Ho Vitanao ty Hanatratsy ty Raha Kendrenao

1. Ino ty raha sarotsy atrehini-ankamaroantsika?

FA NISY fotoa va iha nametraky raha kendrè ara-panahy fe tsy nitratsinao mihintsy raha iny?b Tsy iha raiky avao ro nitratsini-zay. Ta hanasoa ty toetsiny, ohatsy, Philip sady ta hivavaky matetitetiky, fe tozoro tsy nahita fotoa hivavaha ie. Le Erika, mba naniry hoe tsy ho tara mihintsy saky mamonjy fivoria alohani-fanompoa, fe tozoro nitara avao ie. Ty ani-Tomáš koa, niezaky ie mba hahavita vaky ty Baiboly iaby, le fa nanao ezaky nitohitohy mihintsy ie fe zao ty nivolaniny: “Tsy nitea namaky Baiboly aho. Fa intelo aho zay ro niezaky, fe saky avy amy bokini-Levitikosy eo aho le mijano.”

2. Manino tsika ro tsy tokony ho kivy laha ohatsy ka nisy raha teantsika ho nitratsiry fe tsy nitratsintsika?

² Laha vo tsiela iha nametraky raha kendrè fe tsy nitratsinao, le ka kivy. Tsy mora ty manatratsy raha kendrè sady mitaky fotoa, ndre tsotsotra aza raha iny. Fe laha mbo miezaky manatratsy ty raha kendrenao avao iha, le asehonao hoe lafovily aminao ty fifandrambesanao amy Jehovah sady ta hanome ze farani-soa ho azy iha. Lafovily amy Jehovah ty ezaky ataonao. Mazava ho azy fa tsy mitamà ie hoe hanome mandilatsy ze azonao amea iha. (Sal. 103:14; Mika 6:8) Tokony hahay handanjalanja zany iha lafa mifily raha kendrè, ka anovo mifanaraky amy ty raha iainanao raha iny. Lafa baka nifily amy zay iha, ino ty azonao atao mba hanatratsira ani-raha iny? Ndao tsika handiniky soso-kevitsy vitsivitsy.

ANOVO ZE HAHAVY ANAO HANIRY HANATRATSY ANI-RAHA KENDRENAO INY

3. Manino ro tena vatan-draha ty hoe maniry hanatratsy raha kendrè?

³ Tena mila maniry mafy hanatratsy ani-raha kendrenao iny iha. Vatan-draha raha zay. Ino ty antony? Lafa iha maniry mafy hanatratsy ty raha kendrenao, le vomaiky iha hiezaky mafy hanao azy. Azo ampitovizy amy tsioky manosiky laka raiky mba ho avy amy tany ombàny any faniriantsika io. Laha soa tsioky iny, le ho avy amy tany andehanany iny any laka iny. Mety ho avy malaky mihintsy aza ie laha somary marerè tsioky iny. Manahaky ani-zay koa fa lafa mitombo ty faniriantsika, le ho tratsintsika raha kendrentsika iny. Hoy rahalahy David, mipetraky an’El Salvador any: “Lafa iha maniry raha raiky, le miezaky mafy. Tsy misy raha enganao hanakasaka anao tsy hahatratsy ani-raha kendrenao iny.” Ka ino zany ty azonao atao mba hampitomboa ty fanirianao?

4. Ino ty raha azontsika angatahy amy vavaky? (Filipianina 2:13) (Henteo koa sary io.)

⁴ Mivavaha mba hitombo ty fanirianao. Afaky mampiasa ty fanahiny masy Jehovah mba hanampea anao haniry hanatratsy ty raha kendrenao. (Vakio Filipianina 2:13.) Mametraky raha kendrè tsika kindraiky satria haintsika hoe tokony hanao ani-zay tsika. Tena soa aloha zay, fe mety tsy tena maniry hanatratsy ani-raha iny tsika. Zay mihintsy ty raha nahazo ani-ranabavy Norina, mipetraky an’Ougandà any. Nametraky raha kendrè ie hoe mba hana mpianatsy Baiboly. Fe tsy tena naniry hanatratsy ani-raha kendreny io ie satria nieritseritsy hoe tsy mahay mampianatsy. Ino ty nanampy azy? Hoy ty asany: “Nivavaky tamy Jehovah avao aho sanandro mba hanampy ahy hampitombo ty faniriako hana mpianatsy Baiboly. Nanao raha nifanaraky tamy vavaky nataoko iny koa aho ka niezaky mafy nanasoa ty fahaizako mampianatsy. Vola vitsivitsy tafarani-zay, le tsapako hoe lasa naniry mafy hana mpianatsy Baiboly aho. Tamy tao iny avao, le nahazo mpianatsy Baiboly roe aho.”

