Tea Manao ty Marina ty Vahoakini-Jehovah

1. Ino ty raha sarotsy natrehini-Josefa, le ino ty nataony?

NIATRIKY raha tena sarotsy anakilahini-Jakoba mana anara Josefa iny. Nivola taminy ampela raiky zay hoe: “Avia handry amiko.” Ampela io amin’io valini-Potifara, azy tompony iny. Tsy naneky hanao ani-raha zay Josefa. Mety hisy hieritseritsy hoe: ‘Akory ty nahavitani-Josefa nanohitsy ani-fakam-panahy io?’ Tsy tan-trano ao Potifara tamy fotoa io. Ankoatsini-zay, Josefa niandevo tan-tranon-drozy ao. Laha tsy naneky zany Josefa, le tsy maintsy hataoni-ampela iny ze hanimbà ty fiainany. Fe ndre zay, le tsy naneky mihintsy Josefa ndre niforosè azy avao ampela iny. Ino ty antony? Nivola Josefa hoe: “Hataoko akory ty hanao ani-raha raty biby zay, ka hanota amy Ndranahary?”​—Gen. 39:7-12.

2. Akory ty nahaizani-Josefa hoe manota amy Ndranahary ty olo mijangajanga?

² Akory ty nahaizani-Josefa hoe “raty biby” ty fahitani-Ndranahariny iny ty fijangajangà? Mazava soa ty raha nivolanini-Lalànani-Mosesy hoe: “Ka mandranto.” (Eks. 20:14) Fe mbo tsy nisy lalàna zay laha tsy 200 tao eo ho eo tafara atoy. Fe ndre zay, haini-Josefa hoe tena halani-Jehovah ty fijangajangà. Haini-Josefa soa, ohatsy, fa lafa namoro ty fanambalea Jehovah, le lahilahy raiky noho ampela raiky avao ro nataony mpivaly. Fa nireny koa hoe indroe mihintsy Jehovah ro nanao raha mba hiarova ani-Saraha bebeny tsy hivaliky tamy valiny. Nanahaky ani-zay koa fa nanao raha Jehovah mba hiarova ani-Rebeka, valini-Isaka. (Gen. 2:24; 12:14-20; 20:2-7; 26:6-11) Lafa nandiniky ani-raha niseho reo Josefa le nihainy hoe ino ty raha tea-Ndranahary le ino ty raha halany. Tea ani-Jehovah Josefa ka tapa-kevitsy ie hanao ze raha teani-Jehovah hataony.

3. Ino ty hodinihintsika ato?

³ Tea fahamarina va iha?b Azo antoky aloha zay. Fe tsy lavorary iaby tsika, ka laha tsy mitandrina tsika le mety hisy vokany amintsika ty fomba fahitani-tontolo toy ty atao hoe soa noho raty. (Isaia 5:20; Rom. 12:2) Ka hodinihintsika amy lahatsoratsy toy ato hoe ino ty atao hoe fahamarina le manino ro mahasoa antsika ty manao ty marina. Bakeo tsika handiniky raha telo azontsika atao mba hanampea antsika ho tena tea ty fitsipikini-Jehovah.

INO TY ATAO HOE FAHAMARINA?

4. Ino ty hevitsy diso ananan’olo mikasiky ty atao hoe marina?

⁴ Maro ty olo mieritseritsy hoe olo marina zao, olo tea kinokino, tea mitsaratsara olo, na olo mieritseritsy ty vatany ho soa mandilatsy ty olo hafa. Fe tsy tea-Ndranahary mihintsy toetsy reo. Tamy Jesosy tan-tany etoy, le nihelofany mpitariky fivavaha rey satria namoro fitsipiky ho ahin-drozy am-batan-drozy rozy le nanao ty vatan-drozy hoe marina. (Mpito. 7:16; Lioka 16:15) Tsy mieritseritsy ty vatany ho soa mandilatsy ty olo hafa mihintsy ty olo manaraky ani-ze ataoni-Jehovah hoe marina.

