Tsy Misy Raha Afaky Manaka ty Olo Marina Tsy Hanompo ani-Jehovah

1-2. Ino ty raha nivolanini-mpanoratsy raiky, le ino ty hodinihintsika amy lahatsoratsy toy ato?

MARO henanizao ty olo mivola hoe mino ani-Jesosy, kanefa tsy manaraky ty raha nampianariny. (2 Tim. 4:3, 4) Nivola mihintsy aza mpanoratsy raiky zay hoe: “Laha ohatsy henanizao nisy olo nitovy amy Jesosy, le nivola raha manahaky ty nivolanini-Jesosy, ... ho nandà azy va tsika, manahaky raha nataon’olo tamy roarivo tao lasa tany? ... Laha hentea ty toetsini-ankamaroan’olo noho ty raha ataon-drozy, le sahala fa mamaly ho zao rozy: Tsy haneky azy tsika.”

² Naharè ani-Jesosy nampianatsy noho nahita azy nanao fahagagà ty ankamaroan’olo tamy taonjato voalohany. Fe tsy nino azy rozy. Ino ty antony? Fa nandiniky antony efatsy nahavy ty olo tsy naneky ty raha nivolanini-Jesosy noho nataony tsika tamy lahatsoratsy taloha teo iny. Fe ndao tsika handiniky antony efatsy hafa koa. Hohenteantsika hoe manino ty olo henanizao ro malay ty mpanori-dia ani-Jesosy, le ino ty azontsika atao mba hahavy antsika tsy hiala amy fanompoa ani-Jehovah.

1) TSY NANAVAKAVAKY JESOSY

3. Ino amy ty raha nataoni-Jesosy ro nahavy ty olo sisany handà azy?

³ Nifandramby tamin’olo sankarazany Jesosy tamin’ie tan-tany etoy. Tsy olo mpanarivo noho nana fahefà avao ro niarahany nihina fa ndre ty mahantra noho sahira koa, sady reo ty tena niarahany matetiky. Ankoatsini-zay, nisoa fanahy tamy azy nataon’olo hoe “mpanota” rey Jesosy. Lafa nahita ani-raha nataoni-Jesosy reo azy nanao ty vatan-drozy ho marina rey, le nandà azy. Nanontanean-drozy mpianatsini-Jesosy rey hoe: “Manino nareo ro miaraky mihina noho mino amy mpamory hetra noho mpanota?” Le namaly Jesosy hoe: “Tsy ty olo salama ro mila dokotera, fa ty olo marary. Tsy avy hikaiky ty marina aho, fa ty mpanota mba hibebaky.”​—Lioka 5:29-32.

4. Laha hentea ty faminaniani-Isaia, ino ty raha tokony fa hampoizini-Jiosy rey mikasiky ty Mesia?

⁴ Ino ty raha volanini-Soratsy Masy? Fa ela biby talohani-hiaviani-Mesia, le nivola Isaia mpaminany hoe tsy hekeni-zao tontolo zao ie. Hoy ty asany: “Tsy nasian’olo dikany ie sady nihatakatahan’olo ... Nivony zahay mba tsy hahita ty tarehiny. Tsy nasian’olo dikany ie ka tsy nahoanay.” (Isaia 53:3) Mivola faminania io hoe ‘hihatakatahan’olo’ ty Mesia, ka tsy tokony ho nahatseriky ani-Jiosy tamy taonjato voalohany rey laha tsy naneky ani-Jesosy ty olo.

5. Manao akory ty fahitan’olo ty mpanori-dia ani-Jesosy?

⁵ Manahaky ani-zay koa va henanizao? Eka. Falifaly ty mpitariky fivavaha laha olo malaza, mpanarivo, na olo hendry amy tontolo toy ro militsy amy ty fivavahan-drozy ao. Amean-drozy tombontsoa manoka mihintsy olo rey. Tsy mampanino an-drozy aza ndre raty fandaisam-bata na mana fiaina tsy mifanaraky amy ty fitsipiki-Ndranahary olo rey. Fe tsy ho zay ty fahitan-drozy ty mpanomponi-Jehovah ndre soa fandaisam-bata aza. Tsy de asian’olo amy tontolo toy dikany ty mpanomponi-Jehovah ka lasa mitovy amy zay koa ty fahitani-mpitariky fivavaha rey an-drozy. Nivola aza Paoly fa ze olo “tsy asian’olo dikany” ro nifilì-Ndranahary. (1 Kor. 1:26-29) Amy Jehovah zany, lafovily iaby lafa atao mpanompony tsy mivaliky.

