Arovo ty Tokantranonao

Tena vatan-draha amy Jehovah ty voadim-panambalea sady tsy teany hisaraky mihintsy ty mpivaly. (Mt 19:5, 6) Maro ty vahoakini-Jehovah mana tokantrano sambatsy henanizao. Fe tsy misy fanambalea lavorary zao, ka misy avao ty problemo. Fe ndre eo zay, le tsy hanao manahaky ty fataon’olo henanizao reo tsika ka hoe ho tezitsy na hisaraky. Ino ty azoni-Kristiana atao mba hiarova ty tokantranon-drozy?

Eritsereto raha limy bevata retoa:

1. Arovo ty fonao ka halaviro ty raha haharava ty tokantranonao. Ohatsy hoe fankadalàna olo tsy valinao noho fialam-boly misy fandaisam-bata raty.—Mt 5:28; 2Pe 2:14.

2. Hasoavo ty fifandrambesanao amy Ndranahary, le miezaha hanao raha mampifalifaly azy.—Sl 97:10.

3. Isikino avao ty toetsy vaovao, le miezaha ho soa fanahy ndre amy raha kelikely. Hanampy ty valinao hahatiaro sambatsy raha zay.—Kl 3:8-10, 12-14.

4. Hajao avao ty valinao, le miezaha hifampiresaky soa.—Kl 4:6.

5. Anovo ty adidy amy valinao. Manaova soa fanahy lafa manao ani-raha zay sady anovo vokatsini-fo.—1Ko 7:3, 4; 10:24.

Laha manaja ty fanambalea ty Kristiana, le hanome voninahitsy ani-Jehovah, azy Namoro ty fanambalea iny.

HENTEO TY VIDEO HOE TSY MAINTSY ‘MILAY AMIM-PAHARETA’ TSIKA: HAJAO TY FITSIPIKY AMY KORSA INY, BAKEO VALEO FANONTANEA RETOA:

• 

  Ino ty raha sarotsy mety hiseho ndre milamy tse ty fanambalea amy voalohany?

• 

  Ino ty torolalani-Baiboly afaky manampy ani-ze mahatsapa hoe tsy de mifankatea rozy morovaly?

• 

  Ino ty fitsipiky napetrakini-Jehovah mikasiky fanambalea?

• Samby tokony hanao ino ty mpivaly laha ta hana tokantrano sambatsy?