Hatanjaho ty Finoanao ani-Tontolo Vaovao Ampitamanini-Jehovah Iny

1-2. Mila manao ino tsika zisiky hiaviani-tontolo vaovao?

MAMPITAMÀ Jehovah hoe hosoloany tontolo vaovao hanjakàni-fahamarina tontolo misy antsika toy. (2 Pet. 3:13) Tena lafovily amintsika fampitamanani-Jehovah zay. Tsy haintsika aloha hoe ombia ty hiaviani-tontolo vaovao io. Fe hitantsika amy ty raha miseho amy tontolo toy eto hoe tena fa marìny raha io.​—Mat. 24:32-34, 36; Asa. 1:7.

² Samby mila manatanjaky ty finoantsika ani-raha ampitamanini-Jehovah io tsika iaby, ndre fa ela ndre vo betibety ty nahaizantsika fahamarina. Ino ty antony? Satria mety hihamalemy finoantsika io ndre matanjaky manao akory aza. Nikaihini-apostoly Paoly hoe “ota mora manakasaka” antsika ty tsy fahampia finoa. (Heb. 12:1) Mba tsy hampihena ty finoantsika, le mila dinihintsika soa ty porofo mampiseho hoe tena hisy vatany ty tontolo vaovao.​—Heb. 11:1.

3. Ino ty hodinihintsika amy lahatsoratsy toy ato?

³ Ino ty azontsika atao mba hahavy antsika hatòky hoe tena hisy vatany tontolo vaovao ampitamanini-Jehovah iny? Handiniky fomba telo anaova ani-zay tsika amy lahatsoratsy toy ato: 1) Mametsivetsy ty vilim-panavota, 2) mandiniky ty herini-Jehovah, le 3) manao raha mba hahavy antsika hifandramby marìny amy Jehovah. Hodinihintsika koa hoe manino hafatsy niresahini-Jehovah tamy Habakoka iny ro manatanjaky ty finoantsika. Fe ndao tse hodinihintsika ty raha sisany mety hatrehintsika henanizao ka mahavy antsika tena mila matoky ani-tontolo vaovao ho avy iny.

RAHA SISANY MITAKY FINOA MATANJAKY

4. Ino ty fanapahan-kevitsy mila finoa matanjaky?

⁴ Mandramby fanapahan-kevitsy avao tsika sanandro le mitaky finoa matanjaky raha rey. Ohatsy hoe resaky nama, fialam-boly, fianara, fanambalea, fiteraha, noho asa. Soa tsika laha mieritseritsy hoe: ‘Hita amy fanapahan-kevitsy ataoko va fa tena matoky aho hoe mandalo avao tontolo toy, sady kely sisa le hosoloa-Ndranahary tontolo vaovao? Sa manahaky ty raha ataon’olo tsy mino fiaina mandrakizay rey avao ty raha ataoko?’ (Mat. 6:19, 20; Lioka 12:16-21) Handramby fanapahan-kevitsy soa tsika laha matoky hoe tena fa marìny ty tontolo vaovao.

5-6. Manino tsika ro mila finoa matanjaky lafa miatriky raha sarotsy? Manomeza ohatsy.

⁵ Miatriky raha sarotsy koa tsika, le ilà finoa matanjaky raha rey. Mety hiatriky fanenjeha, ohatsy, tsika na harary mafy, na hiatriky raha hafa mety hahakivy antsika. Mety hieritseritsy tse tsika amy voalohany hoe vitantsika ty miaritsy ani-problemo mahazo antsika iny. Fe lafa maharitsy ela raha iny, le mila finoa matanjaky tsika mba hahafahantsika miaritsy noho ho falifaly avao manompo ani-Jehovah.​—Rom. 12:12; 1 Pet. 1:6, 7.

⁶ Lafa miatriky raha sarotsy tsika, le mety hieritseritsy hoe tsy ho avy mihintsy tontolo vaovao zao. Fe midika va zay hoe tsy ampy finoa tsika? Tsy voatery. Diniho moa ohatsy toy. Lafa mafana biby ty andro, le mety hieritseritsy tsika hoe tsy ho avy mihintsy ty asotry. Fe tsy zay, tsy maintsy ho avy avao asotry io. Manahaky ani-zay koa fa lafa kivy marè tsika, le mety hieritseritsy hoe tsy ho avy mihintsy ty tontolo vaovao. Fe laha matanjaky ty finoantsika, le haintsika hoe ho tanteraky ty fampitamana-Ndranahary. (Sal. 94:3, 14, 15; Heb. 6:17-19) Laha matoky ani-zay tsika le ho afaky hanao voaloha lista avao ty fanompoa ani-Jehovah.