6. Ino ty raha nivolanini-Jesosy amy Matio 11:25, 26 ao, le akory ty azontsika anahafa azy?

⁶ Ino ty hanampy antsika tsy hiala ani-Jesosy? (Vakio Matio 11:25, 26.) Ka engà hisy vokany aminao ty fomba fahitan’olo ty mpanompo-Ndranahary. Ekeo hoe ze olo miambany avao ro ampiasani-Jehovah mba hanao ty raha teany. (Sal. 138:6) Olo tsy mana fahendrea noho tsy de mahay raha ty fahitani-tontolo toy ty mpanomponi-Jehovah. Fe eritsereto avao hoe manao akory ty raha nivitani-Jehovah lafa nampiasa an-drozy!

2) NALAY FAMPIANARAN-DISO JESOSY

7. Nanino Fariseo rey ro nikaihini-Jesosy hoe mpiatsaravelatsihy, le ino ty nataon-drozy lafa naharè ani-zay?

⁷ Tsy natahotsy mihintsy Jesosy nanambara tamason’olo fa mpiatsaravelatsihy mpitariky fivavaha tamy androny rey. Nivolaniny, ohatsy, fa mpiatsaravelatsihy rozy satria resaky fanasàn-tana ro nitandreman-drozy marè kanefa tsy nahoan-drozy ino ty fikarakarà ty baba noho renin-drozy. (Mat. 15:1-11) Mety nitseriky mpianatsini-Jesosy rey lafa naharè ty raha nivolaniny. Farany rozy nanontany hoe: “Hainao va fa neloky ty Fariseo lafa naharè ani-raha nivolaninao zay?” Namaly Jesosy hoe: “Hombota iaby ze raha mitiry tsy namboleni-Babako an-danitsy any iny. Engao any rozy, fa mpitariky jiky. Ka laha jiky ro mitariky jiky, le samby ho latsaky an-davaky any rozy roe.” (Mat. 15:12-14) Ndre neloky tamy ty raha nivolanini-Jesosy aza mpitariky fivavaha rey, le tsy nengany hisaka azy tsy hivola ty marina raha zay.

8. Akory ty nampisehoani-Jesosy fa tsy ekè-Ndranahary ze kila raha iaby inoani-fivavaha?

⁸ Tsy zay avao fa nambarani-Jesosy hoe maro diso ty raha nampianarini-fivavaha reo. Tsy nivola ie hoe ekè-Ndranahary iaby lafa kila raha ninoani-fivavaha reo. Nanazava aza ie hoe ho maro ty olo handeha amy lala mana amy fandripaha any, le ho vitsivitsy avao ty ho amy lala maifitsy mandeha amy fiaina iny any. (Mat. 7:13, 14) Nihazavaniny soa fa hisy olo hivola hoe manompo a Ndranahary, kanefa tsy manompo azy laha ty marina. Nampitandrina ie hoe: “Miambena soa amy ze mpaminany sandoky avy aminareo eo, satria misalotsy holin’anak’aondry rozy, fe ty anatiny ao amboan’ala mpandrapaky.”​—Mat. 7:15-20.

9. Ino ty sisany amy raha nampianarini-fivavaha ka natoroni-Jesosy fa diso?

⁹ Ino ty raha volanini-Soratsy Masy? Fa nivola ty faminania amy Baiboly ao fa handany ty herini-Mesia ty hafanam-po ho ani-tranoni-Jehovah. (Sal. 69:9; Jaona 2:14-17) Hafanam-po zay ro nahavy ani-Jesosy hampiboaky ty raha diso ampianarini-fivavaha noho ty raha raty fataon-drozy. Nino, ohatsy, Fariseo rey hoe tsy mety maty ty fanahy, zany hoe mbo velo mbanimbany avao olo iny lafa maty. Fe nampianatsy Jesosy fa miroro ty olo maty, zany hoe tsy misy raha tiarony sasy. (Jaona 11:11) Tsy nino ty Sadoseo hoe mbo hovelomy ty maty. Fe nivelomini-Jesosy Lazarosy namany. (Jaona 11:43, 44; Asa. 23:8) Nampianatsy Fariseo rey hoe fa voalahatsi-Ndranahary iaby ze kila raha mahazo antsika na hataontsika, le tsy afaky mifily tsika olombelo. Fe nampianatsy Jesosy hoe afaky mifily ty olo, na hanompo a Ndranahary na tsy hanompo azy.​—Mat. 11:28.

