Fa Manjaka ty Fanjakà-Ndranahary!

1. Ino ty raha azontsika antoky, le ino ty antony?

LAHA hentea ty raha miseho amy tontolo toy eto, le tena sarotsy ty hino hoe mbo hihasoa avao ty fiaina. Lasa mifankalay ty mpilongo. Ty olo iaby koa vomaiky mihasatà, tea tena, sady masiaky. Maro ty olo tsy matoky ani-azy manam-pahefà reo. Fe zao, raha hitanao reo mihintsy ro vomaiky tokony hahavy anao hino hoe hihasoa ty fiaina. Fa manino? Satria raha ataon’olo henanizao reo, reo mihintsy ty raha nivolanini-Baiboly hoe hataon’olo amy “andro farany.” (2 Tim. 3:1-5) Tanteraky zany faminania miavaky resahini-Baiboly io. Tsy misy olo afaky mandietsy ani-zay, laha mbo olo mandiniky soa avao. Manaporofo raha reo hoe fa lasa Mpanjakani-Fanjakà-Ndranahary, Kristy Jesosy. Mbo raiky amy faminania mikasiky Fanjakà iny avao io. Fe handiniky faminania hafa nitanteraky tato ho ato rezay tsika mba hampatanjaky ty finoantsika.

2. Ino ty hodinihintsika amy lahatsoratsy toy ato, le ino ty antony? (Hazavao sary amy fononi-gazety toy.)

² Amy lahatsoratsy toy ato tsika, le handiniky 1) faminania raiky hanampy antsika hahay hoe nombia ro nanomboky nanjaka Fanjakà iny, 2) faminania manampy antsika hahay hoe fa lasa Mpanjakani-Fanjakà-Ndranahary an-danitsy any Jesosy, le 3) faminania vitsivitsy ahità hoe akory ty haharipaky ty fahavaloni-Fanjakà-Ndranahary. Ho hitantsika fa mifanaraky soa faminania reo. Hanampy antsika raha zay hahay hoe tena fa marìny ty farany araky ty fa nampitamanini-Jehovah.

INO TY HANAMPY ANTSIKA HAHAY HOE NOMBIA RO NANOMBOKY NANJAKA FANJAKÀ INY?

3. Ino ty fanomezan-toky ameani-​Daniela 7:13, 14 antsika mikasiky ty Mpanjakani-Fanjakà-Ndranahary?

³ Manome toky antsika ty faminania amy Daniela 7:13, 14 ao fa Kristy Jesosy vatany ro tena maeva ho Mpanjakani-Fanjakà-Ndranahary. Ho falifaly “hanompo azy” ty olo iaby ndre aia ty firenena misy an-drozy ndre aia, sady tsy hisy mpanjaka hafa hisolo azy. Misy faminania hafa koa amy bokini-Daniela ao mivola hoe hanomboky hanjaka Jesosy lafa tampitsy ty fotoa fito. Mety ho haintsika avao va hoe ombia daty io?

4. Hazavao hoe manino ty Daniela 4:10-17 ro manampy antsika hahay hoe nombia Kristy ro nanomboky nanjaka. (Henteo koa ty fanamariha ambany pejy.)

⁴ Vakio Daniela 4:10-17. Manondro 2 520 tao “fotoa fito” io. Tamy tao 607 T.K. ty nanombohani-fotoa io, zany hoe lafa nalàni-Babylonianina rey baka amy sezi-mpanjakàni-Jehovah eo ty mpanjaka farany ta Jerosalema ao. Tamy tao 1914 ty nitamperany. Nasiani-Jehovah satrokini-mpanjaka Jesosy tamy fotoa io, mba hampisehoany hoe “mana zo ara-dalàna” ho Mpanjakani-Fanjakà-Ndranahary Jesosy.b​—Ezek. 21:25-27.

5. Manino ro mahasoa antsika faminania mikasiky “fotoa fito” io?

⁵ Mahasoa antsika va faminania io? Laha azontsika soa faminania mikasiky “fotoa fito” io, le tena hatòky tsika hoe tanterahini-Jehovah ara-potoa iaby ze raha ampitamaniny. Fa nanondro fotoa raiky Jehovah le nanapa-kevitsy hoe hataony mpanjaka Jesosy amy fotoa io. Lafa niavy amy zay fotoa iny, le nataony mpanjaka vatany Jesosy. Haintsika zany fa tsy maintsy ho tanterahiny iaby faminania hafa rey lafa avy fotoa voatondrony rey. “Tsy ho tara” mihintsy ty androni-Jehovah!​—Hab. 2:3.