5. Ino ty atao hoe fahamarina laha hentea ty Baiboly? Manomeza ohatsy.

⁵ Toetsy tena soa ty fahamarina. Ty olo mana ani-toetsy io le azo volany hoe manao ty raha resahi-Ndranahary hoe marina. Amy Baiboly ao ty safà hoe “fahamarina” le midika hoe manoriky ani-fitsipiky farani-ze anabo iny, zany hoe miay mifanaraky amy fitsipikini-Jehovah. Nandidy, ohatsy, Jehovah hoe tokony hampiasa “vato balansy tsy mavandy” ty mpamarotsy. (Deot. 25:15) Ty safà hebreo tam-boalohany any nadika hoe “tsy mavandy” le azo adika koa hoe “marina.” Ka laha misy Kristiana maniry hoe mba ho olo marina ty fahità-Ndranahary azy, le tsy maintsy manao ty marina ie amy ze raha iaby ataony mifandramby amy varotsy. Tea raha mahity koa ty olo manao ty marina. Halany ty mahita olo anaova ty tsy rariny. Laha tena manao ty marina ty olo raiky, le mandiniky hoe manao akory ty fahitani-Jehovah ty fanapahan-kevitsy ataony, mba “hampifalifaly tanteraky [Azy].”​—Kol. 1:10.

6. Manino tsika ro afaky matoky ty fitsipikini-Jehovah mikasiky ty soa noho ty raty? (Isaia 55:8, 9)

⁶ Mivola ty Baiboly fa baka amy Jehovah ty fahamarina. Zay ty antony ikaiha azy hoe “loharanoni-fahamarina.” (Jer. 50:7) Jehovah ro Mpamoro ka ie raiky avao ro afaky mametraky fitsipiky mikasiky ty soa noho ty raty. Mpanota tsika sady tsy lavorary ka tsy haintsika ty atao hoe soa noho raty. Fe tsy manahaky ani-zay Jehovah. Lavorary ie le hainy soa ty atao hoe soa noho raty. (Ohab. 14:12; vakio Isaia 55:8, 9.) Fe niforony hanahaky ty soraki-Ndranahary tsika, ka afaky manao ze raha volaniny hoe soa. (Gen. 1:27) Teantsika koa ty manao ani-zay. Teantsika Babantsika iny ka voatosiky hanao ze fara herintsika tsika mba hanahafa azy.​—Efes. 5:1.

7. Manino tsika ro mila fitsipiky mitovy? Manomeza ohatsy.

⁷ Mahasoa antsika ty manoriky ty fitsipikini-Jehovah mikasiky ty soa noho ty raty. Hainao va hoe ino ty antony? Retoa misy ohatsy: Eritsereto hoe tsy mitovy ty valerani-drala amintsika eto fa samby mana ty azy ty banky kidraidraiky. Ty drala 500 amy banky raiky, ohatsy, 50 ie lafa amy banky hafa. Ino ty ho vokany? Azo antoky fa hiteraky koronta raha zay. Ka manao akory koa laha misy dokotera tsy manaraky lalànani-fitsaboa lafa mitsabo. Mety ho maty olo tsaboany iny. Hitantsika baka amy zay fa ho voaaro ty olo laha mametraky fitsipiky noho manoriky ani-raha zay. Miaro antsika manahaky ani-zay koa ty fitsipiki-Ndranahary mikasiky ty soa noho ty raty.

8. Ino ty raha soa ho azoni-ze olo tea manao ty marina?

⁸ Tahini-Jehovah ze olo miay mifanaraky amy ty fitsipikiny. Mampitamà ie hoe: “Ty olo marina ro handova ty tany, ka hipetraky eo zisiky farany.” (Sal. 37:29) Azonao sary an’eritseritsy va hoe hanao akory ty fiaina laha samby manoriky ty fitsipikini-Jehovah iaby ty olo? Azo antoky fa hiharo raiky ty olo, hilongo soa sady ho falifaly. Fiaina manahaky ani-zay mihintsy ty teani-Jehovah hanananao. Misy antony soa mahavy antsika iaby tea ty fitsipikini-Jehovah mikasiky ty soa noho ty raty! Ino ty azontsika atao mba hahavy antsika ho tena tea ani-toetsy io? Handiniky raha telo azontsika atao tsika henanizao.

ANOVO AVAO ZE HITIAVANAO TY FITSIPIKINI-JEHOVAH

9. Ino ty hanampy antsika ho tea fahamarina?

⁹ Dingana 1: Tiavo Azy nanome fitsipiky iny. Mba hahavy antsika ho tea fahamarina, le tsy maintsy tea marè ani-Jehovah, azy nanome fitsipiky mikasiky ty soa noho ty raty iny tsika. Arakarakini-itiavantsika ani-Jehovah le vomaiky tsika ta hiay mifanaraky amy ty fitsipikiny. Eritsereto, ohatsy, Adama noho Eva. Laha nitea ani-Jehovah rozy le ho nanoriky avao ty raha nivolaniny.​—Gen. 3:1-6, 16-19.