5. Ino ty raha azontsika vetsevetse mba hampitomboa ty faniriantsika?

⁵ Vetsevetseo ty raha nataoni-Jehovah ho anao. (Sal. 143:5) Nametsivetsy ty hasoam-panahy miavaky nasehoni-Jehovah taminy apostoly Paoly, ka lasa nivoatosiky hiasa mafy ho ani-Jehovah. (1 Kor. 15:9, 10; 1 Tim. 1:12-14) Manahaky ani-zay koa fa laha vetsevetsenao avao ty raha nataoni-Jehovah ho anao, le vomaiky iha haniry hanatratsy ty raha kendrenao. (Sal. 116:12) Henteo moa tantarani-ranabavy raiky mipetraky a Honduras any toy. Ta hanao mpisava lala maharitsy ie. Ino ty nanampy azy hanatratsy ani-raha kendreny zay? Hoy ty asany: “Nieritseretiko avao ty fitiavani-Jehovah ahy. Nitaominy ho anisani-vahoakiny aho. Karakaràny aho sady arovany. Lafa nandiniky ani-raha rezay aho, le nitombo ty fitiavako ani-Jehovah ka vomaiky aho naniry hanao mpisava lala.”

6. Ino koa ty hanampy antsika hampitombo ty faniriantsika?

⁶ Eritsereto hoe ino ty soa ho azonao laha tratsinao raha kendrenao iny. Henteo moa hoe ino ty nanampy ani-Erika, azy niresahintsika taloha eny iny, mba tsy ho tara lava sasy. Hoy ty asany: “Tsapako hoe tena tsy nandramby soa aho lafa nitara saky fivoria alohani-fanompoa. Fe laha avy aloha aho, le afaky hiarahaba ani-ranadahy noho rahavavy reo sady afaky hiresadresaky amin-drozy. Afaky hijanjy torohevitsy hanampy ahy hanasoa noho hahazo tavy ty fanompoako koa aho.” Nieritseretini-Erika avao hoe ino ty soa ho azony laha ie avy ara-potoa, farany nitratsiny avao raha teany hatao iny. Ino koa ty raha soa azonao eritserety? Laha iha ta hanasoa ty famakianao Baiboly na ty vavaky ataonao, le eritsereto hoe manino ty fanaova ani-zay ro hanampy anao hifandramby soa amy Jehovah. (Sal. 145:18, 19) Ka manao akory koa laha ta hana toetsy kristiana iha? Eritsereto hoe manino ty fanana ani-toetsy zay ro hanampy anao hifandramby soa amy ty hafa. (Kol. 3:14) Anovo lista hoe ino iaby ty antony mahavy anao ta hanatratsy ani-raha kendrenao iny. Bakeo hentehenteo matetiky lista iny. Hoy Tomáš, azy niresahintsika taloha eny iny: “Lafa hitako hoe misy antony maromaro tokony hanatratsirako raha raiky, le vomaiky aho miezaky mafy manatratsy ani-raha iny.”

7. Ino ty nanampy ani-Julio morovaly hanatratsy ty raha kendren-drozy?

⁷ Miaraha matetiky amy ze olo hanampy anao hanatratsy ani-raha kendrenao iny. (Ohab. 13:20) Henteo moa ty tantarani-Julio morovaly. Ta hampitombo ty fanompoan-drozy rozy. Ino ty nanampy an-drozy hahavita ani-zay? Nivola Julio hoe: “Ze olo hanampy anay hanatratsy ani-raha kendrenay iny avao ro nataonay nama, le niresahinay tamin-drozy raha kendrenay iny. Nana raha kendrè mitovy aminay ty ankamaroan-drozy, fe fa nitratsin-drozy ty an-drozy. Afaky nanoro hevitsy anay soa zany rozy. Nanontaneani-namanay rey anay koa hoe ino ty raha fa ataonay mba hanatratsira ani-raha iny, le nampahery anay avao rozy lafa tena nila ani-zay zahay.”

