Nareo Ray Aman-dreny, Ampeo ho Tea ani-Jehovah ty Ananareo

1-2. Manino ro mety ho lasa vatan-draha amintsika ty andinin-teny sisany lafa miova ty raha iainantsika?

SOASOA ty manenty ani-mpivaly vao rey amy andro anaova mariazin-drozy iny. Misy lahateny mikasiky fanambalea atao ho an-drozy amy fotoa io le mijanjy soa rozy. Tsy vaovao amin-drozy ty torolala baka amy Baiboly resahy amy lahateny io, fe lasa tena vatan-draha amin-drozy andinin-teny reo manomboky amy andro io. Fa manino? Satria fa hiainan-drozy amy zay torolala rey.

² Manahaky ani-zay koa lafa miteraky ty mpivaly kristiana. Mety fa naharè lahateny maromaro mikasiky fomba fitezà anaky avao rozy tanatini-tao maro. Fe lasa mahakasiky an-drozy amy zay torohevitsy rey henanizao satria fa manan’anaky rozy. Tena andraikitsy bevata raha zay! Lafa miova zany ty fiainantsika le lasa vatan-draha amintsika ty andinin-teny sisany. Zay ty antony mahavy ty mpanomponi-Jehovah tokony hamaky noho hametsivetsy ty Soratsy Masy “amy andro iaby iainany.” Nampirisihy hanao manahaky ani-zay mihintsy ty mpanjaka tamy Israely teo.​—Deot. 17:19.

3. Ino ty hodinihintsika amy lahatsoratsy toy ato?

³ Mana tombontsoa bevata nareo ray aman-dreny kristiana, satria afaky mampianatsy ty ananareo mikasiky ani-Jehovah. Fe tsy hoe manampy an-drozy hahay ani-Ndranaharintsika iny avao nareo. Teanareo koa ty hanampy an-drozy ho tena tea Azy. Ka ino ty azonareo atao? Handiniky torolala efatsy baka amy Baiboly ao tsika amy lahatsoratsy toy ato. Tena hanampy anareo torolala reo. (2 Tim. 3:16) Ho hitantsika ato koa hoe ino ty soa niazoni-ray aman-dreny sisany lafa nanoriky ty torohevitsini-Baiboly rozy.

TOROLALA EFATSY AFAKY HANAMPY TY RAY AMAN-DRENY

4. Mivolana torolala raiky afaky manampy ty ray aman-dreny hanampy ty anany ho tea ani-Jehovah. (Jakoba 1:5)

⁴ Torolala 1: Milà ty tari-dalani-Jehovah. Angataho Jehovah hanome ty fahendrea ilànao mba hanampea ty ananao ho tea azy. (Vakio Jakoba 1:5.) Ie ro tena mahay manoro hevitsy anao. Maro ty antony mahavy antsika mivola ani-zay. Fe handiniky roe avao tsika. Voalohany, tena mana traikefa amy resaky fitezà Jehovah. (Sal. 36:9) Le faharoe, mahasoa avao ty torohevitsy ameany.​—Isaia 48:17.

5. a) Ino ty raha ameani-fandaminani-Jehovah mba hanampea ty ray aman-dreny? b) Laha hentea video io, ino ty nianaranao baka amy fomba nitezani-Rahalahy noho Ranabavy Amorim ty anan-drozy?

⁵ Mampiasa ty Safàny noho ty fandaminany Jehovah mba hanomeza torohevitsy ty ray aman-dreny, amy zay rozy afaky hanampy ty anan-drozy ho tea Azy. (Mat. 24:45) Afaky mahita torohevitsy maro azo orihy, ohatsy, iha amy lahatsoratsy mifampitohitohy hoe “Ho an’ny Fianakaviana” amy gazety Mifohaza! Azo hentea amy jw.org ao koa lahatsoratsy reo henanizao. Tsy zay avao fa mbo misy video maro koa ty amy jw.org ao, afaky manampy ty ray aman-dreny hanoriky ty torohevitsini-Jehovah mikasiky fitezà anaky.b​—Ohab. 2:4-6.