10. Ino ty nataoni-Abrahama mba hahaizany soa ty hevitsini-Jehovah?

¹⁰ Tena tsy teantsika mihintsy ty hanao manahaky hadisoani-Adama noho Eva iny. Tsy hanao raha manahaky an’iny tsika laha mianatsy mikasiky ani-Jehovah avao, tea ty toetsiny, noho miezaky mahazo soa ty fomba fanaovany raha. Laha tsika manao ani-zay, le azo antoky hoe hitombo ty fitiavantsika ani-Jehovah. Eritsereto, ohatsy, Abrahama. Tena tea ani-Jehovah ie. Ndre tsy nazava soa taminy aza kindraiky ty fanapahan-kevitsini-Jehovah, le nanoriky avao ie fa tsy nizizo. Vomaiky aza ie niezaky hahay soa ani-Jehovah. Lafa nihainy, ohatsy, fa handripaky ani-Sodoma noho Gomora Jehovah, le natahotsy tse ie tsy no haripakini-Azy “Mpitsara ty tany iaby” iny miaraky amin’olo raty fanahy ty olo marina. Tsy nino Abrahama hoe hanao ani-zay vatany Ndranahary, farany ie nametraky fanontanea maromaro taminy. Nanam-pahareta Jehovah ka namaly ty fanontaneany. Niazoni-Abrahama avao tamy farany hoe mandiniky ty fon’olo kiraidraiky Jehovah, le tsy hosazìny miaraky amin’olo raty fanahy mihintsy ty olo marina.​—Gen. 18:20-32.

11. Akory ty nampisehoani-Abrahama hoe tea ani-Jehovah ie sady natoky Azy?

¹¹ Tena nisy vokany tamy Abrahama resadresaky nifanaovany tamy Jehovah mikasiky tanàni-Sodoma noho Gomora iny. Azo antoky fa vomaiky nitea noho nanaja ani-Babany iny ie. Fe tao maromaro tafara atoy, niatriky fitsapà tena sarotsy Abrahama. Ho hita amy zay hoe natoky ani-Jehovah va ie. Nivola taminy Jehovah mba hanao soro ani-Isaka, azy anakilahiny teany iny. Fe fa haini-Abrahama soa Ndranahariny io, ka tsy nametraky fanontanea taminy sasy ie. Nataony avao ze raha nampanaovini-Jehovah azy. Fe ndre zay, mba eritsereto hoe nanao akory ty alahelony lafa ie nanoma ani-raha nampanaovini-Jehovah azy iny! Tsy maintsy nandiniky soa ty raha fa nihainy mikasiky ani-Jehovah ie. Hainy fa tsy hanao tsy rariny mihintsy Jehovah na hanao raha tsy mampiseho fitiava. Nivola apostoly Paoly fa haini-Abrahama hoe ho vitani-Jehovah ty hamelo ani-Isaka ndraiky. (Heb. 11:17-19) Ankoatsini-zay, fa nampitamà koa Jehovah hoe ho lasa babani-firenena raiky Isaka, kanefa mbo tsy nanan’anaky Isaka tamy fotoa io. Tea ani-Jehovah Abrahama, ka natoky ie hoe hanao ty rariny avao Babany iny. Nanam-pinoa ie ka nanoriky ty safàny, ndre nisarotsy taminy aza raha iny.​—Gen. 22:1-12.

12. Akory ty hanahafantsika ani-Abrahama? (Salamo 73:28)

¹² Akory ty hanahafantsika ani-Abrahama? Mila mianatsy hahay soa ani-Jehovah avao tsika, manahaky ty nataony. Laha manao ani-zay tsika le hifandramby soa aminy sady vomaiky ho tea azy. (Vakio Salamo 73:28.) Ho voaofana soa koa ty feoni-fieritseretantsika ka ho haintsika ty hevitsini-Jehovah. (Heb. 5:14) Ino ty ho vokany? Ho vitantsika ty handà laha misy olo miezaky mitao antsika hanao raha raty. Tsy hieritseritsy hanao raha hampalahelo ani-Babantsika iny mihintsy koa tsika sady tsy hanao raha hanimba ty fifandrambesantsika aminy. Ino koa ty azontsika atao mba hampisehoa hoe tea fahamarina tsika?