7. Toe-tsay manao akory ro tokony hohalavirintsika?

⁷ Mila mana finoa matanjaky koa tsika mba hahafahantsika manao ty asa fitoria. Mieritseritsy ty ankamaroan’olo itoriantsika hoe soa marè “vaovao soa” mikasiky tontolo vaovao ho avy zao ka tsy ho tanteraky. (Mat. 24:14; Ezek. 33:32) Mila mitandrina tsika mba tsy hanahaky an-drozy, ka tsy hisalasala amy ty raha ampianarini-Jehovah antsika. Ino ty hanampy antsika tsy ho tratsini-zay? Tsy maintsy manatanjaky ty finoantsika tsika. Ndao tsika handiniky fomba telo anaovantsika ani-zay.

VETSEVETSEO TY VILIM-PANAVOTA

8-9. Manino ty fametsevetsea ty vilim-panavota ro manatanjaky ty finoantsika?

⁸ Anisani-raha raiky manampy antsika hana finoa matanjaky ty fametsevetsea ty vilim-panavota. Ty vilim-panavota ro antoky ho antsika fa tsy maintsy ho tanteraky ty raha ampitamani-Ndranahary. Laha vetsevetsentsika hoe ino ty antony nanomeza ty vilim-panavota, le ino ty raha nafoini-Jehovah, le vomaiky tsika hatòky fa tena ho tanteraky fiaina soa tsy misy farany ampitamani-Ndranahary iny. Manino tsika ro mivola ani-zay?

⁹ Ino ty raha nafoini-Jehovah? Nirahini-Jehovah baka an-danitsy any Anakilahiny talanolo tena teany sady namany iny, mba hateraky an-tany etoy. Lafa tan-tany etoy amy zay Jesosy, le niaritsy raha sarotsy sankarazany. Bakeo ie nijalijaly zay vo nimaty. Nahafoy raha lafovily Jehovah! Tsy ho nengani-Ndranaharintsika be fitiava iny ho nijalijaly noho ho maty mihintsy Anakilahiny iny, laha ty hahazoantsika fiaina soa anatini-fotoa kelikely avao ro nikendreny. (Jaona 3:16; 1 Pet. 1:18, 19) Tsy zay fa nahafoy raha tena lafovily Jehovah mba hahafahantsika hiay tsy misy farany amy tontolo vaovao any.

DINIHO TY HERINI-JEHOVAH

10. Mahavita manao ino Jehovah, laha hentea ty Efesianina 3:20?

¹⁰ Ino ty raha faharoe hanampy antsika hana finoa matanjaky? Hatanjaky ty finoantsika laha mandiniky ty herini-Jehovah tsika. Mana hery hanatanteraha ty raha iaby ampitamaniny ie. Atao raha tsy hisy mihintsy fiaina tsy misy farany amy tontolo vaovao ao zao laha amintsika olombelo avao. Fe matetiky Jehovah mampitamà raha tsy ho vitan’olombelo mihintsy. Vitany ty manao ani-zay satria ie ro Ndranahary Farani-Ze Mahery. (Joba 42:2; Mar. 10:27) Tsy mahatseriky zany laha mampitamà raha miavaky antsika ie!​—Vakio Efesianina 3:20.

11. Miresaha raha raiky miavaky nampitamani-Ndranahary. (Henteo ty efajoro hoe “Fampitamana Sisany Atao Raha Tsy ho Nitanteraky Mihintsy.”)

¹¹ Diniho ty sisany amy raha nampitamanini-Jehovah ty mpanompony taloha tany. Atao raha tsy ho tanteraky zay ty fahità ani-raha rey. Nameany toky, ohatsy, Abrahama noho Saraha fa hiteraky anakilahy rozy ndre fa antitsy aza. (Gen. 17:15-17) Mbo nivola tamy Abrahama koa ie hoe ty taranakiny ro hahazo ty tany Kanana. Fe niandevo ta Ejipta any tanatini-tao maro ty taranakini-Abrahama, zany hoe ty Israelita. Atao raha tsy nampino mihintsy tamy zay hoe ho tanteraky raha nampitamanini-Jehovah io. Fe nitanteraky vatany raha zay. Tafara atoy, le nivola tamy Elizabeta Jehovah hoe hanan’anaky ie ndre fa antitsy aza. Nivola tamy Maria virjiny koa Jehovah fa ie ro hiteraky ani-Anakilahiny iny. Ho tanteraky amy zay, fampitamàna fa an’arivony tao nataoni-Jehovah tamy zaridainani-Edena tany iny!​—Gen. 3:15.

