Anovo Avao ze Hahamafy Fototsy ty Raha Tamaninao

1. Ino ty raha ampitamanini-Jehovah antsika?

MISY raha soasoa biby ampitamanini-Jehovah antsika. Tsy ino zay fa ty fiaina zisiky farany. Ho lasa zavaboary ara-panahy an-danitsy any ty sisany amintsika ka tsy ho mety maty. (1 Kor. 15:50, 53) Fa ty ankamaroantsika hiay mandrakizay an-tany etoy, sady ho lavorary noho ho sambatsy. (Apok. 21:3, 4) Fe ndre mitamà ho an-danitsy any tsika ndre mitamà ho an-tany etoy, le tena lafovily amintsika ty raha tamanintsika.

2. Miory amin’ino ty raha tamanintsika, le manino tsika ro afaky mivola ani-zay?

² Amy Baiboly ao ty safà hoe “mitamà”, le azo adika hoe ‘mandiny sady fa tsy mahaliny raha soa hiseho.’ Azo antoky raha tamanintsika reo satria Jehovah mihintsy ro nanome azy. (Rom. 15:13) Haintsika hoe ino ty raha fa nampitamaniny, le haintsika koa hoe tozoro tanterahiny avao ze raha volaniny. (Nom. 23:19) Matoky tsika fa sady maniry hanao ani-raha iaby nivolaniny reo Jehovah no mana hery hanatanteraha azy. Tsy nofinofy avao zany raha tamanintsika reo na hoe raha teantsika hiseho avao, fa haintsika hoe raha tena misy.

3. Ino ty hodinihintsika amy lahatsoratsy toy ato? (Salamo 27:14)

³ Tea antsika Babantsika an-danitsy any iny, ka teany laha matoky azy tsika. (Vakio Salamo 27:14.) Laha tena mitamà ani-Jehovah tsika, le ho vitantsika ty hiaritsy raha sarotsy. Hatanjaky noho ho falifaly avao koa tsika ndre ino ino ty raha mety hahazo antsika. Ndao hodinihintsika hoe manino ro miaro antsika ty raha tamanintsika. Fe hohenteantsika tse hoe manino ty raha tamanintsika ro azo ampitovizy amy nanga noho fiarovan-doha. Bakeo hodinihintsika hoe ino ty azontsika atao mba hanamafisa ty raha tamanintsika.

MANAHAKY NANGA TY RAHA TAMANINTSIKA

4. Manino ty raha tamanintsika ro ampitovizy amy nanga? (Hebreo 6:19)

⁴ Nampitovizini-apostoly Paoly amy nanga ty raha tamanintsika amy taratasy nisoratiny ho ani-Hebreo reo. (Vakio Hebreo 6:19.) Nandeha sambo matetiky ie ka hainy soa hoe mitanjaky ty sambo tsy hihetsiketsiky ty nanga. Ndraiky zay, lafa ie nandeha sambo le nisy tsioky nahery nandalo. Tamy fotoa iny, le nihitany mpanday sambo rey nandatsaky ani-nanga rey tanaty rano any mba hiarova ani-sambo iny tsy hidofotsy amy vato be. (Asa. 27:29, 39-41) Manahaky nanga io avao ty raha tamanintsika. Manampy antsika tsy hiala ani-Jehovah mihintsy raha io lafa tsika miatriky raha sarotsy manahaky tsioky mahery io. Manampy antsika ho kalma avao koa ty raha tamanintsika amy fotoa rey satria matoky tsika hoe mbo hihasoa avao ty raha iainantsika. Tiarovo fa fa nivola Jesosy hoe tsy maintsy henjehy tsika. (Jaona 15:20) Ka laha vetsevetsentsika ty raha ampitamanini-Jehovah antsika amy hoavy le tsy hieny tsika fa hanohy hanompo azy avao.

5. Manino ty fanana raha tamany ro nanampy ani-Jesosy lafa ie nivonoa?

⁵ Diniho moa hoe nanino ty fanana raha tamany ro nanampy ani-Jesosy tsy hivaliky mihintsy ndre fa nihainy aza hoe tena raty ty fomba hamonoa azy. Niresaky faminania raiky baka amy bokini-Salamo ao apostoly Petera tamy Pentekosta tao 33. Resahini-faminania io ty ho fihetsikini-Jesosy amy raha hahazo azy iny. Tsy hatahotsy ie fa ho kalma avao le hivola hoe: “Hana raha tamany avao aho, satria tsy ho foinao hijano an-dolo ao aho, sady tsy henganao ho lò mpanomponao tsy mivaliky [toy]. ... Hataonao falifaly biby aho anatrehanao eo.” (Asa. 2:25-28; Sal. 16:8-11) Fa nihaini-Jesosy hoe ho maty ie. Fe ndre zay, le natoky tanteraky ie hoe hovelomi-Ndranahary ie ka ho falifaly ndraiky hiaraky amy Babany an-danitsy any.​—Heb. 12:2, 3.