6. Ino ty tsapani-raim-pianakavia raiky toy mikasiky ty tari-dala niazon-drozy morovaly baka amy fandaminani-Jehovah?

⁶ Maro ty ray aman-dreny nivola fa tena ankasitrahan-drozy ty fanampea ameani-Jehovah amy alalani-fandaminany. Hoy Joe, raim-pianakavia: “Tsy mora miteza ajà telo amy fahamarina zao. Mivavaky amy Jehovah avao zahay morovaly mba hanampy anay. Tsapanay matetiky hoe misy lahatsoratsy na video avy amy fotoa ilànay azy, le manampy anay amy raha mahazo anay iny. Miantehitsy amy torohevitsy ameani-Jehovah avao zahay.” Hitani-Joe morovaly hoe tena nanampy ani-anan-drozy rey hihamarìny ani-Jehovah lahatsoratsy noho video rey.

7. Manino ty ray aman-dreny ro tokony hiezaky hanome modely soa? (Romanina 2:21)

⁷ Torolala 2: Manomeza modely soa. Dinihin’ajà reo soa ty babany noho reniny, le matetiky tahafiny ze raha ataon-drozy. Marina fa tsy misy ray aman-dreny lavorary. (Rom. 3:23) Fe ndre zay, tokony hanao ze fara heriny avao ty ray aman-dreny mba hanomeza modely soa ho ahi-ty anan-drozy. (Vakio Romanina 2:21.) Zao ty nivolanini-raim-pianakavia raiky zay lafa niresaky mikasiky ty ajà: “Manahaky eponzy io rozy ka mitsintsiky ze ranon-draha manodidy an-drozy.” Mbo nivola koa ie hoe: “Hovolanin-drozy tsika laha tsy manao ani-raha ampianarintsika an-drozy iny.” Ka laha teantsika ho tea ani-Jehovah zany ty anantsika, le tsika mihintsy ro mila mampiseho hoe tena tea ani-Jehovah.

8-9. Ino ty nianaranao baka amy raha nivolanini-Andrew noho Emma?

⁸ Maro ty fomba azoni-ray aman-dreny atao mba hampianara ty anan-drozy ho tea ani-Jehovah. Henteo moa ty raha nivolanini-Andrew, rahalahy raiky 17 tao toy: “Nampianarini-ray aman-dreniko ahy avao hoe tena vatan-draha ty vavaky. Miaraky mivavaky amiko avao Babako saky haly, ndre fa baka nivavaky aza aho. Tozoro mampitiaro anay rozy hoe: ‘Afaky miresaky amy Jehovah avao nareo ndre impiry impiry aza, araky ze teanareo.’ Lasa tena nivatan-draha amiko ty vavaky, vokatsini-zay. Tsy misalasala mivavaky amy Jehovah aho henanizao, satria rambesiko sahala amy Baba be fitiava ie.” Nareo ray aman-dreny, tiarovo avao hoe misy vokany amy ananareo reo ty fitiavanareo ani-Jehovah.

⁹ Henteo koa moa ohatsini-Emma toy. Nanenga an-drozy baban-drozy, ie amin’io nitrosa drala be tamin’olo, le tsy maintsy renin-drozy iny ro handoa ani-drala iny. Hoy Emma: “Tsy de nanan-drala Mama matetiky, fe tozoro niresaky avao ie hoe mikarakara ty mpanompony Jehovah. Hitako amy fomba fiainany hoe tena matoky ani-raha zay ie. Tsy mampianatsy avao Mama fa tena manoriky ze raha ampianariny.” Ino ty ianarantsika baka amy zay? Tokony ho modely soa avao ty ray aman-dreny ndre lafa miatriky raha sarotsy aza.​—Gal. 6:9.

10. Amy fotoa manao akory ty ray aman-dreny israelita ro afaky miresaky amy ty anany mikasiky ani-Jehovah? (Deoteronomia 6:6, 7)

¹⁰ Torolala 3: Miresaha matetiky amy ananao. Nandidy ty Israelita Jehovah mba hampianatsy tsy tampaky ty anan-drozy mikasiky azy. (Vakio Deoteronomia 6:6, 7.) Nana fahafaha hifampiresaky amy ty anan-drozy rozy sanandro ka afaky nanampy ani-anan-drozy reo ho tea ani-Jehovah. Mety hiaraky amy babany mamboly na mamory vokatsy, ohatsy, ty mpamaraky israelita. Le ty ampela amy zay mety miaraky amy reniny manjaitsy, noho mikarakara ty raha hafa an-trano ao. Lafa miaraky miasa ty ray aman-dreny noho ty anaky, le mety ho tafaresaky raha maro. Mety ho azon-drozy atao, ohatsy, ty miresaky mikasiky ty hasoa toetsini-Jehovah noho ty fomba nanampeany ty fianakavian-drozy.