10. Manino ro maro ty olo malay ty raha ampianarintsika?

¹⁰ Manahaky ani-zay koa va henanizao? Eka. Maro ty olo malay antsika satria mampianatsy raha baka amy Baiboly tsika ka mampiseho hoe diso ty raha sisany ampianarini-fivavaha reo. Ampianarini-mpitariky fivavaha ty olo mivavaky aminy ao fa sazì-Ndranahary amy afobe ty olo raty fanahy. Mampiasa ani-fampianaran-diso zay rozy mba hampitahora olo, amy zay ty olo hanoriky ty raha volanin-drozy. Tsy manao ho zay tsika satria mpanomponi-Jehovah, azy Ndranaharini-fitiava iny. Ampeantsika ty olo hahay hoe diso fampianara io. Ampianarini-mpitariky fivavaha koa fa tsy mety maty ty fanahy. Fe atorontsika fa baka amy mpanompo sampy fampianara zay. Laha nimarina fampianaran-drozy io le mbo ino koa moa ilà fameloma ty maty zao. Mampianatsy ty ankamaroani-fivavaha hoe fa nalahatsi-Ndranahary sandrany ze raha iaby ataontsika. Fe ampianarintsika fa mana fahafaha hifily ty olo, na hanompo a Ndranahary na tsy hanompo azy. Ino amy zay ty ataoni-mpitariky fivavaha rey lafa atorontsika fa diso ty raha ampianarin-drozy? Romotsy rozy matetiky!

11. Laha hentea ty raha volanini-Jesosy amy Jaona 8:45-47 ao, ino ty raha tea-Ndranahary hataoni-mpanompony?

¹¹ Ino ty hanampy antsika tsy hiala ani-Jesosy? Laha teantsika ty fahamarina le tokony hino ty raha volani-Ndranahary tsika sady hanoriky ani-raha rey. (Vakio Jaona 8:45-47.) Tsy manahaky ani-Satana Devoly tsika satria mivahatsy amy ty marina avao. Tsy manao raha mifanohitsy amy ty raha inoantsika mihintsy koa tsika. (Jaona 8:44) Tea-Ndranahary laha ‘malay ty raty’ noho ‘mivahatsy amy ty soa’ ty mpanompony, manahaky ty nataoni-Jesosy.​—Rom. 12:9; Heb. 1:9.

3) NISY NANENJIKY JESOSY

12. Manino ty fomba nahafatesani-Jesosy ro nahavy ty ankamaroani-Jiosy tsy hino azy?

¹² Ino koa ty antony hafa nahavy ty Jiosy sisany halay ani-Jesosy? Hoy ty asani-Paoly: “Tsika mitory ani-Kristy voafantsiky tamy hazo fijalea. Mahakamo ani-Jiosy reo raha zay.” (1 Kor. 1:23) Manino ro nahakamo ty ankamaroani-Jiosy ty fomba nahafatesani-Jesosy? Olo raty noho mpanota, hoasan-drozy, Jesosy kanao nimaty tamy hazo fijalea. Farany rozy nandà azy tsy ho Mesia.​—Deot. 21:22, 23.

13. Ino ty raha tsy nidarean’olo nalay ani-Jesosy rey?

¹³ Nihaini-Jiosy nalay ani-Jesosy rey hoe tsy nanan-tsiny ie, nasara raha raty, sady tsy rariny ty raha nahazo azy, fe tsy nahoan-drozy ino raha zay. Ndre mpitsara rey tsy nidary fanaova rariny zao. Nivory tsiela avao, ohatsy, azy tamy Fitsarà Anabo Jiosy tao rey lafa nitsara ani-Jesosy. Ndre ty lalàna mikasiky fitsarà aza tsy nidarean-drozy. (Lioka 22:54; Jaona 18:24) Tsy vitani-hoe tsy nijanjy ani-Jesosy mpitsara rey, fa rozy mihintsy ro “nila vavolombelo diso mba hamonoa azy.” Lafa tsy nahavoa ani-Jesosy raha iny, le nataoni-mpisorobe iny ze hahavy ani-Jesosy hivola raha mifanohitsy amy lalàna. Ho afaky hivola rozy amy zay hoe tena nanao raha tokony hamonoa azy vatany Jesosy. Tena nifanohitsy tanteraky tamy lalàna raha nataon-drozy io. (Mat. 26:59; Mar. 14:55-64) Nimaty Jesosy fe nivelomi-Ndranahary. Fe ino ty nataoni- mpitsara tsy marina reo? Nikaramàn-drozy ty maramila romanina niamby ani-loloni-Jesosy iny soa hampiparitaky vandy hoe nangalarini-mpianatsiny rey ty fatini-Jesosy.​—Mat. 28:11-15.