6. Ino ty nivolanini-rahalahy raiky toy mikasiky ty fanana raha tamany?

⁶ Manampy antsika koa ty fanana raha tamany. Maro zao ty rahalahy noho anabavintsika nahavita niaritsy vokatsini-zay. Diniho moa ty tantarani-Leonard Chinn, rahalahy nipetraky tan’Angletera any. Nigadrà ie tamy Aly Bevata Voalohany iny, satria tsy nety nanao maramila. Natoka pilasy tanatini-roe vola ie. Tafarani-zay ie, nampanaovy asa an-terivozo. Fe tsy nivaliky mihintsy ie. Ino ty nanampy azy? Hoy ty asany: “Hitako tamy raha nahazo ahy rey fa tena lafovily ty hoe mana raha tamany. Maro ty raha soasoa tamanintsika amy Baiboly ao. Tsy vitani-zay fa mbo mana modely maro koa tsika ao, ohatsy hoe Jesosy, apostoly rey, noho ty mpaminany maro hafa. Lasa mitamà hoavy soasoa tsika vokatsini-raha reo sady mahavita miaritsy.” Hita hoe nanga ho ani-Leonard vatany ty raha tamaniny. Afaky hanao ho zay koa tsika.

7. Manino tsika ro vomaiky matoky ty raha tamanintsika lafa miatriky raha sarotsy? (Romanina 5:3-5; Jakoba 1:12)

⁷ Lafa tsika miatriky raha sarotsy ka ampeani-Jehovah, le lasa tsapantsika hoe mahazo hatò aminy tsika. Lasa mihamafy fototsy amy zay ty raha tamanintsika vokatsini-zay. (Vakio Romanina 5:3-5; Jakoba 1:12.) Vomaiky matoky ty raha tamanintsika koa tsika laha ampitovizy amy tamintsika vo naharè ty vaovao soa iny. Teani-Satana laha maneky ho resy tsika lafa miatriky raha sarotsy, fe ampeani-Jehovah tsika ka mahavita miaritsy avao.

MANAHAKY FIAROVAN-DOHA TY RAHA TAMANINTSIKA

8. Manino ty raha tamanintsika ro ampitovizy amy fiarovan-doha? (1 Tesalonianina 5:8)

⁸ Ampitovizini-Baiboly amy fiarovan-doha koa ty raha tamanintsika. (Vakio 1 Tesalonianina 5:8.) Manisy fiarovan-doha ty maramila mba hiarova ty lohany tsy ho azoni-balakititsy alefani-fahavalony. Mialy amy Satana koa tsika, ka mila miaro ty saintsika tsy ho azoni-fanafihany. Mampiasa raha maro sankarazany ie mba hangalà fanahy antsika noho hanimbà ty saintsika. Fe afaky tsy hivaliky mihintsy tsika satria miaro ty saintsika raha tamanintsika rey, manahaky fiarovan-doha miaro ty lohani-maramila rey avao.

9. Manao akory ty olo lafa tsy mana raha tamany?

⁹ Hanampy antsika handramby fanapahan-kevitsy soa ty fitamanantsika fiaina zisiky farany. Fe laha tsy tena mafy fototsy raha tamanintsika io sady laha ty raha irintsika avao ro eritseretintsika, le mety hohalinontsika raha tamanintsika iny, zany hoe ty fiaina zisiky farany. Ho zay mihintsy ty raha nahazo ty Kristiana sisany nipetraky ta Korinto any. Tsy nino ani-raha bevata nampitamani-Ndranahary iny sasy rozy, tsy ino zay fa ty fameloma ty maty. (1 Kor. 15:12) Nivola Paoly fa ta hanome fahafaham-po ty faniriany avao ty olo tsy mino ty fameloma ty maty. (1 Kor. 15:32) Tsy mana raha tamany koa ty ankamaroan’olo henanizao. Manao ze azon-drozy atao amy zay rozy mba hahasoasoa ty fiainan-drozy. Fe tsy manahaky ani-zay tsika satria matoky ty raha ampitamani-Ndranahary antsika. Manahaky fiarovan-doha ty raha tamanintsika ka miaro ty saintsika sady manampy antsika tsy hieritseritsy marè mikasiky ty vatantsika avao, satria hanimba ty fifandrambesantsika amy Jehovah raha zay.​—1 Kor. 15:33, 34.

