaiky hoe: ‘Daniela! Niaro anao va ty Ndranaharinao?’

Naharè feo amy zay Dariosy. Daniela zay! Namaly ani-Dariosy ie hoe: ‘Nisy anjelini-Jehovah nampihily vavani-liona reo, ka tsy nahoan-drozy aho.’ Hafalean-draha Dariosy! Naniraky olo hangalaky ani-Daniela baka anaty lavaky ao ie. Tsy nisy rangotsy amy Daniela eny ndre raiky. Nandidy amy zay mpanjaka iny hoe: ‘Atoraho an-davaky ao azy lahilahy nanasisỳ ani-Daniela rey.’ Lafa natoraky ao lahilahy rey, le niromidromitini- liona rey.

Zao ty hafatsy nivolanini-Dariosy amy vahoakiny rey: ‘Tsy maintsy atahoranareo ty Ndranaharini-Daniela. Ie ro nanavotsy ani-Daniela tsy ho azoni-liona rey.’

Mivavaky amy Jehovah sanandro va iha, manahaky ani-Daniela?