12. Ino ty raha volanini-​Josoa 23:14 ​noho Isaia 55:10, 11 ka manome toky antsika hoe mahery Jehovah?

¹² Lafa mandiniky ani-raha iaby nampitamanini-Jehovah rey noho ty fomba nanatanterahany ani-raha rey tsika, le lasa hieky hoe tena mahery ie. Vomaiky hatòky tsika amy zay hoe ho tanteraky vatany tontolo vaovao ampitamaniny iny. (Vakio Josoa 23:14; Isaia 55:10, 11.) Lafa tena matoky tsika, le ho haintsika ty hanazava amin’olo hoe tena hisy vatany ty tontolo vaovao fa tsy nofinofy. Ho zao mihintsy ty raha nivolanini-Jehovah mikasiky ani-lanitsy vaovao noho tany vaovao iny: “Azo antoky sady marina safà reo.”​—Apok. 21:1, 5.

MANAOVA RAHA HAHAVY ANAO HIFANDRAMBY MARÌNY AMY JEHOVAH

13. Manino ty fivoria ro manampy antsika hana finoa matanjaky? Hazavao.

¹³ Ino ty raha fahatelo farany hanampy antsika hana finoa matanjaky? Hatanjaky ty finoantsika laha manoka fotoa hanaova raha ara-panahy tsika. Eritsereto, ohatsy, hoe ino ty soa azontsika lafa tsika manatriky fivoria. Hoy Anna, ranabavy manompo manontolo andro sady fa nandramby anjara amy fanompoa sankarazany: “Manampy ahy hana finoa matanjaky ty fivoria. Ndre tsy tena mahay mampianatsy aza mpandahateny iny na tsy miresaky raha vaovao, le tozoro maharè raha manampy ahy hahazo soa ty fahamarina amy Baiboly ao noho manampy ahy hana finoa matanjaky avao aho.”b Azo antoky fa manatanjaky ty finoantsika koa ty maharè valin-teny mampahery baka amy rahalahy noho anabavintsika reo.​—Rom. 1:11, 12; 10:17.

14. Manino ty fanompoa ro manatanjaky finoa?

¹⁴ Manatanjaky ty finoantsika koa tsika lafa mandramby anjara amy fanompoa an-tonda eny. (Heb. 10:23) Fa nanompo ani-Jehovah tanatini-70 tao mahery, ohatsy, Barbara, le zao ty nivolaniny: “Amiko, le asa manatanjaky finoa ty fitoria. Arakaraky ty iresahako amin’olo ty raha soa ampitamanini-Jehovah, le vomaiky mihamatanjaky avao ty finoako.”

15. Manino ty fanaova fianara am-bata ro mampatanjaky ty finoantsika? (Henteo koa sary io.)

¹⁵ Toy koa misy raha hafa manampy antsika hana finoa matanjaky: Ty fianara am-bata. Nivola Susan fa tena manampy azy ty manao fandaharam-potoa mba hianara. Hoy ty asany: “Saky Lahady, le ianarako ty Tilikambo hianara amy herinandro manaraky iny. Lafa Latsinainy noho Talata aho manoma fivoria andavanandro. Amy andro hafa amy zay aho manao fianara am-bata.” Mana finoa matanjaky avao Susan satria arahiny soa fandahara nataony reo. Nivola koa Irene, ranabavy miasa amy foibe any tanatini-tao maro zay fa manatanjaky ty finoany ty mianatsy ani-faminania amy Baiboly ao rey. Hoy ty asany: “Mahatseriky ahy ty mahita hoe tanteraky iaby ty tsipiriany amy faminaniani-Jehovah rey.”c