13. Ino ty azontsika atao laha teantsika ty hanao ty marina avao? (Ohabolana 15:9)

¹³ Dingana 2: Miezaha ho tea manao ty marina avao sanandro. Laha teantsika hatanjaky soa ty hozatsintsika, le tsy maintsy miezaky manao sporo tsika sanandro. Tsy maintsy miezaky manahaky ani-zay koa tsika mba hahavy antsika ho tea ty fitsipikini-Jehovah. Tsy de sarotsy aloha ty manao ani-zay sanandro. Mahay mandanjalanja Jehovah ka tsy hampanao raha tsy ho vitantsika mihintsy ie. (Sal. 103:14) Manome toky antsika ie hoe “teany ze miezaky manao ty marina avao.” (Vakio Ohabolana 15:9.) Laha misy raha kendrè amy fanompoa ani-Jehovah, ohatsy, teantsika ho tratsiry, le tsy mieny tsika fa miezaky manatratsy ani-raha iny avao. Manahaky ani-zay koa laha ta hanao ty marina avao tsika. Mila miezaky avao tsika, sady Jehovah koa moa hanampy antsika avao mba hahavitantsika ani-zay. Hampeany koa tsika mba hanasoa tsikelikely ty toetsintsika.​—Sal. 84:5, 7.

14. Ino “fiarovan-tratra” io, le manino tsika ro mila ani-raha io?

¹⁴ Soa fanahy Jehovah ka mampitiaro antsika avao hoe tsy sarotsy ty manao ty marina. (1 Jaona 5:3) Vomaiky aza miaro antsika raha io sady mila ani-zay avao tsika sanandro. Tiarovo fialia fiarova nivolanini-apostoly Paoly iny. (Efes. 6:14-18) Ino amy fitaova fialia rey ro miaro ty foni-maramila? “Ty fiarovan-tratra.” Miaro ty fo “ty fiarovan-tratra” na “ty fanaova ty marina.” Manahaky fiarovan-tratra io ty fitsipiky marina napetrakini-Jehovah ka miaro ty fonao an’ohatsy, zany hoe miaro ty fanirianao, ty fihetseham-ponao, noho ty sainao. Anovo azo antoky zany hoe misy ani-fiarovan-tratra io ty fialia fiarovanao.​—Ohab. 4:23.

15. Ino ty azonao atao mba hisikina ty fiarovan-tratra?

¹⁵ Ino ty azonao atao mba hisikina ty fiarovan-tratra? Misiky ani-raha io iha laha mieritseritsy ty raha tea-Ndranahary hataonao, lafa misy fanapahan-kevitsy ataonao sanandro. Lafa iha hanapa-kevitsy hoe ino ty raha hovolaninao, ino ty moziky hojanjininao, ino ty fialam-boly hataonao, na boky manao akory ro hovakinao, le soa laha eritseretinao tse zao: ‘Ino ty raha teako hameno ty foko? Teani-Jehovah va laha manao ani-raha io aho? Hampirisiky ahy hijangajanga, ho satà, tsy ho mety afa-po, ho tea tena va raha io, kanefa raty ty fahitani-Jehovah ani-raha reo?’ (Fil. 4:8) Laha mifily hanao raha teani-Jehovah iha, le ho voaaro amy raha raty ty fonao.

16-17. Ino amy raha volanini-Isaia 48:18 ro manome toky antsika hoe ho vitantsika ty hiay mifanaraky amy ty fitsipikini-Jehovah?

¹⁶ Fa nisy fotoa va iha niasa loha hoe ho vitako avao va ty hiay mifanaraky amy ty fitsipikini-Jehovah sanandro sanandro noho mandavantao? Diniho tse moa ohatsy ampiasàni-Jehovah amy Isaia 48:18 ao toy. (Vakio.) Mampitamà Jehovah fa “hanahaky lozoky an-driaky eny” io ty fahamarinantsika. Eritsereto hoe mitsanga amy fasiky an-tsonin-driaky eny iha, le manenty ani-lozoky rey. Tsy mienieny rozy fa mifandimbindimby miantonta avao. Ka amy fotoa maha kalma azy rey, hieritseritsy va iha hoe mety hijano amy zay lozoky rey? Aha! Hainao fa nisy teo avao lozoky reo fa an’arivony tao, ka tsy maintsy mbo ho avy eo avao rozy.

¹⁷ Afaky hanahaky lozoky rey koa ty fahamarinanao! Amy fomba akory? Lafa misy fanapahan-kevitsy hataonao, le diniho tse hoe ino ty teani-Jehovah hataonao. Bakeo anovo raha iny! Ndre sarotsy manao akory aza ty fanapahan-kevitsy hataonao, le ho eo avao Babanao be fitiava iny hanome hery anao noho hanampy anao hanao raha soa avao sanandro.​—Isaia 40:29-31.

