Nandeha Anabo Rano eny Jesosy

Nahay nitaha olo marary Jesosy sady nahavita namelo olo fa nimaty. Tsy vitani-zay fa mbo nahay nikomandy tsioky noho ora koa ie. Lafa baka nivavaky tanabo vohitsy eny Jesosy, le nihitany bakeny hoe misy tsioky marè biby ty amy Riakini-Galilia eny. Nialy ay amin’io apostoliny rey, mivè any botrin-drozy iny. Nijotso Jesosy, bakeo nandeha anabo rano eny, namonjy ani-botry iny. Lafa nahita olo nandeha anabo rano eny apostoly rey, le natahotsy. Fe nivola Jesosy hoe: ‘Ka matahotsy fa zaho avao toy.’

Nivola Petera hoe: ‘Laha iha vatany io Tompo, le ampandehano aminao eny aho.’ Nivola Jesosy hoe: ‘Avia bakao moa.’ Mbo marè biby avao amin’io tsioky iny, fe niala baka anaty botry ao Petera, le nandeha amy Jesosy eny. Lafa narìny ani-Jesosy eny Petera, le nanenty ani-tsioky be iny, farany natahotsy. Hitany amy zay hoe nihanilentiky anaty rano ao ie. Nikaiky marè Petera hoe: ‘Tompo, vonjeo aho!’ Nisamborini-Jesosy tanany iny, sady nivola ie hoe: ‘Nanino koa iha nisalasala toy? Tsy ampy finoa?’

Lafa niakatsy amy botry iny Jesosy noho Petera, le tonga de nijano tsioky be iny. Nanao akory hoasanao apostoly rey? Nivola rozy hoe: “Anaki-Ndranahary vatany iha.”

Tsy tamy zay avao Jesosy ro nanao raha manahaky ani-zay. Ndraiky andro, ohatsy, niampita riaky iny Jesosy noho apostoliny rey. Nandeha niroro afarani-botry iny eny Jesosy. Lafa niazon-droro ie, le nisy tsioky be. Nipaipaiky amy botry iny lozoky rey, le nifeno rano ty anatini-botry iny ao. Namoha ani-Jesosy apostoly rey, sady nikorakoraky hoe: ‘Mpampianatsy e! Ho maty tsika androany! Ampeo zahay!’ Nifoha amy zay Jesosy le nivolaniny riaky iny hoe: “Mantsintsiny!” Tonga de nieny tsioky iny sady tsy nihetsiky riaky iny. Le hoy Jesosy tamy apostoliny rey: ‘Fa tsy ampy finoa koa nareo toy?’ Nifampiresaky rozy hoe: “Maneky azy iaby ndre ty tsioky noho ty riaky.” Nihaini-apostoly rey amy zay hoe laha natoky ani-Jesosy vatany rozy, le tsy nisy raha natahoran-drozy.