11. Ino ty fotoa azoni-ray aman-dreny hararaoty mba hifampiresaha amy ty anany?

¹¹ Hafa mihintsy ty fiaina henanizao fa tsy mitovy amy ty taloha. Tsy mba manam-potoa hiaraha amy ty anany, ohatsy, ty ray aman-dreny amy tany maro. Mety hoe am-piasà any ty ray aman-dreny, le ajà iny an-dakilasy any. Tsy maintsy miezaky amy zay ty ray aman-dreny mila fotoa mba hahafahany miresaky amy ty anany. (Efes. 5:15, 16; Fil. 1:10) Afaky manararaotsy manao ani-zay rozy lafa Fotoam-pivavahani-Fianakavia. Hoy rahalahy tanora mana anara Alexander zay: “Manao fandahara avao babako mba hanaovanay fotoam-pivavahani-fianakavia, le tsy misy raha engàny hisaka anay tsy ho tafaraky amy fotoa io. Miresadresaky amy zay zahay lafa vita fianara iny.”

12. Ino ty tokony hotiarovini-loham-pianakavia lafa manao fotoam-pivavahani-fianakavia?

¹² Loham-pianakavia va iha? Ino ty azonao atao mba hahavy ty fotoam-pivavahanareo ho soasoa sady mahafalifaly ka ho azoni-ananao reo tavy? Manino laha ianaranareo boky vaovao Ho Azonao Tavy ty Fiaina Zisiky Farany! iny? Tena soa boky iny satria mahavy anareo hifampiresaky soa. Azo antoky fa teanao laha tsy misalasala miresaky aminao ty fihetseham-pon-drozy noho ty raha mampiasa loha an-drozy ananao reo. Ka mikinokino na mananatsanatsy an-drozy zany amy fotoa anaovanareo fotoam-pivavaha iny. Miezaha koa mba tsy ho meloky laha mivola raha tsy mifanaraky amy ty raha volanini-Baiboly rozy kindraiky. Tokony ho falifaly aza iha satria tsy misalasala rozy fa miresaky ty hevitsin-drozy. Anovo ze hahavy an-drozy hanao ani-zay avao. Ho hainao soa amy zay ty raha tsapan-drozy. Zay ty fomba farani-ze soa ahafahanao manampy an-drozy.

13. Amy fotoa manao akory koa ty ray aman-dreny ro afaky manampy ty anany hifandramby soa amy Jehovah?

¹³ Nareo ray aman-dreny, milà fomba avao sanandro mba hanampea ty ananareo hifandramby soa amy Jehovah. Tsy tokony handiny ty fotoa ianaranareo Baiboly iha zay vo hampianatsy an-drozy mikasiky ani-Ndranaharintsika be fitiava iny. Henteo ty raha nivolanini-renim-pianakavia mana anara Lisa toy: “Mampiasa ty raha manodidy anay zahay mba hampianara ani-ananay reo mikasiky ani-Jehovah. Lafa manao raha mampihehy an-drozy, ohatsy, alikanay iny, le volaninay rozy hoe Ndranahary falifaly Jehovah ka ataony koa ze hahavy antsika ho falifaly.”

14. Manino ty ray aman-dreny ro tena tokony hanampy ty anany hahay hifily nama? (Ohabolana 13:20)

¹⁴ Torolala 4: Ampeo hahay hifily nama ty ananao. Mivola mazava soa ty Safà-Ndranahary fa misy vokany soa na raty amintsika ty namantsika. (Vakio Ohabolana 13:20.) Nareo ray aman-dreny, hainareo va hoe ia iaby ty namani-ananareo reo? Fa nifankahita tamin-drozy va nareo sady mba fa nitafaraky tamin-drozy? Ino ty azonareo atao mba hanampea ty ananareo hinama amin’olo tea ani-Jehovah? (1 Kor. 15:33) Afaky hanampy an-drozy hana nama soa iha laha manasa olo tea ani-Jehovah mba hiaraky manao raha aminareo.​—Sal. 119:63.