LAHA TSY TENA MAZOTO HANATRATSY ANI-RAHA KENDRENTSIKA INY TSIKA

8. Ino ty raha mety hiseho laha amy tsika mazoto iny avao tsika vo miezaky manatratsy ty raha kendrentsika? (Henteo koa sary io.)

⁸ Mety misy fotoa tsika tsy de mazoto hanatratsy ty raha kendrentsika. Fe midika va zay hoe tsy afaky hanatratsy ani-raha iny tsika? Aha. Toy misy ohatsy: Mety hahavita hanosiky ty laka raiky handeha amy tany teany handehana any ty tsioky lafa marè. Fe miovaova moa tsioky io. Kindraiky ie marè, le kindraiky ie somary malemy. Mety tsy hisy tsioky mihintsy aza kindraiky. Midika va zay hoe tsy misy azoni-mpanday laka iny atao mba hampandehana ani-laka iny? Tsy zay. Misy motera, ohatsy, ty laka sisany, le ty ilany misy fivè. Afaky mampiasa ani-motera iny na fivè iny zany mpanday laka io mba hiavia amy tany teany handehana any. Manahaky tsioky io koa ty faniriantsika. Mety misy fotoa tsika maniry mafy hanatratsy ty raha kendrentsika, le misy fotoa tsika mety tsy de hazoto. Ka laha amy tsika mazoto iny avao tsika vo miezaky manatratsy ani-raha kendrentsika iny, le tsy ho tratsintsika mihintsy raha iny. Fe manahaky mpanday laka mila fomba hafa hiavia amy tany teany handehana any iny, le afaky miezaky hanatratsy ani-raha kendrentsika iny avao tsika ndre tsy tena mazoto aza. Tsy mora aloha ty manao ani-zay. Fe tsy hisera ty ezaky ataonao. Ino ty azontsika atao mba hahavità ani-zay? Hodinihintsika zay, fe toy tse misy fanontanea raiky mety hapetrakintsika ka aleo horesahintsika.

9. Tokony hiezaky hanatratsy raha kendrè avao va tsika ndre tsy tena maniry hanao ani-zay? Hazavao.

⁹ Teani-Jehovah ho falifaly tsika lafa manompo azy sady teany laha vokatsini-fontsika ty anompoantsika azy. (Sal. 100:2; 2 Kor. 9:7) Fe manao akory laha tsy ta hanatratsy raha kendrè ara-panahy tsika? Tokony mbo hiezaky hanao ani-zay avao va tsika? Diniho ty tantarani-apostoly Paoly. Nivola ie hoe: “Asiako marè ty vatako ka andevoziko.” (1 Kor. 9:25-27) Tsy naniry hanao ze raha teani-Jehovah hataony Paoly. Fe ndre zay, le niforosevany hanao ani-zay avao ty vatany. Nankasitraky ty fanompoa nataoni-Paoly va Jehovah? Eka! Namaly soa azy mihintsy aza Jehovah satria niezaky mafy ie.​—2 Tim. 4:7, 8.

10. Ino ty soa ho azontsika laha miezaky manatratsy raha kendrè avao tsika ndre tsy tena maniry hanao ani-zay aza?

¹⁰ Falifaly koa Jehovah mahita antsika miezaky manatratsy raha kendrè ndre tsy tena maniry hanao ani-zay aza tsika. Falifaly ie satria hainy hoe ndre tsy teantsika aza raha ataontsika iny, le ataontsika avao raha iny satria tea azy tsika. Hitahy ty ezaky ataontsika koa Jehovah manahaky ty nitahiany ani-Paoly. (Sal. 126:5) Ka lafa mahazo ty fitahiani-Jehovah tsika, le mety hanomboky haniry ani-raha iny. Hoy Lucyna, ranabavy baka a Pologne any zay: “Tsy ta handeha hanompo aho kindraiky, sirtò lafa vozaky rey. Fe mahatiaro falifaly aho lafa baka any. Tena fanomeza miavaky raha zay.” Ndao amy zay moa hohenteantsika hoe ino ty azontsika atao lafa tsika tsy de mazoto hanatratsy raha kendrè.

