Mampiseho Fitiava Tsika Lafa Manoha ty Fananarani-Jehovah

Miaro ty fiangona ty fandroaha sady anatsy ho ani-mpanao raty tsy mibebaky rey. (1Ko 5:6, 11) Mampiseho fitiava tsika laha manoha ty fananara baka amy Jehovah manahaky an’io. Ka akory ty maha fitiava azy kanefa fandroaha io maharary ani-ze voakasikiny, anatini-zay ty longony marìny noho ty komitim-pitsarà?

Voalohany aloha, miaro ty lazani-Jehovah tsika sady tea ty fitsipikiny mikasiky fahamasina. (1Pe 1:14-16) Asehontsika koa hoe teantsika azy voaroaky iny. Marina fa maharary ty fananara, fe “manday vokatsy hiadana raha io”, tsy ino zay fa ty fahamarina. (He 12:5, 6, 11) Tsy maneky ty fananarani-Jehovah tsika laha mbo mifandramby amin’olo voaroaky na niala an-tsitrapo. Tiarovo fa lafa mananatsy ty vahoakiny Jehovah, le ataony “antonony” raha zay. (Je 30:11) Mitamà tsika fa mbo himpoly amy Babantsika mpanenga hadisoa iny olo voaroaky iny. Fe zisiky himpoliany, le tokony hanoha ty fananarani-Jehovah avao tsika, sady hanao raha hahavy antsika hifandramby soa aminy.—Is 1:16-18; 55:7.

HENTEO TY VIDEO HOE KA MIVALIKY FA MANOMPOA AMY TY FONAO IABY, BAKEO VALEO FANONTANEA RETOA:

• 

  Ino ty raha tsapani-baba noho reny kristiana lafa miala amy Jehovah ty anakiny?

• 

  Ino ty azon’olo amy fiangona eo atao mba hampahereza ani-fianakavia tsy mivaliky rey?

• 

  Ino ty tantara amy Baiboly ao mampiseho hoe ty tsy fivaliha amy Jehovah ro tokony ho vatan-draha marè tany ty tsy fivaliha amy fianakavia?

• 

  Akory ty hampisehoantsika hoe ty tsy fivalihantsika amy Jehovah ro tena anabo mandilatsy ty tsy fivalihantsika amy fianakavia?