14. Ino ty raha fa nivolanini-Soratsy Masy mikasiky ty Mesia?

¹⁴ Ino ty raha volanini-Soratsy Masy? Tsy nieritseritsy ty ankamaroani-Jiosy hoe ho maty ty Mesia. Fe henteo ty raha volanini-faminania amy Soratsy Masy ao mikasiky azy: “Nanolotsy ty ainy ho amy fahafatesa [ty Mesia]. Natao anisani-mpandika lalàna koa ie. Nanday ty fahotani-maro ie, sady mpanelanela ho ani-mpandika lalàna.” (Isaia 53:12) Ka ndre nivonoa aza Jesosy satria nasaran’olo nanao raha tena raty, le tsy zay ty antony tokony halainani-Jiosy rey azy.

15. Nasara nanao ino ty Vavolombeloni-Jehovah mahavy an-drozy halan’olo io?

¹⁵ Manahaky ani-zay koa va henanizao? Zay mihintsy! Nasara nanao raha raty Jesosy le bakeo nivola mpitsara rey hoe tsy maintsy vonoa ie. Mitovy amy zay koa ty ataon’olo amy Vavolombeloni-Jehovah henanizao. Henteo moa ohatsy retoa. Ta Etazinỳ any, tamy tao 1930 zisiky 1950 tany ho any, le niakatsy tribinaly matetiky tsika satria ta hanompo ani-Jehovah malalaky soa. Tena hita hoe nalay antsika mpitsara rey. Niaraky niasa mihintsy aza ty mpitariky fivavaha noho ty Fanjakà ta Québec, a Kanada any mba hampijano ty asantsika. Maro ty mpitory nigadrà satria niresaky mikasiky Fanjakà-Ndranahary tamin’olo. Nisy tanora maro tan’Alemaigny tany aza nivonoani-fanjakàni-Nazỳ mihintsy satria tsy nivaliky. Le tao vitsivitsy zay ty ankamaroani-rahalahintsika a Russie any nisazỳ noho nigadrà satria niresaky Baiboly tamin’olo. Asa “mikai-doza” raha io hoasani-manam-pahefà any. Ndre ty Soratsy Masy Fandikan-tenini-Tontolo Vaovao amy safàn’olo baka a Russie any aza nirarà. “Fitaova mikai-doza” Baiboly raiky io hoasan-drozy satria mampiasa ty anarani-Jehovah.

16. Laha hentea ty 1 Jaona 4:1, manino tsika ro tsy tokony hino ty vandy ataon’olo mikasiky ty mpanomponi-Jehovah?

¹⁶ Ino ty hanampy antsika tsy hiala ani-Jesosy? Anovo hay ty raha misy. Nampitandrina ty mpijanjy azy Jesosy tamy Toriteniny Tam-bohitsy teo iny hoe hamoronan’olo vandy rozy ka ‘hasara hoe nanao kila raha raty iaby zao.’ (Mat. 5:11) Tsy ia moa ro niaviani-vandy reo fa Satana. Ataony ze hahavy ty mpanohitsy hampiparitaky vandy mikasiky ze olo tea fahamarina. (Apok. 12:9, 10) Tsy tokony hinoantsika vandy ataoni-mpanohitsy rey. Tsy tokony hengantsika hisaka antsika tsy hanompo ani-Jehovah mihintsy raha rey sady tsy hengantsika hampihena ty finoantsika.​—Vakio 1 Jaona 4:1.

