“Ho Velo ty Anadahinao”!

1. Akory ty nampisehoani-ajà lahilahy io fa tena nino ie hoe hovelomy ty maty?

NARARY mafy ajà lahilahy mana anara Matthew zay, le natao operasion matetiky. Niaraky nanenty fandahara Tele JW sambola rey rozy mianakavy tamy ie ni-7 tao. Lafa narìny ho tampitsy fandahara iny, le nisy hirahira miresaky fameloma ty maty zay. Ahità olo mitsena ty longony nimaty rey video iny.b Lafa nivita amy zay fandahara iny, le namonjy ani-babany noho reniny Matthew. Sady nitanjaky ty tanan-drozy ie ro nivola hoe: “Hitanareo, ndre maty aza aho, le mbo hovelomy ndraiky. Ka malahelo fa tsy maintsy hifankahita tsika.” Mba eritsereto moa hoe ino ty nitsapani-ray aman-dreniny rey lafa nahita hoe tena natoky anakilahin-drozy iny fa hovelomy vatany ty maty.

2-3. Manino ro mahasoa antsika ty mametsivetsy ani-fampitamana fameloma ty maty iny?

² Soa laha vetsevetsentsika avao fampitamanani-Baiboly mikasiky fameloma ty maty iny. (Jaona 5:28, 29) Ino ty antony? Satria tsy haintsika mihintsy ndre harary mafy tsika ndraiky andro any na mety hisy longontsika maty. (Mpito. 9:11; Jak. 4:13, 14) Afaky manampy antsika hiaritsy ani-raha sarotsy reo ty fitamana hoe hovelomy ndraiky ty maty. (1 Tes. 4:13) Manome toky antsika ty Soratsy Masy hoe mahay antsika soa Babantsika an-danitsy any iny sady tena tea antsika. (Lioka 12:7) Mba eritsereto amy zay moa! Satria haini-Jehovah Ndranahary soa tsika, le tsy hanjary olo hafa tsika lafa hovelominy fa mbo eo avao ty maha ie antsika. Tena tea antsika vatany Jehovah ka nameany fahafaha ho velo mandrakizay tsika! Ka ndre ho maty aza tsika, le hovelominy ndraiky.

³ Hodinihintsika voalohany amy lahatsoratsy toy ato hoe manino tsika ro mino fa hovelomy ty maty. Bakeo tsika handiniky ani-tantara tena mampahery amy Baiboly ao iny. Nalà baka amy tantara io ty lohatenini-fianarantsika toy hoe: “Ho velo ty anadahinao.” (Jaona 11:23) Le amy farany tsika hanenty hoe ino ty azontsika atao mba hahavy antsika hatòky fa tena hovelomy vatany ty maty.

MANINO TSIKA RO MINO FA HOVELOMY TY MATY?

4. Tokony ho resy lahatsy amin’ino tse tsika mba hahafahantsika matoky fampitamana raiky? Manomeza ohatsy.

⁴ Mba hahafahantsika matoky fampitamana raiky, le tsy maintsy resy lahatsy tsika hoe tena maniry hanatanteraky ani-raha nampitamaniny iny azy nampitamà antsika iny sady mana hery, na fahaiza hanaova ani-zay. Toy misy ohatsy: Eritsereto hoe nisy tsioky be nanimba ty tranonao. Misy namanao amy zay avy aminao eo le mampitamà hoe: ‘Ao fa hanampy anao hamboatsy ani-tranonao toy aho.’ Hitanao hoe tena baka am-pony raha volaniny iny, farany iha resy lahatsy hoe tena ta hanampy anao vatany ie. Laha mahay mamboatsy trano ie sady mana fitaova, le vomaiky iha hieky hoe mahavita manampy anao ie. Tsy misalasala zany iha fa matoky ani-fampitamana nameany iny. Ka manao akory koa lafa nampitamà Ndranahary hoe hovelominy ty maty? Tena maniry hanatanteraky ani-zay va ie sady mana hery hanaova ani-zay?

5-6. Manino tsika ro afaky matoky fa tena maniry hamelo ty maty Jehovah?