10. Manino ty fanana raha tamany ro manampy antsika tsy ho diso hevitsy?

¹⁰ Ty fananantsika raha tamany koa le manampy antsika tsy hieritseritsy hoe tsy ho vitantsika mihintsy ty hampifalifaly ani-Jehovah. Mety hisy, ohatsy, hieritseritsy hoe: ‘Tsy ho anisan’olo ho velo mandrakizay rey mihintsy aho. Tsy maeva ani-zay aho. Tsy ho vitako mihintsy ty hanao raha tea-Ndranahary.’ Tiarovo fa nampiasa safà mitovitovy amy zay koa Elifaza lafa niresaky tamy Joba. Nivola ie hoe: “Ino koa moa olombelo mety maty zao ro halio?” Ankoatsini-zay, zao ty nivolaniny mikasiky a Ndranahary: “Henteo fa ndre ty anjeliny aza tsy atokisany, sady ndre ty lanitsy aza tsy malio amasony eo.” (Joba 15:14, 15) Halakoa vandy zao! Tiarovo fa zay mihintsy ty teani-Satana hoeritseretinao. Hainy fa laha mieritseritsy ho zay avao iha, le lasa hihamanjavozavo ty fahitanao ty raha tamaninao. Alao an-tsainao ao zany eritseritsy zay, le mifantoha amy ty raha ampitamanini-Jehovah. Matokisa fa teany ho velo tsy misy farany iha sady hanampy anao hahazo ani-zay ie.​—1 Tim. 2:3, 4.

ANOVO AVAO ZE HAHAMAFY FOTOTSY TY RAHA TAMANINAO

11. Manino tsika ro tokony hahaliny lafa mandiny ty hahatanteraky ty raha tamanintsika?

¹¹ Tsy mora ty hoe miezaky hana raha tamany avao. Mety fa tsy linintsika ty hanatanteraha-Ndranahary ty raha nampitamaniny. Fe hafa mihintsy ty fomba fahitani-Jehovah ty fotoa satria ie fa nisy avao bakany bakany zay. (2 Pet. 3:8, 9) Hotanterahiny amy fomba farani-ze soa ty raha nampitamaniny, fe mety tsy ho amy fotoa ieritseretantsika azy ty hanaovany ani-raha zay. Mila mahaliny ty hanatanteraha-Ndranahary ty fampitamanany zany tsika. (Jak. 5:7, 8) Fe zisiky hiaviani-zay, ino ty hanampy antsika hana raha tamany avao?

12. Laha hentea ty Hebreo 11:1, 6, manino ro mifandramby ty finoa noho ty fanana raha tamany?

¹² Tokony hataontsika an-tsay avao raha tamanintsika rey laha teantsika ty hifandramby soa amy Jehovah, satria ie avao ro hanatanteraky ani-raha rey. Mba hahavy antsika hana raha tamany, le tsy maintsy mino tsika hoe misy Jehovah sady “mpanome raha soa ani-ze olo sahira mila azy.” (Vakio Hebreo 11:1, 6.) Arakaraky ty inoantsika ani-Jehovah, le vomaiky tsika hatòky hoe hotanterahiny iaby ze raha nampitamaniny. Ndao tsika handiniky hevitsy vitsivitsy hanampy antsika hanamafy ty fifandrambesantsika amy Jehovah noho hahavy antsika hana raha tamany avao.

13. Ino ty azontsika atao mba hamonjea a Ndranahary?

¹³ Mivavaha amy Jehovah, le vakio ty Safàny. Marina fa tsy afaky mahita ani-Jehovah tsika, fe azontsika atao ty mamonjy azy. Afaky miresaky aminy amy vavaky tsika sady matoky hoe hijanjy antsika ie. (Jer. 29:11, 12) Afaky mijanjy a Ndranahary koa tsika lafa mamaky noho mametsivetsy ty Safàny. Ho hitantsika ao ty fomba nikarakarani-Jehovah ze olo tsy nivaliky taminy taloha tany. Arakaraky ty amakiantsika ani-tantara rey le vomaiky tsika hana raha tamany. Ze raha iaby amy Safà-Ndranahary ao le “nisoraty mba hampianara antsika, amy zay tsika hana raha tamany, satria manampy antsika hiaritsy sady manome fampionona antsika ty Soratsy Masy.”​—Rom. 15:4.