AKORY TY AHAIZANTSIKA HOE FA LASA MPANJAKANI-FANJAKÀ-NDRANAHARY KRISTY?

6. a) Ino ty raha miseho an-tany etoy manaporofo hoe fa manjaka an-danitsy any Kristy? b) Manino ty faminania amy Apokalypsy 6:2-8 ao ro manaporofo ani-raha reo?

⁶ Lafa narìny ho tampitsy ty fanompoani-Jesosy tan-tany etoy, le nisy raha nivolaniny mba hahaizani-mpanori-dia azy hoe fa manomboky manjaka an-danitsy any ie. Hisy raha maromaro hoasany hiseho amy tany toy iaby, anatini-zay ty aly, kerè, noho ty horohoron-tany. Niresaky koa ie hoe hisy arety hiparitaky “amy pilasy samby hafa any”, le ohatsy raiky amy zay arety COVID-19 iny. “Famantara” ty fanatrehani-Kristy ty ikaihani-Baiboly ani-raha maromaro nivolanini-Jesosy reo. (Mat. 24:3, 7; Lioka 21:7, 10, 11) Enimpolo tao teo ho eo tafarani-nahafaty ani-Jesosy noho nimpoliany tan-danitsy any iny, le nampoliny niresahy tamy apostoly Jaona hoe tena hiseho vatany raha reo. (Vakio Apokalypsy 6:2-8.) Niseho iaby vatany raha reo lafa nilasa Mpanjaka Jesosy tamy 1914.

7. Manino ro lasa niharaty ty fiaina tan-tany etoy lafa nilasa Mpanjaka Jesosy?

⁷ Manino ro lasa niharaty ty fiaina tan-tany etoy lafa nilasa Mpanjaka Jesosy? Miresaky tsipiriany raiky soa ho haintsika mikasiky ani-zay ty Apokalypsy 6:2. Ino tse moa ty raha voalohany nataoni-Jesosy laha vo nilasa Mpanjakani-Fanjakà-Ndranahary ie? Nialy ie. Nialy tamin’ia? Nialy tamy Devoly noho demoniany rey. Resahini-​Apokalypsy toko faha-​12 hoe niresy Satana, bakeo natoraky an-tany etoy niaraky amy demoniany rey. Neloky biby Satana, le ty olombelo ro nanandesany ty helony, farany nanday “loza ho ahi-ty tany” raha zay.​—Apok. 12:7-12.

8. Manino ro mahasoa antsika ty mahita hoe tanteraky faminania mikasiky Fanjakà iny rey?

⁸ Mahasoa antsika va faminania reo? Fa manany manany avao tontolo toy sady miharaty avao koa ty olo henanizao. Manaporofo raha zay hoe fa lasa Mpanjaka Jesosy. Ka lafa mahita olo tea tena noho raty fanahy tsika, le tsy ataontsika mampiasa loha antsika sasy raha zay. Tiarontsika hoe manatanteraky faminania amy Baiboly ao raha ataon-drozy rey. Tsy ino zay fa ty hoe: Fa manjaka ty Fanjakà-Ndranahary! (Sal. 37:1) Vomaiky aza hiharaty ty raha ho hitantsika arakarakini-mamparìny ty Aramagedona. (Mar. 13:8; 2 Tim. 3:13) Atoroni-Babantsika tena tea antsika an-danitsy any iny hoe ino marina mahavy raha raty maro an-tany etoy io. Ka tsy mba ta hisaotsy azy va lahy iha?

AKORY TY HAHARIPAKY TY FAHAVALONI-FANJAKÀ-NDRANAHARY?

9. Laha hentea ty Daniela 2:28, 31-35, ia ty fanjakà ho eo lafa manomboky manjaka Kristy, le nombia ie ro nanomboky nanjaka?