⁵ Tena maniry hamelo ty maty va Jehovah? Azo antoky aloha zay. Maromaro ty olo nampanoratiny ani-fampitamanany io amy Baiboly ao. (Isaia 26:19; Hosea 13:14; Apok. 20:11-13) Sady lafa mampitamà raha Jehovah, le tsy maintsy tanterahiny avao raha iny. (Jos. 23:14) Laha ty marina, le fa tsy linini-Jehovah ty hamelo ndraiky an’olo nimaty rey. Manino tsika ro mivola ani-zay?

⁶ Diniho ty raha nivolanini-Joba. Natoky ie fa laha maty ie, le fa tsy linini-Jehovah ty hahita azy ndraiky. (Joba 14:14, 15, f.a.p) Mbo mitovy amy zay avao koa ty tsapani-Jehovah amy mpanompony iaby nimaty rey. Fa tsy lininy ty hamelo an-drozy ndraiky. Ho salama soa rozy amy zay sady ho falifaly. Ka manao akory olo maro biby nimaty fe tsy afaky nianatsy mikasiky ani-Jehovah rey? Be fitiava Ndranaharintsika iny, ka teany hovelomy koa rozy. (Asa. 24:15) Teany laha mba lasa namany noho ho velo mandrakizay an-tany etoy olo rey. (Jaona 3:16) Hitantsika baka amy zay fa tena maniry hamelo ty maty vatany Jehovah.

7-8. Manino tsika ro afaky matoky fa mana hery hameloma ty maty Jehovah?

⁷ Mana hery ahafahany mamelo ty maty koa va Jehovah? Mazava ho azy! Ie ro “Farani-Ze Mahery.” (Apok. 1:8) Tsy misy fahavalo tsy ho resiny zany, ndre fahafatesa zay. (1 Kor. 15:26) Tena mampahery antsika ty mahay ani-zay. Zay mihintsy ty raha nitsapani-Ranabavy Emma Arnold. Niatriky raha tena sarotsy mety ho nampivaliky an-drozy tamy Jehovah rozy trano raiky tamy Aly Bevata Faharoe iny. Nampahery ani-anakampelany rey Emma satria nimaty tamy tobini-Nazỳ any ty olo nifandramby marìny amin-drozy, le hoy ty asany: “Laha tsy ho velo sasy olo nimaty rey, le midika zay hoe mbo mahery mandilatsy a Ndranahary fahavalontsika iny, zany hoe ty fahafatesa. Fe tsy marina raha zay.” Tsy misy mahery mandilatsy ani-Jehovah! Azo antoky fa vitani-Ndranahary farani-ze mahery namoro ty ay iny, ty mamelo ndraiky ani-olo nimaty rey.

⁸ Ino koa ty ahaizantsika hoe tena mahavita mamelo ty maty Ndranahary? Tsy misy fetrany ty fahatiarovany raha. Kaihiny amy anarany iaby, ohatsy, ty basia kiraidraiky. (Isaia 40:26) Tiarony koa zany olo nimaty rey. (Joba 14:13; Lioka 20:37, 38) Tiarony iaby ty tsipiriany malinidiniky mikasiky ani-olo hovelominy rey, anatini-zay ty toetsy maha ie an-drozy, ty raha niainan-drozy, noho ty raha nitiaron-drozy.

9. Manino iha ro mino hoe hovelomini-Jehovah vatany ty maty?

⁹ Afaky matoky tsika fa hovelomini-Jehovah vatany ty maty, satria haintsika hoe sady maniry hanao ani-zay ie no mana hery hanaova ani-zay koa. Toy koa mbo misy antony hafa mahavy antsika mino ani-fampitamana-Ndranahary io: Fa nanao ani-zay Jehovah taloha tany. Nisy lahilahy vitsivitsy nanam-pinoa, ohatsy, tamy androni-Baiboly, nameany hery hameloma ty maty. Anisani-zay Jesosy. Ndao moa tsika handiniky ty raiky amy fameloma ty maty nataoni-Jesosy rey. Amy Jaona toko faha-​11 ao ty misy ani-tantara io.

