Namangy ani-Maria Gabriela

Longoni-Elizabeta somonjara mana anara Maria zay. Nipetraky ta Nazareta a Galilia any ie. Fa ho valini-Josefa, azy mpandrafitsy iny Maria. Lafa nibevoka enim-bola Elizabeta, le niseho tamy Maria ty anjely Gabriela, ka nivola taminy hoe: ‘Akory Maria. Nameani- Jehovah voninahitsy bevata iha.’ Tsy azoni-Maria ty raha nivolaniny, farany nivola Gabriela hoe: ‘Ho bevoka iha ka hiteraky anakilahy, le hataonao hoe Jesosy ty anarany. Ho Mpanjaka ie, le haharitsy zisiky farany ty Fanjakàny.’

Nivola Maria hoe: ‘Ka zaho virjiny toy hanan’anaky?’ Le hoy Gabriela: ‘Haini-Jehovah kila raha iaby. Ho avy aminao ty fanahy masy, ka hahazo anakilahy iha. Fa bevoka koa Elizabeta longonao.’ Nivola amy zay Maria hoe: ‘Mpanompovavini-Jehovah aho. Loniky lahy ho tanteraky amiko raha nivolaninao zay.’

Nandeha amy tanà anatini-vohitsy zay any Maria mba hamangy ani-Elizabeta. Laha vo niarahaba azy Maria, le nihetsiky ajà an-kiboni- Elizabeta ao iny. Nifeno fanahy masy Elizabeta, ka nivola hoe: ‘Nitahini-Jehovah lahy iha Maria. Voninahitsy ho ahy toy, satria nilitsy an-tranoko atoa renini-Tompoko iny.’ Le hoy Maria: ‘Midera ani-Jehovah amy ty foko iaby aho.’ Nijano tamy Elizabeta tany avao Maria tanatini-telo vola, le bakeo ie noly ta Nazareta any.

Lafa nihaini-Josefa hoe bevoka Maria, le ta ho nisaraky aminy ie. Fe nisy anjely niseho taminy tamy nofy, le nivola hoe: ‘Ka matahotsy hanambaly ani-Maria, fa tsy nanao raty ie.’ Nalani-Josefa valy amy zay Maria, le nandesiny an-tranony any.