15. Ino ty azoni-ray aman-dreny atao mba hanampea ty anan-drozy hana nama soa?

¹⁵ Henteo moa raim-pianakavia mana anara Tony toy. Nanampy ty anan-drozy hahita nama soa rozy morovaly. Ino ty nataon-drozy? Nitantara ie hoe: “Nanasa rahalahy noho anabavy sankarazany zahay tanatini-tao maro. Niaraky nihina noho nanao fotoam-pivavahani-fianakavia aminay rozy. Lasa nihainay hoe tea ani-Jehovah rozy sady falifaly manompo azy. Nampiantrano mpiandraikitsini-faritsy, misionera, noho mpanompo amy fotoa iaby hafa koa zahay. Niana-draha maro baka amy ty raha nivolanin-drozy, ty zotom-pon-drozy, noho ty fahafoizam-bata nananan-drozy ananay rey. Nanampy an-drozy hifandramby soa amy Jehovah raha zay.” Nareo ray aman-dreny, miezaha avao hanampy ty ananareo hana nama soa.

KA KIVY!

16. Manao akory laha mivola ty raiky amy ananao reo hoe tsy ta hanompo ani-Jehovah ie?

¹⁶ Manao akory laha fa nanao ze fara herinao iha, fe mivola ty raiky amy ananao reo hoe tsy ta hanompo ani-Jehovah ie? Ka mieritseritsy mihintsy hoe tsy nahay niteza iha. Nameani-Jehovah fahafaha malalaky tsika iaby, le manahaky ani-zay koa ananao reo. Afaky mifily rozy na hanompo a Ndranahary na tsy hanompo azy. Laha nanapa-kevitsy ty ananao hoe hiala ani-Jehovah, le ka kivy. Mbo himpoly avao ie ndraiky andro any. Tiarovo fanohara mikasiky anaky adala iny. (Lioka 15:11-19, 22-24) Maro biby ty raha raty nataoni-mpamaraky io, fe nimpoly avao ie tamy farany. Mety hisy hivola hoe: “Fanohara avao iny!” “Fe mety hisy hanahaky ani-zay vatany va?” Afaky himpoly amy Jehovah koa va ananao iny? Eka, afaky mimpoly ie. Zay mihintsy ty raha niainani-mpamaraky mana anara Elie toy.

17. Manino ty tantarani-Elie ro mampahery anao?

¹⁷ Hoy Elie lafa niresaky mikasiky ty ray aman-dreniny: “Niezaky rozy nanampy ahy ho tea ani-Jehovah noho ty Safàny. Fe lasa nahery loha aho lafa tafara atoy.” Nanomboky nanao raha raty ambalimbaliky any Elie. Niezaky avao ty ray aman-dreniny nanampy azy tsy hiala amy Jehovah, fe tsy nidareany. Niala tan-trano ao ie, le naloto fandaisam-bata amy zay ie lafa tany. Fe ndre zay, misy fotoa ie ta hiresaky mikasiky ty raha resahini-Baiboly amy namany rey. Hoy Elie: “Arakaraky ty niresahako mikasiky ani-Jehovah tamy namako rey, le vomaiky aho nieritseritsy ndraiky ty fifandrambesako aminy. Nimpoly tsikelikely tan-tsaiko ao raha nampianarini-babako noho mamako ahy tamy Baiboly ao rey.” Nimpoly tamy fahamarina avao Elie lafa nandeha ty fotoa.c Azo antoky fa nifalifaly biby ray aman-dreniny rey satria niezaky nampianatsy azy ho tea ani-Jehovah avao rozy liany ie mbo nikely!​—2 Tim. 3:14, 15.

18. Manao akory ty fahitanao ani-ray aman-dreny miezaky mafy manampy ty anany ho tea ani-Jehovah rey?

¹⁸ Nameani-Jehovah tombontsoa bevata nareo ray aman-dreny, satria afaky manampy ty ananareo hanompo azy. (Sal. 78:4-6) Tsy mora raha zay, ka tena midera anareo zahay amy ty ezaky mafy ataonareo mba hanampea ty ananareo! Laha miezaky avao iha manampy ty ananao ho tea ani-Jehovah noho mampianatsy an-drozy hanoriky ty safàny, le afaky matoky iha fa tena ho falifaly Babantsika be fitiava an-danitsy any iny.​—Efes. 6:4.