⁹ Vakio Daniela 2:28, 31-35. Hitantsika henanizao koa ty fahatanterahani-faminania io. Miresaky ty raha hiseho “amy farany any” nofini-Nebokadnezara io, zany hoe miresaky ty raha hiseho lafa manomboky manjaka Kristy. Anisani-fahavaloni-Jesosy an-tany etoy azy fanjakà matanjaky farany volanini-Baiboly iny, zany hoe azy “tomboky vy noho tanimanga” iny. Fa am-perinasa fanjakà io henanizao. Nanomboky nanjaka ie tamy Aly Bevata I, lafa nanomboky niaraky niasa Grande-Bretagne noho Etazinỳ, ka lasa nisy ty fanjakà Anglè-Amerikein. Laha hentea koa nofini-Nebokadnezara iny, le misy raha roe farafahakeliny mampiavaky ani-fanjakà matanjaky raiky toy amy ze fanjakà hafa talohany teo.

10. a) Ino ty raha volanini-faminaniani-Daniela ka hitantsika amy fanjakà Anglè-Amerikein henanizao? b) Ino ty loza tokony ho tandremantsika? (Henteo ty efajoro hoe “Mitandrema amy Tanimanga Iny!”)

¹⁰ Voalohany, tsy manahaky fanjakà matanjaky voaresaky talohany rey ty fanjakà Anglè-Amerikein, satria tsy natao sarin-draha matanjaky manahaky volamena noho volafoty rey ty fiaraha-miasan-drozy, fa vy noho tanimanga miharo. Manondro ty “taranak’olombelo” na ty vahoaky, tanimanga io. (Dan. 2:43, f.a.p.) Hitantsika soa henanizao hoe tena sarotsy amy ty prezidà noho ze miaraky miasa aminy ty hanatanteraky ty raha teany hatao satria ty vahoaky ro mifily an-drozy, na misy vahoaky koa manao grevy, na manao ezaky hitakia ty zony na ty zoni-mpiasa.

11. Manino ty fisiani-Firenena Matanjaky Anglè-Amerikein ro vomaiky mahavy antsika matoky hoe miay amy fotoani-farany tsika henanizao?

¹¹ Faharoe, ty fanjakà Anglè-Amerikein, zany hoe azy tombokini-sary tamy nofini-Nebokadnezara iny, ro fanjakà matanjaky farany amy faminaniani-Baiboly. Tsy hisy fanjakàn’olombelo hafa sasy handimby azy. Laha ty marina, horavàni-Fanjakà-Ndranahary ie miaraky amy ze fanjakàn’olombelo iaby, amy Aramagedona.c​—Apok. 16:13, 14, 16; 19:19, 20.

12. Ino koa ty raha hafa hitantsika amy faminaniani-Daniela ao ka mampahery antsika noho manampy antsika hana raha tamany?

¹² Mahasoa antsika va faminania io? Manome porofo fanampiny ty faminaniani-Daniela hoe fa miay amy fotoani-farany vatany tsika. Nivola Daniela tamy 2 500 tao mahery lasa tany fa lafa rava Babylona, le hisy fanjakà matanjaky efatsy hanjaka amy ty mpanompo-Ndranahary. Tsy zay avao, niresahiny hoe ty Firenena Matanjaky Anglè-Amerikein ro hanjaka farany eo. Mampahery antsika raha zay sady mahavy antsika hatòky hoe kely sisa le haripakini-Fanjakà-Ndranahary iaby ty fanjakàn’olombelo, fa ie ro handay ani-tany toy iaby.​—Dan. 2:44.

13. Manondro an’ia “mpanjaka fahavalo” noho “mpanjaka folo” amy Apokalypsy 17:9-12 ao reo, le nanao akory ty nahatanteraky ani-faminania io?

¹³ Vakio Apokalypsy 17:9-12. Nanimba raha maro marè Aly Bevata I iny, ka nanatanteraky faminania hafa mikasiky andro farany ty vokatsini-aly io. Ta handay fiadana an-tany etoy ty prezidà iaby. Farany rozy nananga ty Fikambanam-pirenena tamy Zanviè 1920. Novà hoe Firenena Mikambana raha io tamy Oktobra 1945. Kaihy hoe “mpanjaka fahavalo” fikambana io. Fe tsy ie ro firenena farani-ze matanjaky an-tany etoy. Mana fahefà ie satria manoha azy ty fanjakà iaby. Kaihini-Baiboly hoe “mpanjaka folo” azy fanjakà manoha azy reo.

14-15. a) Ino ty raha resahini-​Apokalypsy 17:3-5 mikasiky ani-“Babylona Bevata”? b) Manao akory ty mpanoha ty fivavahan-diso?