11. Akory ty anampeani-Jehovah antsika hahay hifehy ty vatantsika?

¹¹ Mivavaha mba hana fifehezam-bata. Mahay mifehy ty raha ataony noho ty fihetseham-pony ty olo mana fifehezam-bata. Matetiky safà io ampiasà mba hivolana hoe mila miamby soa ty vatantsika tsika mba tsy hanao raha raty. Fe mila fifehezam-bata avao koa tsika mba hahavitantsika manao raha soa, sirtò laha sarotsy amintsika ty manao ani-raha iny na tsy tena maniry hanao azy tsika. Tiarovo fa anisani-vokatsini-fanahy ty fifehezam-bata. Mangataha fanahy masy amy Jehovah zany mba hanampy anao hana ani-toetsy tena lafovily io. (Lioka 11:13; Gal. 5:22, 23) Nivola David, azy niresahintsika taloha eny iny, hoe tena nanampy azy ty vavaky. Teany laha mba manao fianara am-bata tsy tampaky ie. Hoy ty asany: “Nivavaky tamy Jehovah aho mba hampeany hana fifehezam-bata. Nanampy ahy vatany ie. Lasa nahavita nandamy soa ty fotoako aho ka lasa nanao fianara am-bata tsy tampaky.”

12. Manino torolala amy Mpitoriteny 11:4 ao io ro manampy antsika hahatratsy ty raha kendrentsika?

¹² Ka mandiny hoe milamy soa ty raha iaby zay iha vo hanatratsy raha kendrè. Tsy hisy raha hilamy zao mihintsy amy tontolo toy eto. Laha mandiny ani-zay avao tsika, le mety tsy ho tratsintsika mihintsy ty raha kendrentsika. (Vakio Mpitoriteny 11:4.) Nivola rahalahy mana anara Dayniel zay hoe: “Tsy hisy raha hilamy zao. Tsy tokony handinindiny zany tsika fa tokony avy le ataontsika ze raha teantsika hatao.” Niresaky antony hafa mahavy antsika tsy tokony hangataky andro koa rahalahy Paul mipetraky an’Ougandà any zay. Hoy ty asany: “Hampeani-Jehovah tsika laha ataontsika avao raha iny ndre mbo miatriky raha sarotsy aza tsika.”​—Mal. 3:10.

13. Ino ty soa ho azontsika laha atombokintsika amy raha kelikely tse ty raha kendrentsika?

¹³ Atomboho amy raha kelikely tse. Mety tsy de mazoto tsika satria atao raha tsy ho vitantsika ty hanatratsy ani-raha kendrentsika iny. Laha zay ty raha mahazo anao, tsy no mety laha mba atombokinao amy raha kelikely tse raha iny? Laha misy toetsy teanao hanana, ohatsy, manino laha mila fomba tsotra tse iha mba hahafahanao mampiseho ani-toetsy iny? Laha ta hahavita hamaky ty Baiboly iaby iha, manino laha manoka fotoa kelikely tse mba hamakia? Nisarotsy tamy Tomáš, azy niresahintsika taloha teny iny ty hanohy hamaky Baiboly tanatini-tao raiky. Hoy ty asany: “Tsapako hoe tsy nety ty fomba namakiako Baiboly taloha satria ta hahavita toko maro avao aho. Farany aho nanapa-kevitsy hoe hiezaky ndraiky, fe tamy raiky toy, namaky andininy vitsivitsy avao aho sanandro sady nametsivetsy ani-raha iny. Lasa niazoko tavy amy zay ty namaky Baiboly.” Lasa nanomboky nitea namaky Baiboly Tomáš, ka tsy ta hieny ie saky namaky. Nahavita namaky ty Baiboly iaby avao ie tamy farany.c

KA KIVY NDRE MISY RAHA SAROTSY

14. Ino ty raha mety hiseho ka hahavy antsika tsy hahatratsy ty raha kendrentsika?

¹⁴ Mampalahelo fa ndre maniry mafy hanatratsy ty raha kendrentsika aza tsika, le mety hisy avao ty raha sarotsy. Mety hisy ‘raha tsy ampoizy’, ohatsy, handany ty fotoantsika ka lasa tsy ampy ty fotoa hanatratsirantsika ani-raha teantsika hatao iny. (Mpito. 9:11) Mety hiatriky raha sarotsy mety hahakivy antsika tsika ka lasa tsy hana hery. (Ohab. 24:10) Tsy lavorary koa tsika ka mety hanao hadisoa. Vomaiky lasa sarotsy amintsika amy zay ty hanatratsy ani-raha kendrentsika iny. (Rom. 7:23) Na mety hahatiaro vozaky tsika. (Mat. 26:43) Ino ty hanampy antsika handresy lafa misy raha sarotsy?

