Teantsika Biby Jehovah Babantsika

1-2. Manino tsika ro nengani-Jehovah ho afaky militsy anatini-fianakaviany, le amy fomba akory ty nanaovany ani-zay?

NANASA antsika ho mpanompony Jehovah, ka nanjary fianakavia raiky tsika. Hasoan-draha lahy zay! Anatini-fianakavia io ze olo iaby nanoka ty vatany ho a Ndranahary sady mino ty soro nataoni-Anakilahiny iny. Falifaly avao ze anatini-fianakavia io. Misy raha kendrè ty fiainantsika, sady mitamà ho velo tsy misy farany an-danitsy any na amy Paradisa an-tany etoy tsika.

² Fitiava ro nahavy ani-Jehovah nanenga antsika ho afaky militsy anatini-fianakaviany. Nahafoy raha lafovily ie mba hanaova ani-zay. (Jaona 3:16) ‘Niviliny’ tsika. (1 Kor. 6:20) Nanome vilim-panavota Jehovah mba ho afaky mifandramby soa aminy tsika. Lasa afaky mikaiky azy hoe Baba tsika. Voninahitsy ho antsika raha zay, satria ie ro Farani-Anabo amy kila raha iaby zao. Sady nihitantsika tamy lahatsoratsy taloha teo iny hoe Jehovah ro Baba farani-ze soa.

3. Ino iaby ty fanontanea mety ho avy an-tsaintsika ao? (Henteo ty efajoro hoe “Mba Manenty Ahy Avao va Jehovah?”)

³ Mety hieritseritsy manahaky ani-mpanoratsy Baiboly raiky zay tsika hoe: “Ino ty havaliko ani-Jehovah amy ty raha soa iaby nataony tamiko?” (Sal. 116:12) Tsy ho voavalintsika mihintsy aloha ty fitiava nasehoni-Babantsika iny antsika. Fe manosiky antsika raha zay mba ho tea azy koa. Ho zao ty nisoratini-apostoly Jaona: “Tsika tea, satria ie ro nitea antsika voalohany.” (1 Jaona 4:19) Ino iaby ty azontsika atao mba hampisehoa amy Babantsika an-danitsy any iny hoe tea azy tsika?

MIEZAHA HIFANDRAMBY MARÌNY AMY JEHOVAH AVAO

4. Manino tsika ro tokony hiezaky hifandramby marìny amy Jehovah avao, laha hentea ty Jakoba 4:8?

⁴ Teani-Jehovah hihamarìny azy tsika sady teany hifampiresaky aminy. (Vakio Jakoba 4:8.) Mampirisiky antsika ‘haharitsy hivavaky’ ie sady tozoro parè hijanjy avao. (Rom. 12:12) Tsy mahavozaky azy na mahatery ty fotoany ty mijanjy antsika. Mijanjy azy amy zay tsika lafa mamaky Baiboly, le eo koa ty boky noho gazety manampy antsika hahazo ty Safàny. Afaky mijanjy ani-Jehovah koa tsika laha mifantoky soa lafa am-pivoria atoy. Hifandramby soa ty mpianaky laha mifampiresaky. Hihamarìny ani-Jehovah koa tsika laha mifampiresaky aminy tsy tampaky.

5. Ino ty azontsika atao mba hanasoava ty vavaky ataontsika?

⁵ Eritsereto hoe manao akory ty fifampiresahanao amy Ndranahary. Teani-Jehovah laha aboakintsika aminy amy vavaky ze raha am-pontsika ao. (Sal. 62:8) Azontsika atao ty mieritseritsy hoe: ‘Baka am-po va ty vavaky ataoko, sahala amy taratasy nisoratiko tana? Sa atao raha mampimpoly resaky avao aho?’ Azo antoky fa tena tea ani-Jehovah iha ka teanao hihamatanjaky ty fifandrambesanao aminy. Mila miresaky aminy tsy tampaky iha mba hahavitanao ani-zay. Volano aminy ze tena tsapanao anatinao ao. Ambarao azy ze raha mahafalifaly anao noho ze mampalahelo anao. Matokisa fa afaky mangataky fanampea aminy iha.