NIMATY NAMANI-JESOSY TENA TEANY INY

10. Ino ty raha niseho laha mbo nitory tampitani-vavaranoni-Jordana any Jesosy, le ino ty nataony? (Jaona 11:1-3)

¹⁰ Vakio Jaona 11:1-3. Alao sary an’eritseritsy ty raha niseho ta Betania tany tamy faramparani-tao 32. Nisy namani-Jesosy rezay nipetraky tamy tanà io tany, tsy ia zay fa Lazarosy miaraky amy Maria noho Marta anabaviny. (Lioka 10:38-42) Fe narary Lazarosy, le niasa loha anabaviny rey. Farany rozy naniraky olo nana amy Jesosy any. Tampitani-Vavaranoni-Jordana any Jesosy tamy fotoa io, zany hoe lian-tomboky roe andro eo ho eo vo avy ta Betania any. (Jaona 10:40) Nampalahelo moa fa nimaty Lazarozy lafa niavy tamy Jesosy any olo nirahy iny. Ndre fa nihaini-Jesosy aza hoe nimaty namany iny, le mbo nijano tamy tanà nisy azy io tany avao ie tanatini-roe andro. Tafarani-zay ie vo nandeha a Betania any. Fa nimaty efatsy andro amin’io Lazarosy lafa Jesosy niavy tany. Ta hanao raha hahasoa ani-namany reo noho hanomeza voninahitsy a Ndranahary Jesosy.​—Jaona 11:4, 6, 11, 17.

11. Ino ty ianarantsika baka amy tantara iny amy resaky finamà?

¹¹ Misy raha ianarantsika mikasiky finamà baka amy tantara iny. Eritsereto tse moa: Lafa nandefa hafatsy tamy Jesosy any Maria noho Marta, le tsy nangataky azy mba ho avy a Betania any. Nivolanin-drozy avao ie hoe marary namany tena teany iny. (Jaona 11:3) Lafa nimaty Lazarosy, le azoni-Jesosy atao ty namelo azy, ndre lavitsy any avao ie. Fe tsy zay ty nataony. Naleony nandeha a Betania any mba hiaraky amy Maria noho Marta namany. Misy namanao tonga de avy hanampy anao va ndre tsy nangataky fanampea taminy aza iha? Hainao hoe azo iantehera ie ka mila fanampea aminy avao iha ndre amy “fotoa sarotsy” aza. (Ohab. 17:17) Manahaky ani-Jesosy, le enga anè tsika mba ho nama manahaky ani-zay ho ahi-ty hafa! Ndao tse moa tsika himpoly amy tantara iny any ndraiky, le hohenteantsika hoe ino ty raha niseho tafarani-zay.

12. Ino ty raha nampitamanini-Jesosy ani-Marta, le manino ie ro natoky ani-fampitamana io? (Jaona 11:23-26)

¹² Vakio Jaona 11:23-26. Nireni-Marta hoe fa nihanariny ani-Betania Jesosy. Avy le nilay nana aminy any ie, le nivola hoe: “Laha teto lahy iha Tompo, le tsy ho nimaty anadahiko iny.” (Jaona 11:21) Marina hoe afaky nitaha ani-Lazarosy Jesosy. Fe ta hanao raha mandilatsy ani-zay Jesosy. Nampitamà ie hoe: “Ho velo ty anadahinao.” Niresahiny tamy Marta koa hoe ino ty antony tokony hahavy azy hatòky ani-fampitamanany io. Hoy ty asany: “Zaho ro fameloma ty maty noho fiaina.” Tena marina zay satria namea-Ndranahary hery hameloma ty maty Jesosy. Talohani-zay ie fa namelo ajà ampela raiky vo nimaty zay noho namelo mpamaraky raiky fa nimaty tanatini-lera vitsivitsy. (Lioka 7:11-15; 8:49-55) Fe mety ho vitany va ty hamelo olo fa nimaty tanatini-efatsy andro, sady tsy vitani-zay fa nihasimba ty nofotsiny?

“LAZAROSY, MIBOAHA!”

13. Laha hentea ty Jaona 11:32-35, nanao akory Jesosy lafa nahita ani-Maria noho olo niaraky taminy rey nitany? (Henteo koa sary io.)

