TY FIAINANTSIKA KRISTIANA
Afaky Mampiseho Fitiava Tsika Saky Fivoriambeni-Vondrom-paritsy
Tena falifaly tsika saky fivoriambeni-vondrom-paritsy. Ino ty antony? Manahaky tamy androni-Israely, le manampy antsika fivoriambe rey mba hanompo ani-Jehovah miaraky amy rahalahy noho anabavintsika reo. Teantsika iaby ze raha rentsika any satria manampy antsika hihariniky ani-Jehovah. Tsy fointsika koa ty fiaraha amy nama noho fianakavia any. Zay mahavy antsika ta hanatriky ani-fivoriambe rey, anatini-telo andro mihintsy.
Tombotsoa ho antsika ty hoe miaraky manao fivoriambe, ka soa tsika laha tsy mifantoky amy ze hahasoa antsika avao. Tokony hohenteantsika koa hoe akory ty hampisehoantsika fitiava amin’olo hafa. (Ga 6:10; He 10:24, 25) Mieritseritsy ze hahasoa an-drozy tsika laha tsy manao kirava lala lafa mivoha vavahady iny, le ze pilasy ilàntsika avao ro tanjahintsika. (Fi 2:3, 4) Manampy antsika hahazo nama vaovao koa fivoriambe rey. Azontsika atao raha kendrè zany ty hiresaky amy ze olo mbo tsy zatsy antsika, na alohani-fandahara zay na afarany, na amy fijanona midy rey. (2Ko 6:13) Mety ho lasa namantsika zisiky farany mihintsy olo rey! Fa ty vatan-draha marè, lafa hitan’olo hoe mifankatea tsika, le mety hanapa-kevitsy hiaraky amintsika hanompo ani-Jehovah koa rozy.—Jn 13:35.
HENTEO TY VIDEO HOE FIVORIAMBE IRAISAM-PIRENENA: “TSY HO RAVA MIHINTSY TY FITIAVA”!, BAKEO VALEO FANONTANEA RETOA:
Ino ty raha natao tamy solontena niavy tamy fivoriambe iraisam-pirenena tamy 2019 rey ka mampiseho hoe nampisehoa fitiava rozy?
Manino ro tena miavaky ty fifankatiavani-mpanomponi-Jehovah noho ty fiharoan-drozy?
Karaza fitiava manao akory ty nihazavanini-rahalahy anatini-Filan-kevi-pitantana rey?
Ino koa ty azonao atao mba hampisehoa fitiava lafa fivoriambe?
Nanino ty fitiava ro nampiharo ty rahalahy noho anabavintsika tan’Alemaigny noho ta Korea Antimo any?
Tokony ho tapa-kevitsy hanao ino tsika?