“TSY MAINTSY HO TANTERAKY” RAHA ZAY

16. Manino ro mahasoa antsika koa ty fanomezan-toky nameani-Jehovah ani-Habakoka? (Hebreo 10:36, 37)

¹⁶ Fa ela ty mpanomponi-Jehovah sisany ro nandiny ty hitamperani-tontolo toy. Mieritseritsy ty olo sisany hoe mbo ho ela vo ho avy ty farany. Fe haini-Jehovah hoe mety hahatsapa ani-zay koa ty mpanompony, farany ie nanome toky ani-Habakoka mpaminany hoe: “Mbo amy fotoa voatondro vo ho tanteraky fahità iny, sady mandeha marè mamonjy ty farany ka tsy havandy. Ndre atao raha hoe elaela aza raha zay, le linaso avao, satria tsy maintsy ho tanteraky. Tsy ho tara zay.” (Hab. 2:3) Natao hahasoa ani-Habakoka raiky avao va fanomezan-toky io? Sa mbo mahasoa antsika amy zao koa safàny reo? Nivolanini-Jehovah apostoly Paoly hoe mahakasiky ty Kristiana koa safà reo, satria fa mandiny marè ty hiaviani-tontolo vaovao rozy. (Vakio Hebreo 10:36, 37.) Afaky matoky zany tsika fa “tsy maintsy ho tanteraky” ty fampitamanani-Jehovah hoe hanavotsy antsika, ndre atao raha ela io aza ty fahitantsika azy. “Tsy ho tara” raha zay!

17. Akory ty nanorihani-ranabavy raiky toy ani-torohevitsy nameani-Jehovah ani-Habakoka iny?

¹⁷ Maro ty mpanomponi-Jehovah nanoriky ani-torohevitsy nameany iny hoe “linaso avao.” Fa an-taony maro ty sisany amin-drozy ro nanao ani-zay. Anisani-zay, ohatsy, ranabavy Louise. Nanomboky nanompo ani-Jehovah ie tamy 1939. Nivola ie hoe: “Nieritseritsy aho tamy fotoa zay hoe ho avy alohani-hivitani-fianarako tamy lisè eny ty Aramagedona. Fe tsy zay ty raha niseho. Fa an-taony maro aho zay ro namaky ty tantarani-mpanomponi-Jehovah amy Baiboly ao nandiny ty hanatanterahany ty fampitamanany rey. Anatini-zay, ohatsy, ry Noa, Abrahama, Josefa, noho ty hafa. Nandiny avao rozy zisiky nanatanterahani-Jehovah ani-raha nampitamaniny an-drozy iny. Nanampy ahy hahaliny ty hanatanterahani-Jehovah ty fampitamanany ty namaky ani-tantara reo. Natoky avao aho hoe tsy maintsy ho tanteraky ty raha ampitamanini-Jehovah. Nanampy ahy noho ty olo hafa ho resy lahatsy raha zay hoe tena fa marìny ty tontolo vaovao.” Mieky ani-zay koa ty ankamaroani-mpanomponi-Jehovah nanompo azy fa ela rey!

18. Manino ty fandiniha zavaboary ro manampy antsika hatòky hoe tena ho avy vatany ty tontolo vaovao?

¹⁸ Marina aloha fa mbo tsy avy tontolo vaovao zao. Fe mba diniho tse moa ty sisany amy raha manodidy antsika. Anisani-zay ty basia, ty hazo, ty biby, noho tsika olombelo. Tsy hisy tsy haneky hoe tena misy raha reo, ndre nisy fotoa aza rozy mbo tsy nisy. Fe, misy raha reo henanizao satria niforonini-Jehovah. (Gen. 1:1, 26, 27) Nampitamà koa Ndranaharintsika iny hoe hamoro tontolo vaovao. Tena hotanterahiny raha zay. Ho lavorary ty olo lafa amy tontolo vaovao any sady ho salama soa, le afaky hiay mandrakizay. Afaky matoky tsika fa ho avy amy fotoa voatondro-Ndranahary ty tontolo vaovao.​—Isaia 65:17; Apok. 21:3, 4.

19. Ino ty azonao atao mba hanatanjaha ty finoanao?

¹⁹ Zisiky hiaviani-fotoa zay, le anovo ze azonao atao mba hanatanjaha ty finoanao. Ankasitraho avao ty vilim-panavota. Diniho ty herini-Jehovah. Manaova raha mba hahavy anao hifandramby marìny amy Jehovah. Laha manao ani-reo iha, le ho anisani-ze “mandova ty fampitamana satria mino noho manam-pahareta.”​—Heb. 6:11, 12; Rom. 5:5.