¹³ Vakio Jaona 11:32-35. Henteo hoe ino ty raha niseho tafarani-zay. Namonjy ani-Jesosy koa Maria. Mbo nampimpoly ani-raha nivolanini-rahavaviny iny avao ie. Hoy ty asany: “Laha teto lahy iha Tompo, le tsy ho nimaty anadahiko iny.” Nitany ie, le ho zay koa olo niaraky taminy rey. Nalahelo biby Jesosy lafa nahita an-drozy nitany. Niferinesany namany rey ka nilatsaky koa ty ranomasony. Hainy hoe tena maharary maty longo zao. Azo antoky hoe fa tsy lininy ty hangalaky ani-raha nampitany an-drozy iny!

14. Ino ty ianarantsika mikasiky ani-Jehovah baka amy fihetsikini-Jesosy lafa ie nahita ani-Maria nitany?

¹⁴ Lafa nitany Maria le nitany koa Jesosy. Hitantsika tamy fihetsikini-Jesosy iny hoe Ndranahary miferinay olo Jehovah. Manino tsika ro mivola ani-zay? Nihitantsika tamy lahatsoratsy taloha tao iny hoe nitovy tanteraky tamy Babany ty fomba fisainani-Jesosy noho ty fihetseham-pony. (Jaona 12:45) Nitany Jesosy satria niferinay ani-namany nitany rey. Hitantsika baka amy zay fa tena malahelo koa zany Jehovah lafa mahita antsika mitany. (Sal. 56:8) Tsy mahavy anao ta hamonjy marìny ani-Ndranaharintsika soa fanahy iny va raha zay?

15. Laha hentea tantara amy Jaona 11:41-44, ino ty raha niseho tamy fasani-Lazarosy any? (Henteo koa sary io.)

¹⁵ Vakio Jaona 11:41-44. Niavy tamy fasani-Lazarosy iny any Jesosy, le nampangalàny vato tamy varavarani-fasana iny. Tsy naneky Marta fa nivola hoe tsy maintsy fa simba zay faty iny. Hoy Jesosy: “Tsy fa nivola taminao moa aho hoe laha mino iha, le hahita ty voninahitsi-Ndranahary?” (Jaona 11:39, 40) Bakeo Jesosy niandra le nivavaky tamason’olo maro eo. Ta hanome voninahitsy ani-Jehovah ie amy raha hiseho manaraky eo. Bakeo nikaiky amy zay Jesosy hoe: “Lazarosy, miboaha!” Niboaky baka an-dolo ao vatany Lazarosy! Nahavita raha tsy nieritseretin’olo ho vita mihintsy Jesosy.​—Henteo ty lahatsoratsy hoe “Nahoana no afaka efatra andro i Jesosy vao tonga tany amin’ny fasan’i Lazarosy?” amy Tilikambo Fiambena 1 Zanviè 2008.

16. Manino tantara amy Jaona toko faha-​11 io ro vomaiky mahavy antsika hatòky hoe tena hovelomy vatany ty maty?

¹⁶ Vomaiky mahavy antsika hatòky tantara amy Jaona toko faha-​11 ao io hoe hovelomy vatany ty maty. Fa manino? Tiarovo fampitamana nameani-Jesosy ani-Marta iny hoe: “Ho velo ty anadahinao.” (Jaona 11:23) Manahaky ani-Babany, le tena maniry hanatanteraky ani-fampitamana io Jesosy, sady mana hery hanaova ani-zay. Hitantsika baka amy taniny iny fa tena maniry hamelo ty maty noho hangalaky ty alahelo aterakini-raha zay ie. Mbo nasehoni-Jesosy ndraiky hoe mana hery hameloma ty maty ie lafa niboaky baka an-dolo ao Lazarosy. Eritsereto koa raha nampitiarovini-Jesosy ani-Marta iny. Hoy ty asany: “Tsy fa nivola taminao moa aho hoe laha mino iha, le hahita ty voninahitsi-Ndranahary?” (Jaona 11:40) Misy antony soa zany mahavy antsika mino hoe hotanterahi-Ndranahary fampitamanany iny hoe hovelomy ty maty. Fe ino ty azontsika atao mba hahavy antsika hatòky hoe tena hovelomy vatany ty maty?

