Hanao Mpisava Lala

Mampiasa soa ty herintsika tsika laha mana raha kendrè amy fanompoa ani-Jehovah. (1Ko 9:26) Mahay mampiasa soa ty fotoantsika tsika amy zay, alohani-handravà ani-tontolo toy. (Ef 5:15, 16) Mba azonareo dinihy amy fotoam-pivavahani-fianakavianareo va hoe ino ty raha kendrènareo amy taom-panompoa ho avy tia? Misy lahatsoratsy maromaro afaky manampy anareo amy kahiem-pivoria toy ato. Resahiny ao ty raha kendrè sisany azonareo eritserety noho atao am-bavaky.​—Jk 1:5.

Afaky mifanampy va, ohatsy, nareo trano raiky, soa ho afaky hanao mpisava lala maharitsy ndre ty raiky aminareo avao? Laha tsy azonao antoky hoe ho tratsinao ty lera takỳ, le miresaha amy mpisava lala mitovitovy pilasy aminao. (Oh 15:22) Mety afaky manadihady mpisava lala mihintsy aza nareo lafa manao fotoam-pivavahani-fianakavia. Bakeo sorato ze fandaharam-potoa azo atao. Laha fa nimpisava lala iha taloha, le diniho hoe fa afaky ndraiky va iha henanizao.

Misy aminareo va afaky manao mpisava lala mpanampy anatini-vola raiky na maromaro? Laha tsy de matanjaky loatsy iha, le mety hahavita hanao mpisava lala mpanampy laha manoka fotoa kelikely sanandro mba hanompoa. Laha tsy afaky manompo andavanandro iha satria miasa na mianatsy, le filio ty vola misy vakansy na misy farani-herinandro limy. Sorato amy kalandrie hoe ombia ty hanaovanao mpisava lala mpanampy, le manamboara fandaharam-potoa.​—Oh 21:5.

HENTEO TY VIDEO HOE MANÀNA FAHASAKIA IHA ... LAHA MPISAVA LALA, BAKEO VALEO FANONTANEA TOY:

• Manino ty tantarani-Ranabavy Aamand ro ahitantsika hoe tea noho mikarakara ani-mpisava lala mahafoy tena ho azy reo Jehovah?