18. Manino tsika ro mila mitandrina mba tsy hitsaratsara olo?

¹⁸ Dingana 3: Engao Jehovah ro hitsara ty hafa. Lafa tsika miezaky mafy mba hiay mifanaraky amy fitsipikini-Jehovah, le tsy maintsy mitandrina mba tsy hitsaratsara olo ka hieritseritsy ty vatantsika ho marina. Tsy anjarantsika ty manenty hoe manao ty raha teani-Jehovah hataony vatany va olo iny. Tokony hotiarovintsika fa Jehovah ro “Mpitsara ty tany iaby.” (Gen. 18:25) Tsy nameani-Jehovah fahefà hitsara olo tsika. Nivola aza Jesosy hoe: “Ka mitsara sasy mba tsy hotsarà.”​—Mat. 7:1.c

19. Akory ty nampisehoani-Josefa hoe natoky ty fitsaràni-Jehovah ie?

¹⁹ Ndao ndraiky moa tsika handiniky ty ohatsini-Josefa. Olo marina ie satria tsy nitsaratsara olo. Ndre olo nanao raha raty taminy rey aza tsy nitsaratsaràny. Nampijaly azy rahalahiny rey, namarotsy azy ho andevo, le nataon-drozy ze hahavy ani-baban-drozy hino hoe nimaty Josefa. Tao maro tafara atoy le nifankahita tamy fianakaviany rey ndraiky Josefa. Lasa manam-pahefà anabo Josefa tamy zay, ka afaky nanasazy noho namaly faty ani-rahalahiny rey. Natahotsy rahalahiny rey hoe hanao ani-zay vatany Josefa, ndre fa nifona tamy raha nataon-drozy rey aza rozy. Fe nanome toky an-drozy Josefa hoe: “Ka matahotsy. Zaho moa Ndranahary ro hitsara anareo?” (Gen. 37:18-20, 27, 28, 31-35; 50:15-21) Niambany Josefa ka nieky ie hoe Jehovah raiky avao ro mana zo hitsara ani-rahalahiny rey.

20-21. Ino ty hanampy antsika tsy hieritseritsy ty vatantsika ho marina mandilatsy ty olo hafa?

²⁰ Manahaky ty nataoni-Josefa, le engantsika Jehovah ro hitsara ty olo hafa. Tsy tokony hieritseritsy, ohatsy, tsika hoe haintsika ty antony mahavy ani-rahalahy noho anabavintsika reo hanao raha raiky. Tsy mahay ty am-pon’olo ao tsika, ka tsy mahay ty antony anaovan’olo raha. ‘Jehovah raiky avao ro mandiniky ty antony anaovany ani-zay.’ (Ohab. 16:2) Teany ty olo iaby ndre baka aia ndre baka aia, ndre ino ino ty fomba mahazatsy azy. Mampirisiky antsika mihintsy aza Jehovah hoe: “Vohao midanadana ty fonareo.” (2 Kor. 6:13) Miezaky zany tsika ho tea ty rahalahy noho anabavintsika iaby fa tsy hitsaratsara an-drozy.

²¹ Tsy tokony hitsaratsara ty olo hafa tsy amy fiangona eo koa zany tsika. (1 Tim. 2:3, 4) Hitsaratsara ty longonao tsy mitovy finoa aminao va iha, ka hanao ho zao hoe: “Tỳ aloha tsy haneky fahamarina zao mihintsy”? Manambony tena tsika laha manao ani-zay sady mieritseritsy ty vatantsika ho marina. Mbo ameani-Jehovah fotoa “ty olombelo iaby” mba hahafahany mibebaky. (Asa. 17:30) Tiarovo avao zao: Azy olo mieritseritsy ty vatany ho marina mandilatsy ty olo hafa rey mihintsy ro tsy marina amy Jehovah.

22. Manino iha ro tapa-kevitsy ho tea manao ty marina avao?

²² Laha tea ty fitsipikini-Jehovah tsika, le ho falifaly avao. Ho modely soa ho ahi-ty hafa koa tsika amy zay ka lasa ta hifandramby amintsika rozy sady hifandramby soa amy Ndranahary. Enga anè tsika mba ho ‘kerè noho harandrano fahamarina’ avao. (Mat. 5:6) Matokisa fa hitani-Jehovah ty ezaky ataonao, le falifaly aminao ie satria miezaky manao ty marina avao iha. Mahereza ndre miharaty miharaty avao aza ty olo amy tontolo toy eto! Tiarovo avao fa “tea ty olo marina Jehovah.”​—Sal. 146:8.