14. Manino tsika ro mila mametsivetsy ty raha nataoni-Jehovah ho ahi-ty hafa?

¹⁴ Vetsevetseo ty fomba nanatanterahani-Jehovah ty raha nampitamaniny. Eritsereto ty raha natao-Ndranahary ho ani-Abrahama noho Saraha. Fa niantitsy marè rozy ka fa tsy afaky niteraky. Fe nampitamà an-drozy Ndranahary hoe hanan’anaky rozy. (Gen. 18:10) Nanao akory ty fihetsikini-Abrahama? Mivola ty Baiboly hoe: “Nino [ie] hoe mety ho lasa babani-firenena maro.” (Rom. 4:18) Fa tsy misy raha tamany aloha ty amin-drozy laha amy fahitan’olombelo azy. Fe ndre zay, natoky Abrahama hoe hotanterahini-Jehovah raha nampitamaniny iny. Tsy nidiso fanantenà lahilahy tsy nivaliky io. (Rom. 4:19-21) Afaky matoky zany tsika fa tsy maintsy hanatanteraky ty raha nampitamaniny avao Jehovah, ndre atao raha fa tsy misy hevitsy aza ty fahitantsika ty raha misy. Tena andrambesantsika fianara vatany ty tantara manahaky ani-reo.

15. Manino tsika ro tokony hametsivetsy ty raha fa natao-Ndranahary ho antsika?

¹⁵ Vetsevetseo ty raha fa nataoni-Jehovah ho anao. Eritsereto fampitamana amy Safà-Ndranahary ao rey, le henteo hoe aia amy raha rey ro fa nitanteraky taminao. Nampitamà, ohatsy, Jesosy fa hameani-Babany anao ze raha tena ilànao amy fiaina. (Mat. 6:32, 33) Nanome toky anao koa Jesosy fa hameani-Jehovah ty fanahiny masy iha lafa mangataky aminy. (Lioka 11:13) Nitanterahini-Jehovah iaby fampitamana reo. Azo antoky fa tiaronao koa ty raha hafa nampitamaniny anao. Nampitamà, ohatsy, ie fa hanenga ty hadisoanao, hampahery anao, sady hanome ze raha ilànao mba hanampea anao tsy hivaliky aminy. (Mat. 6:14; 24:45; 2 Kor. 1:3) Laha iha mametsivetsy ty raha fa natao-Ndranahary ho anao, le vomaiky iha hatòky fa hotanterahiny koa ty raha ampitamaniny anao amy hoavy.

MIFALIFALEA AMY RAHA TAMANY

16. Manino ro tena lafovily ty raha tamanintsika?

¹⁶ Fanomeza tena lafovily baka amy Ndranahary ty fitamanantsika fiaina zisiky farany. Fa tsy linintsika ty hiaviani-hoavy soasoa io, satria azontsika antoky hoe tsy maintsy hiseho raha zay. Nanga ho antsika raha io, satria manampy antsika hiaritsy raha sarotsy, hahatanty fanenjeha, noho hiaritsy fahafatesa mihintsy aza. Fiarovan-doha ho antsika koa raha io, satria miaro ty saintsika mba tsy hieritseritsy raha raty sady manampy antsika hanao raha soa avao. Manampy antsika hahay soa a Ndranahary raha tamanintsika amy Baiboly ao reo, sady mampiseho amintsika hoe tena tea antsika ie. Tena handramby soa tsika laha ataontsika mazava soa amintsika avao raha tamanintsika io.

17. Manino ty raha tamanintsika ro mahavy antsika ho falifaly?

¹⁷ “Mifalia amy raha tamany.” Zay ty fampirisiha nameani-apostoly Paoly tamy taratasy nisoratiny ho ani-Romanina reo. (Rom. 12:12) Nifalifaly Paoly satria natoky ie hoe laha tsy mivaliky ie, le hahazo fiaina zisiky farany an-danitsy any. Afaky mifalifaly amy ty raha tamanintsika koa tsika satria matoky tsika fa hotanterahini-Jehovah ze raha nampitamaniny. Marina mihintsy ty raha volanini-​Salamo 146: 5, 6 hoe: “Sambatsy ze ... mitamà ani-Jehovah Ndranahariny, ... Azy tsy mivaliky mihintsy iny.”