Nisambory Jesosy

Nandeha mbamy Sakasakani-Kidrona mbeo Jesosy miaraky amy apostoly rey, le niavy amy Vohitsy Oliva teo. Fa lisatsy ty sasakaly, fe nifeno soa vola iny. Lafa niavy amy zaridaini-Getsemane ao rozy, le nivola Jesosy hoe: “Mijanòna etoa le ka miroro.” Nandeha kelikely tanaty zariday tao Jesosy bakeo nandohaliky. Nalahelo biby ie, fe nivavaky tamy Jehovah hoe: ‘Ndao fa hatao ty sitraponao.’ Bakeo nandefa anjely Jehovah mba hampahery ani-Jesosy. Lafa nimpoly tamy apostoly rey teo Jesosy, le hitany fa niroro ty telo amin-drozy. Hoy ty asany: ‘Mifohaza! Tsy fotoa tokony hiroroanareo zao! Fa avy ty fotoa hanomeza ahy an-tanani-fahavaloko rey eo.’

Niavy bakany amy zay Jodasy, niaraky amin’olo maro manday sabatsy noho bodan-kazo. Fa nihainy avao hoe aia Jesosy satria fa mpandeha amy zariday io any matetiky rozy. Nivola tamy maramila rey Jodasy fa hatorony an-drozy hoe azy aia iny Jesosy io. Namonjy ani-Jesosy amy zay ie, sady nivola hoe: ‘Akory Mpampianatsy’, le norofany Jesosy. Nivola Jesosy hoe: ‘Jodasy e, oroky ty amadihanao ahy?’

Namonjy ani-vahoaky rey Jesosy sady nanontany hoe: “Ia ilanareo ’o?” Namaly rozy hoe: “Jesosy baka a Nazareta.” Le namaly ie hoe: “Zaho zay.” Nihemotsy malaky lahilahy rey farany nilavo. Nanontany ani-vahoaky rey ndraiky Jesosy hoe: “Ia ilanareo ’o?” Nivola ndraiky rozy hoe: “Jesosy baka a Nazareta.” Namaly Jesosy hoe: ‘Ka fa nivola aminareo aho hoe zaho olo zao. Engaho lahilahy retoa handeha.’

Lafa niazoni-Petera amy zay hoe ino ty raha niseho, le natsoakiny sabatsiny iny bakeo nitampahiny ty sofini-Malko mpanomponi-mpisorobe. Fe nitsapàni-Jesosy sofini-lahilahy iny le nijanga. Nivolanini-Jesosy Petera hoe: ‘Ampiliro any sabatsinao ty. Laha mialy amy sabatsy iha, le hovonoa amy sabatsy.’ Nisamborini-maramila rey Jesosy bakeo nirohizan-drozy ty tanany. Fa apostoly rey nilay. Nandesin’olo rey amy Anasy sefoni-mpisoro any Jesosy lafa bakeo. Nametrahani-Anasy fanontanea Jesosy, bakeo nalefany an-tranoni-Kaiafa Mpisorobe any. Ka nanao akory apostoly rey?