Lasa Mesia Jesosy

Fa nivolanini-Jaona avao hoe: ‘Mbo ho avy azy bevata mandilatsy ahy iny.’ Nandeha tamy Vavaranoni-Jordana ta Galilia any Jesosy tamin’ie 30 tao teo ho eo. Nanao batisa tao Jaona. Ta hatao batisa koa Jesosy, fe hoy Jaona: ‘Aia, iha tokony hanao batisa ahy koa zao ro hataoko batisa!’ Le hoy Jesosy: ‘Ka zay ty teani-Jehovah.’ Nijobo tan-drano ao amy zay rozy, le nalentikini-Jaona tanatini-rano ao Jesosy.

Laha vo niboaky baka anatini-rano iny ao Jesosy, le nivavaky. Tonga de nisokatsy ty lanitsy, le nijotso ataho pizon io tanaboni-Jesosy teo ty fanahi-Ndranahary. Bakeo nivola baka an-danitsy any Jehovah hoe: “Iha ro Anako teako, iha ro ekeko.”

Lasa Kristy, na Mesia Jesosy lafa nilatsahani-fanahy masini- Jehovah. Hanomboky ani-asa nanirahani-Jehovah azy an-tany etoy iny amy zay ie.

Avy le nandeha tan-diomonto any Jesosy laha vo vita batisa, ka nijano tany 40 andro. Nana amy Jaona any ie lafa nimpoly. Nivola ho zao Jaona lafa namonjy azy Jesosy: ‘Iny Anak’aondri-Ndranahary hanafaky ty fahotani-zao tontolo zao iny.’ Lafa niresaky ani-zay Jaona le nihain’olo hoe Jesosy ro Mesia. Hainao va hoe ino ty niseho lafa tan-diomonto any Jesosy? Ndao hohenteantsika zay.