¹⁴ Vakio Apokalypsy 17:3-5. Nahazo fahità baka amy Ndranahary apostoly Jaona, le nahita makorely, na “Babylona Bevata.” Mampiseho ty fivavahan-diso iaby amy tany toy raha io. Nanao akory ty nahatanteraky ani-fahità io? Niaraky niasa marìny tamy fanjakà avao ty fivavahan-diso tanatini-tao maro, sady nanoha an-drozy. Fe tsy ho ela, le hataoni-Jehovah am-poni-mpanao politiky reo ao “ty hanatanteraky ty hevitsiny.” Hanao akory amy zay ty vokany? Hotafihini-fanjakà, na “mpanjaka folo” reo ty fivavahan-diso iaby ka haripakin-drozy.​—Apok. 17:1, 2, 16, 17.

¹⁵ Akory ty ahaizantsika hoe fa marìny ho rava Babylona Bevata? Mba hamalea ani-zay, le soa ty mitiaro hoe narovani-Vavaranoni-Eofrata tanàni-Babylona taloha iny. Ampitovizini-bokini-Apokalypsy amy “rano” miaro ani-Babylona Bevata koa ty olo an-tapitrisany manoha azy. (Apok. 17:15) Fe volaniny ao koa fa ho “ritsy” rano io, zany hoe hiala azy ty ankamaroani-mpanoha azy. (Apok. 16:12) Tanteraky faminania io henanizao, satria maro ty olo lasa tsy mivavaky amy fivavahan-diso any sasy. Mila fomba hafa rozy mba hamahan-drozy ty raha manahira an-drozy.

16. Manino ro mahasoa antsika ty mahay soa ani-faminania mikasiky ty fiforonani-Firenena Mikambana noho ty fandravà ani-Babylona Bevata?

¹⁶ Mahasoa antsika va faminania io? Niforo ty Firenena Mikambana le nihena koa ty olo manoha ty fivavahan-diso. Hitantsika baka amy zay hoe miay amy andro farany tsika. Marina fa maro ty olo tsy manoha ani-Babylona Bevata sasy, fe tsy zay ty haharava azy. Nihitantsika taloha teroy iny hoe hataoni-Jehovah am-poni-“mpanjaka folo” rey, zany hoe am-poni-fanjakà iaby manoha ani-Firenena Mikambana rey ao “ty hanatanteraky ty hevitsiny.” Ho tampoky ty handravan-drozy ani-Babylona Bevata ka tena tsy hampoizin’olo.d (Apok. 18:8-10) Hisy vokany bevata amy zao tontolo zao ty fandravà ani-Babylona Bevata sady mety hiteraky raha sarotsy, fe ho falifaly ty vahoaki-Ndranahary. Fa manino? Misy antony roe farafahakeliny mahavy an-drozy ho falifaly. Fa tsy ho eo sasy fahavaloni-Jehovah Ndranahary iny, zany hoe ty fivavahan-diso, sady kely sisa le ho afaky amy tontolo raty toy eto tsika!​—Lioka 21:28.

MATOKISA FA HIARO TY MPANOMPONY JEHOVAH AMY HOAVY

17-18. a) Ino ty azontsika atao mba hanatanjaha ty finoantsika avao? b) Ino ty hodinihintsika amy lahatsoratsy manaraky?

¹⁷ Naminany Daniela hoe “hitombo marè ty tena fahaiza.” Tena marina raha zay! Azontsika soa henanizao faminania mikasiky ty raha hiseho amy androntsika rey. (Dan. 12:4, 9, 10) Marina soa faminania rey ka lasa voatosiky hanaja ani-Jehovah noho ty Safàny tsika. (Isaia 46:10; 55:11) Hatanjaho avao zany ty finoanao ka ianaro soa ty Soratsy Masy, le ampeo hifandramby soa amy Jehovah ty olo hafa. Harovany ze olo iaby miantehitsy tanteraky aminy, sady ‘hampiadaniny avao.’​—Isaia 26:3.

¹⁸ Handiniky faminania mikasiky ty fiangona kristiana amy fotoani-farany zao tsika, amy lahatsoratsy manaraky ao. Lafa mandiniky ani-faminania reo tsika, le hahita porofo hoe fa miay amy andro farany tsika henanizao. Mbo misy porofo hafa koa ho hitantsika, mampiseho hoe mitariky ty mpanori-dia azy tsy mivaliky, Jesosy Mpanjakantsika henanizao.