15. Manino iha ro tsy tokony hieny hanatratsy ty raha kendrenao ndre misy raha sarotsy? (Salamo 145:14)

¹⁵ Tiarovo hoe tsy misaka anao tsy hanatratsy ty raha kendrenao ty raha sarotsy. Mivola ty Baiboly fa mety ho maro ty raha sarotsy hatrehintsika. Fe volaniny ao koa hoe afaky miezaky hanatratsy ty raha kendrentsika avao tsika satria manampy Jehovah. (Vakio Salamo 145:14.) Hoy rahalahy Philip, azy niresahintsika taloha teny iny: “Misy fotoa aho tsy nahatratsy ani-raha kendreko rey, fe tsy mifantoky amy zay aho. Aleoko mifantoky amy ty fomba hanatratsirako ani-raha iny ndraiky.” Nivola David, azy niresahintsika taloha teny iny hoe: “Niezaky aho mba tsy hataoko vato misaka raha sarotsy miseho rey, fa hoy avao ty asako hoe toy ro fomba ampisehoako hoe tena teako Jehovah.” Laha miezaky manatratsy ty raha kendrenao avao iha ndre miatriky raha sarotsy aza, le asehonao amy Jehovah hoe ta hampifalifaly azy iha. Azo antoky fa falifaly Jehovah lafa mahita anao miezaky avao manatratsy ty raha kendrenao!

16. Ino ty azonao atao laha misy raha sarotsy miseho ka lasa sarotsy aminao ty hanatratsy ani-raha kendrenao iny?

¹⁶ Mandrambesa fianara baka amy raha sarotsy niseho iny. Diniho hoe ino ty nahavy ani-raha iny, le eritsereto zao: ‘Ino ty azoko atao mba tsy himpoly ndraiky ty raha manahaky an’iny?’ (Ohab. 27:12) Fe laha tsy mety tratsinao mihintsy raha teanao ho tratsiry iny, le mety ho hitanao baka amy zay hoe mila manova raha kendrè iha. Laha zay ty raha mahazo anao, le ampolio dinihy ndraiky raha kendrenao iny mba hahitanao hoe mbo mety aminao va raha iny.d Tsy hieritseritsy mihintsy Jehovah hoe tsy manao soa ty fanompoanao iha kanao tsy mahatratsy ty raha kendrenao.​—2 Kor. 8:12.

17. Manino ro tokony hotiarovintsika avao ty raha fa nivitantsika?

¹⁷ Tiarovo hoe ino ty raha fa nivitanao. Mivola ty Baiboly fa ‘tsy mba manao ty tsy rariny Ndranahary ka hanalino ani-ze raha nataonao.’ (Heb. 6:10) Tokony hotiarovinao avao koa zany ze raha fa nivitanao. Eritsereto hoe ino ty raha kendrè fa nitratsinao. Mety hoe niezaky nifandramby soa tamy Jehovah iha, niresaky ty mikasiky azy amin’olo, na niezaky mba hatao batisa. Fa nahavita dingana maro iha taloha sady niezaky nanatratsy raha kendrè ara-panahy. Afaky miezaky mandroso avao koa zany iha henanizao mba hanatratsira ty raha kendrenao.​—Fil. 3:16.

18. Ino ty tokony hotiarovintsika lafa tsika miezaky manatratsy ty raha kendrentsika? (Henteo koa sary io.)

¹⁸ Niavy soa amy tany teany handehana any avao mpanday laka iny, le nifalifaly. Manahaky ani-zay koa fa ho vitanao ty hanatratsy ty raha kendrenao satria manampy Jehovah. Fe tiarovo zao: Tsy hoe mandeha amy tany teany handehana any iny avao ty ankamaroan’olo mpanday laka, fa mankafy ze raha hitany manodidy azy eny koa rozy. Manahaky ani-zay koa fa lafa iha miezaky manatratsy ty raha kendrenao, le ka halino ty mandiniky soa ty fomba anampeani-Jehovah anao. Hanampy anao ho falifaly avao raha zay. (2 Kor. 4:7) Hahazo fitahia maro biby iha laha tsy kivy mihintsy.​—Gal. 6:9.