6. Mila manao ino tsika mba hifandramby soa amy Babantsika an-danitsy any iny avao?

⁶ Laha teantsika ty hifandramby soa amy Babantsika an-danitsy any iny, le mila mahay misaotsy azy tsika. Mitovy hevitsy amy mpanao salamo iny tsika. Hoy ty asany: “Mba maro lahy Jehovah Ndranahariko ty raha nataonao, eka, maro ty raha mahatseriky nataonao noho teanao hatao ho anay. Tsy misy azo ampitovizy aminao. Ndre ta hivola noho hanambara ani-rey aho, le maro marè raha rey ka tsy ho voatantarako!” (Sal. 40:5) Misaotsy ani-Jehovah am-pontsika ao tsika. Fe tsy zay avao, fa aboakintsika amy ty safàntsika noho ty raha ataontsika koa raha zay. Miavaky amin’olo maro amy tontolo toy eto tsika. Tsy mahay mankasitraky a Ndranahary rozy ndre eo ty raha maro ataony. Tafilitsy amy famantara ani-“andro farany” iainantsika toy aza ty hoe tsy mahay misaotsy ty olo. (2 Tim. 3:1, 2) Tsy teantsika mihintsy ty hanahaky ani-zay!

7. Ino ty teani-Jehovah hataontsika, le ino ty antony?

⁷ Teani-baba noho reny ho mpinama ty anakiny fa tsy hialialy. Manahaky ani-zay koa Jehovah. Teany hifanaraky soa iaby ty anakiny. Lafa mifankatea tsika le zay ro ahaiza hoe Kristiana vatany tsika. (Jaona 13:35) Marina vatany safàni-mpanao salamo iny hoe: “Soa sady mahafalifaly lafa miharo petraky noho miharo raiky ty mpirahalahy!” (Sal. 133:1) Atorontsika ani-Jehovah hoe tea azy tsika lafa tea ty rahalahy noho anabavintsika. (1 Jaona 4:20) ‘Soa fanahy noho miferinay ty namany’ rahalahy noho anabavintsika reo, ka falifaly biby tsika fa anatini-fianakavia raiky!—Efes. 4:32.

TEA AZY IHA LAHA MANORIKY TY SAFÀNY

8. Ino ty antony bevata marè anorihantsika ty safàni-Jehovah, laha hentea ty 1 Jaona 5:3?

⁸ Teani-Jehovah hanoriky ty safàni-baba amy reniny ty ajà. Teany koa tsika laha manoriky ty safàny. (Efes. 6:1) Mpamoro noho Mpamelo antsika ie, sady hendry mandilatsy ty baba noho reny iaby, ka maeva orihintsika ty safàny. Fe ty antony bevata marè mahavy antsika hanoriky ty safàni-Jehovah, le satria tea azy tsika. (Vakio 1 Jaona 5:3.) Maro ty antony tokony hanorihantsika ty safàni-Jehovah. Fe tsy manao forosè antsika hanao ani-zay ie, fa engàny hifily malalaky tsika. Falifaly Jehovah laha mifily hanoriky ty safàny tsika satria tea azy.

9-10. Manino tsika ro mila mahay ty fitsipiki-Ndranahary noho manoriky ani-zay?

⁹ Teani-baba noho reny ho voaaro ty anakin-drozy ka ametrahany fitsipiky mba hahasoa an-drozy. Lafa manaraky ani-toromariky rey ty anakin-drozy, le hita hoe matoky noho manaja ty baba noho renin-drozy. Fe toy misy raha bevata mandilatsy ani-zay. Mila mahay ty fitsipiky napetrakini-Babantsika an-danitsy any iny koa tsika, le manoriky ani-zay. Zay ty fomba ampisehoantsika amy Jehovah hoe tea noho manaja azy tsika. Sady mahasoa antsika raha zay. (Isa. 48:17, 18) Mifanohitsy amy zay fa laha tsy manoriky ty fitsipikini-Jehovah tsika, le tsika avao ro ho sahira.—Gal. 6:7, 8.

¹⁰ Laha mana fomba fiaina mampifaly ani-Jehovah tsika, le ho voaaro amy ze raha mety hanimba ty vatantsika, ty fihetseham-pontsika, noho ty fifandrambesantsika amy Jehovah. Haini-Jehovah ze tena hahasoa antsika. Ho zao ty nivolanini-Aurora, baka a Etazonia any: “Lafa manoriky ty safàni-Jehovah tsika, le tsy maintsy ho soa ty fiainantsika.” Ndre tsika koa mahatsapa ani-zay. Ino ty soa niazonao lafa iha nanoriky ty tari-dala feno fitiava baka amy Jehovah?

