Ampianaro Fahamarina ty Olo

Hisy karazam-pitoria modely vaovao amy Kahiem-pivoria amy Fiaina Noho Fanompoa manomboky amy Septambra. Ty hanambara fahamarina fototsy raiky baka amy Baiboly ao ro kendrèntsika amy raha io. Hametraky fanontanea tsika, le hamaky andinin-teny raiky.

Laha kinto olo iny, le afaky ameantsika boky noho gazety na atorontsika video baka amy jw.org. Tsy ho lininy amy zay ty hiaviantsika any ndraiky. Tokony hiezaky himpoly any tsika andro vitsivitsy afarani-zay mba hanohiza ani-resaky iny. Hifototsy amy famintina hitantsika amy boky Ino ty Azonao Ianara amy Baiboly Ao? ty anjarani-mpianatsy noho ty fitoria modely vaovao. Baiboly avao ro hampiasàntsika amin’io. Hanampy antsika hanao fimpolia mitsidiky na hitariky fampianara Baiboly famintina io satria misy fanontanea noho andinin-teny fanampiny.

Raiky avao ty lala mana amy fiaina any. (Mt 7:13, 14) Fe olo sankarazany noho samby mana ty fivavahany ro iresahantsika, ka mila ataontsika maninto ty kiraidraiky amin-drozy ty fahamarina. (1Ti 2:4) Lafa mihamahay miresaky foto-kevitsy sankarazany baka amy Baiboly tsika sady mahay “manazava ty safà-Ndranahary amy fomba marina soa”, le ho falifaly sady hahita vokatsy lafa mampianatsy ty fahamarina.—2 Ti 2:15.