4) NISY NAMADIKY JESOSY SADY NENGANI-NAMANY

17. Manino raha niseho talohani-hahafatesani-Jesosy rey ro mety ho nahavy ty olo sisany halay azy?

¹⁷ Taloha kelikelini-hahafaty ani-Jesosy, le namadiky azy ty raiky tamy apostoliny 12 rey. Nisy apostoly raiky hafa nandà ani-Jesosy intelo. Nanenga azy iaby koa apostoliny rey tamy haly talohani-hahafatesany. (Mat. 26:14-16, 47, 56, 75) Tsy nahatseriky ani-Jesosy raha zay satria fa nisy faminania niresaky hoe zay ty raha hiseho. (Jaona 6:64; 13:21, 26, 38; 16:32) Mety ho nanao ho zao amy zay ty olo sisany lafa nahita ani-raha niseho rey: ‘Rozy aza apostolini-Jesosy kanefa zao ty raha nataon-drozy. Ka zaho koa ro mbo hilitsy any!’

18. Ino ty faminania nitanteraky talohani-hahafatesani-Jesosy?

¹⁸ Ino ty raha volanini-Soratsy Masy? An-jatony tao talohani-hiaviani-Jesosy tan-tany etoy, le fa nambarani-Jehovah amy Safàny ao hoe farantsa volafoty 30 ro hamadihan’olo ty Mesia. (Zak. 11:12, 13) Raiky amy namany rey avao hamadiky azy io. (Sal. 41:9) Nivola koa Zakaria mpaminany hoe: “Asio ty mpiaraky, le hiparitaky ty aondry.” (Zak. 13:7) Tsy tokony hahavy olo halay ani-Jesosy mihintsy raha niseho io. Laha nana fo soa aza rozy le vomaiky ho natanjaky ty finoan-drozy lafa nahita ani-faminania reo nitanteraky tamy Jesosy.

19. Ino ty raha hain’olo mana fo soa?

¹⁹ Manahaky ani-zay koa va henanizao? Eka. Nisy, ohatsy, Vavolombeloni-Jehovah maro mpahay fe niala amy fahamarina, nivadi-pinoa, le bakeo nitao olo hafa hivaliky. Nandratiraty Vavolombeloni-Jehovah rozy, namitaky olo, sady nampiparitaky vandy tamy gazety, radio, tele, na tamy internet. Fe tsy voafitaky ty olo mana fo soa. Vomaiky aza hitan-drozy hoe tanteraky ty raha volanini-Baiboly mikasiky ani-raha zay.​—Mat. 24:24; 2 Pet. 2:18-22.

20. Ino ty hanampy antsika tsy hiala mihintsy ndre miala amy fahamarina ty olo sisany? (2 Timoty 4:4, 5)

²⁰ Ino ty hanampy antsika tsy hiala ani-Jesosy? Mila miezaky hana finoa matanjaky avao tsika. Hihamatanjaky ty finoantsika laha mianatsy tsy tampaky tsika, mivavaky matetiky sady mazoto mandramby anjara amy asa nampanaovini-Jehovah antsika iny. (Vakio 2 Timoty 4:4, 5.) Laha manam-pinoa tsika le tsy hiasa loha lafa maharè vaovao tsy marina mikasiky ty Vavolombeloni-Jehovah. (Isaia 28:16) Ndre miala amy fahamarina aza ty olo sisany, le tsy hiala mihintsy tsika laha tea ani-Jehovah, tea ty Safàny, sady tea ty rahalahy noho anabavintsika.

21. Ino ty azontsika antoky ndre maro aza ty olo tsy maneky ty hafatsy andesintsika?

²¹ Nimaro ty olo tsy naneky ani-Jesosy tamin’ie mbo tan-tany etoy. Fe nimaro avao koa ty naneky azy. Farafahakeliny nisy olo raiky baka amy Fitsarà Anabo Jiosy nanaraky azy. Tsy zay avao fa nisy “mpisoro maro biby” mihintsy aza nanaraky azy. (Asa. 6:7; Mat. 27:57-60; Mar. 15:43) An-tapitrisany koa henanizao ty olo nanapa-kevitsy hanoriky ani-Jesosy. Fa manino? Satria tsy hoe mahay fahamarina avao rozy fa mbo tean-drozy koa raha io. Mivola ty Safà-Ndranahary hoe: “Ho be ty fiadanani-ze tea ty lalànanao, ka tsy misy raha mahavoafinga an-drozy.”​—Sal. 119:165.