11. Manampy antsika hanao ino ty vavaky?

¹¹ Manampy antsika hanoriky safà ty vavaky, ndre tsy mora aza ty manao ani-zay. Mety ho sarotsy amintsika kindraiky ty manoriky ty safàni-Jehovah, fe mila toherintsika avao ty faniria hanota. Nisoloho amy Ndranahary mpanao salamo zay hoe: “Ampeo aho mba haniry hanoriky ty safànao.” (Sal. 51:12) Nivola ho zao Denise, mpisava lala maharitsy: “Lafa tsy mora amiko ty manoriky ty didini-Jehovah, le mangataky hery aminy aho mba hahavitako manao raha soa.” Afaky matoky tsika fa valeani-Jehovah avao ty vavaky manahaky ani-zay.—Lioka 11:9-13.

AMPEO HO TEA ANI-BABANTSIKA INY TY OLO

12. Ino ty tokony hataontsika laha hentea ty Efesianina 5:1?

¹² Vakio Efesianina 5:1. ‘Anaky teani-Jehovah’ tsika ka manao ze azontsika atao mba hanahafa azy. Manahaky azy tsika lafa tea olo, soa fanahy noho manenga ty hadisoani-hafa. Lafa mahita ty fandaisam-bata soa ananantsika ty olo tsy mahay a Ndranahary, le mety haniry hahay azy. (1 Pet. 2:12) Tokony hiezaky hanahaky ani-Jehovah ty baba noho reny amy fomba itezany ty anakiny. Laha manao ani-zay rozy, le mety haniry hinama amy Babantsika be fitiava iny ty anakiny.

13. Ino ty hanampy antsika hahasaky?

¹³ Mirehareha mikasiky ani-babany ty ajà sady teany ty miresaky mikasiky azy. Manahaky ani-zay koa tsika. Mirehareha mikasiky ani-Jehovah, azy Babantsika an-danitsy any iny tsika, sady teantsika hahay azy ty olo. Tsapantsika am-pontsika ao koa raha nivolanini-Davida Mpanjaka iny hoe: “Jehovah ro ho reharehako.” (Sal. 34:2) Ka manao akory laha mahamenatsy antsika ty hiresaky mikasiky ani-Jehovah? Ino ty hanampy antsika hahasaky? Vomaiky tsika hahasaky laha tiarovintsika avao hoe tena hampifalifaly ani-Jehovah tsika sady tena hanampy olo hahay azy. Hanome antsika ty herim-po ilàntsika Jehovah. Nampeany hana fahasakia rahalahintsika tamy taonjato voalohany rey, ka azo antoky fa hampeany koa tsika.—1 Tes. 2:2.

14. Manino ro tena ilà ty manao mpianatsy?

¹⁴ Tsy manavakavaky Jehovah ka falifaly ie lafa mahita antsika mampiseho fitiava amy ty hafa, ndre ino ndre ino ty fiaviany noho ty raha iainany. (Asa. 10:34, 35) Ty fitoria ty vaovao soa ro fomba farani-ze soa ampisehoantsika hoe tea olo tsika. (Mat. 28:19, 20) Ino ty vokany? Afaky manasoa ty fiainany ze mijanjy antsika sady mitamà fiaina zisiky farany amy hoavy.—1 Tim. 4:16.

HO FALIFALY IHA LAHA TEA ANI-BABANTSIKA INY

15-16. Ino iaby ty antony mahafalifaly antsika?

¹⁵ Baba be fitiava Jehovah ka teany ho falifaly ty fianakaviany. (Isa. 65:14) Maro ty antony mahafalifaly antsika, ndre miatriky raha sarotsy aza tsika henanizao. Haintsika, ohatsy, hoe tea antsika biby Babantsika an-danitsy any iny. Azontsika soa ty raha volanini-Safà-Ndranahary. (Jer. 15:16) Falifaly koa tsika fa anatini-fianakavia raiky tea ani-Jehovah noho ty fitsipikiny sady mifankatea.—Sal. 106:4, 5.

¹⁶ Falifaly avao tsika satria mitamà hoe ho soa biby ty fiaina amy hoavy. Haintsika hoe hanafaky ty raha raty iaby Jehovah tsy ho ela, sady hampiasa ty Fanjakàny mba hanova ani-tany toy ho Paradisa ndraiky. Mbo misy raha miavaky tamanintsika koa. Hovelomy ndraiky ty longontsika fa nimaty, ka ho tafaraky amintsika ndraiky. (Jaona 5:28, 29) Fa tsy hay volany ty hafaleantsika amy zay! Fa ty vatan-draha marè, le matoky tsika fa hidera noho hanome voninahitsy sady hanompo ani-Babantsika iny ty zavaboary iaby, ndre an-danitsy any ndre an-tany etoy, satria maeva ani-zay ie.