Nahita Fahità Jaona

Nigadrà ta Patmo tany apostoly Jaona. Nisy fahità 16 natoroni-Jesosy azy tamin’ie tany. Samby mikasiky ty hoavy iaby raha reo. Atoroni-fahità reo hoe akory ty hanamasina ty anarani-Jehovah, ty hiaviani-Fanjakàny, noho ty hanaova ty sitrapony an-tany etoy manahaky ty an-danitsy any.

Tamy voalohany Jaona, le nahita ani-Jehovah nipetraky tamy sezi-mpanjakàny be voninahitsy an-danitsy any. Nisy anti-panahy 24 nanodidy azy eo. Nanao akanjo foty rozy, le nisatroky satroboninahitsy volamena. Nisy helatsy noho hotroky baka amy sezi-mpanjakà iny eo. Niankohoky alohani-Jehovah eo anti-panahy 24 rey sady nivavaky taminy. Nahita fahità hafa koa Jaona. Nisy vahoaky be baka amy firenena noho foko voho fivolana iaby nanompo ani-Jehovah. Jesosy, azy Anak’aondry iny ro niaraky an-drozy noho nanome an-drozy ranon’ay. Mbo nahita fahità hafa ndraiky Jaona tafarani-zay. Nihitany fa lasa Mpanjaka an-danitsy any Jesosy, miaraky amy anti-panahy 24 rey. Tamy fahità hafa koa Jaona, le nahita ani-Jesosy nialy tamy Satana, azy dragona iny noho ty demoniany. Niroasini-Jesosy baka an-danitsy any rozy, le natorakiny an-tany etoy.

Bakeo Jaona nahita ani-Anak’aondry iny noho 144 000 rey nitsanga tamy Vohitsy Ziona teo. Nahita anjely koa ie. Nitily nanodidy ani-tany toy anjely io sady nivola amin’olo hoe: ‘Matahora a Ndranahary, le ameo voninahitsy ie.’

Nahita fahità hafa koa ie. Tsy ino zay fa ty aly Hara-magedona. Resini-Jesosy noho ty maramilany ty tontolo ratini-Satana. Nihitany tamy fahità farany amy zay hoe milamy soa ty lanitsy noho ty tany. Fa ripaky Satana noho ty taranakiny ka tsy eo sasy. Tsy misy tsy manamasy ty anarani-Jehovah, ndre an-danitsy any ndre an-tany etoy fa mivavaky aminy iaby.