INO TY AZONTSIKA ATAO MBA HAHAVY ANTSIKA HATÒKY HOE TENA HOVELOMY VATANY TY MATY?

17. Ino ty raha tokony hotiarovintsika lafa tsika mamaky tantara mikasiky fameloma ty maty amy Baiboly ao rey?

¹⁷ Vakio noho vetsevetseo fameloma ty maty taloha tany rey. Miresaky tantaran’olo valo nivelomy tamy maty tan-tany eto ty Baiboly.c Ianaro soa tantara rey. Lafa manao ani-zay iha, le tiarovo hoe tena nisy lahilahy, ampela, noho ajà resahiny ao reo. Henteo hoe ino ty azonao ianara. Eritsereto hoe manino tantara reo kiraidraiky ro mampiseho fa tena maniry hamelo ty maty Ndranahary sady mana hery hanaova ani-zay. Vetsevetseo soa fameloma ani-Jesosy iny, satria iny ro tena miavaky amy fameloma ty maty voaresaky amy Baiboly ao. Tiarovo fa an-jatony ty olo nahita hoe nivelomy Jesosy, le fameloma azy zay ro mahavy antsika tena mino hoe hovelomy vatany ty maty.​—1 Kor. 15:3-6, 20-22.

18. Akory ty azonao ampiasà soa ani-hirantsika mikasiky fameloma ty maty rey? (Henteo koa ty fanamariha ambany pejy.)

¹⁸ Janjino, hirao, noho vetsevetseo hira mikasiky fameloma ty maty rey.d (Efes. 5:19) Manatanjaky ty finoantsika hira rey, sady mahavy antsika hatòky hoe tena hovelomy vatany ty maty. Janjino raha rey. Ampolimpolio, amy zay ho hainao soa, le resadresaho amy fotoam-pivavahani-fianakavianareo ty tononi-hira rey. Tiarovo tonony rey sady vetsevetseo, soa hilentiky am-po noho an-tsainao ao. Lafa miatriky raha sarotsy amy zay iha na maty longo le hanampy anao ty fanahini-Jehovah ka ho tiaronao hira rey. Hampahery noho hampionona anao raha rey amy zay.

19. Ino ty raha mety hoeritseretintsika mikasiky fameloma ty maty? (Henteo ty efajoro hoe “Ino ty Raha Hanontaneanao An-drozy?”)

¹⁹ Ampiasao ty sainao. Nameani-Jehovah fahaiza tsika ka afaky mangalaky sary an’eritseritsy ty tontolo vaovao. Nivola ranabavy raiky zay hoe: “Nanoka fotoa maro aho mba hangalako sary an-tsay hoe io aho amy tontolo vaovao ao, le maharè ani-fofoni-folera soasoa amy Paradisa ao rey.” Eritsereto hoe mifankahita amy lahilahy noho ampela manam-pinoa tamy androni-Baiboly rey iha. Ia amin’olo rey ro tena fa tsy lininao ty hahita azy? Ino ty fanontanea hapetrakinao aminy? Eritsereto koa hoe tafaraky ndraiky amy longonao nimaty rey iha. Eritsereto hoe ino ty raha hovolaninao amin-drozy voalohany, hanao akory iha lafa mandrakoky an-drozy, le hanao akory ty hafaleanao lafa mahita an-drozy.

20. Tokony ho tapa-kevitsy hanao ino tsika?

²⁰ Isaorantsika Jehovah satria mampitamà antsika hoe hovelominy ndraiky ty maty. Afaky matoky tsika fa ho tanteraky fampitamana io, satria tena maniry hanao ani-zay Jehovah sady mana hery hanaova ani-zay koa. Loniky lahy tsika ho tapa-kevitsy hanatanjaky ty finoantsika avao mba hahavy antsika hatòky ani-fampitamana soasoa io. Laha manao ani-zay tsika, le hifandramby marìny amy Ndranahary mampitamà antsika iny hoe: ‘Ho velo ty longonao!’