Ampitombò ty Fitiavanao ani-Jehovah Noho ty Olo Hafa

1. Ino ty fahamarina nihainao tamy iha vo nanomboky nianatsy Baiboly?

TIARONAO va tamy iha vo nanomboky nianatsy Baiboly? Mety nitseriky vasa iha lafa nahay hoe mana anara Ndranahary. Mety nifalifaly iha lafa nahay hoe tsy mampijalijaly olo amy afobe zao Ndranahary. Azo antoky fa nanitranitra koa iha lafa nahay hoe mbo hifankahita amy longonao fa nimaty rey sady hiaraky hiay amin-drozy amy paradisa an-tany etoy.

2. Ino koa ty raha fa nataonao ankoatsini-hoe nianatsy fahamarina tamy Baiboly ao? (Efesianina 5:1, 2)

² Lafa nitohy ty fianaranao Baiboly, le vomaiky nitombo ty fitiavanao ani-Jehovah. Lasa nanoriky ty raha nianaranao amy zay iha. Lasa nahay nanapa-kevitsy mifanaraky amy torolalani-Baiboly iha. Niezaky nanasoa ty toetsinao noho ty fandaisam-batanao koa iha satria ta hampifalifaly a Ndranahary. Miezaky manahaky ty ray aman-dreniny be fitiava, ohatsy, ty ajà. Manahaky ani-zay koa ty nataonao, satria niezaky nanahaky ani-Babanao an-danitsy any iny iha.​—Vakio Efesianina 5:1, 2.

3. Ino ty fanontanea mety hoeritseretintsika?

³ Mety hieritseritsy tsika hoe: ‘Vomaiky mitombo va ty fitiavako ani-Jehovah laha ampitovizy tamy zaho vo nivita batisa? Manahaky ani-Jehovah va aho liany nahavita batisa ahy zay ka mampiseho fitiava amy rahalahy noho anabaviko reo?’ Ka kivy laha tsapanao hoe nihena ty fitiavanao ani-Jehovah noho ty olo hafa. Zay mihintsy ty raha niseho tamy Kristiana tamy taonjato voalohany rey. Fe tsy nanary an-drozy mihintsy Jesosy. Azo antoky hoe tsy hanary antsika koa ie. (Apok. 2:4, 7) Hainy fa mbo afaky hana ani-fitiava nananantsika tamy tsika vo nahay fahamarina iny tsika.

4. Ino ty raha hodinihintsika amy lahatsoratsy toy ato?

⁴ Hodinihintsika amy lahatsoratsy toy hoe ino ty azontsika atao mba hampitombo avao ty fitiavantsika ani-Jehovah noho ty olo hafa. Ho hitantsika bakeo fa tena misy vokany soa ty fanaovantsika ani-zay.

AMPITOMBÒ TY FITIAVANAO ANI-JEHOVAH

5-6 a) Ino iaby ty raha sarotsy natrehini-Paoly tamy fanompoany? b) Ino ty nanampy azy tsy nieny fa nanompo ani-Jehovah avao?

⁵ Nahafalifaly ani-apostoly Paoly ty nanompo ani-Jehovah, fe niatriky raha sarotsy maro koa ie. Nanao lia lavitsy matetiky Paoly sady tsy nimora taminy ty nanao ani-raha rey. Kindraiky aza ie fa ho ‘niazon-doza tamy vavarano’ noho fa ho ‘niazon-doza tamin’olo raty.’ Nisy fotoa koa ie nikabokabohin’olo mpanohitsy rey. (2 Kor. 11:23-27) Tea nanampy olo avao Paoly, fe tsy mba nankasitraky ty raha nataony ty mpiara-manompo sisany.​—2 Kor. 10:10; Fil. 4:15.

⁶ Ino ty nanampy ani-Paoly tsy nieny fa nanompo ani-Jehovah avao? Nianatsy raha maro mikasiky ty toetsini-Jehovah tamy Soratsy Masy ao noho tamy raha niainany ie. Lasa niresy lahatsy Paoly hoe tea azy Jehovah Ndranahary. (Rom. 8:38, 39; Efes. 2:4, 5) Lasa nitea marè ani-Jehovah koa ie. Nasehoni-Paoly hoe teany Jehovah ka “nikarakara ty olo masy” ie ‘sady mbo nanohy nikarakara an-drozy avao.’​—Heb. 6:10.

7. Ino ty azontsika atao mba hampitomboa ty fitiavantsika ani-Jehovah?

⁷ Afaky mampitombo ty fitiavantsika a Ndranahary tsika lafa mianatsy soa ty Safàny. Ka lafa mamaky Baiboly iha, le diniho soa raha vakinao iny. Henteo hoe ino ty ampianarini-raha iny mikasiky ani-Jehovah. Eritsereto zao: ‘Ino amy tantara toy ro mampiseho hoe tea ahy Jehovah? Ino amy raha toy ro mahavy ahy ho tea ani-Jehovah?’

8. Manino ty vavaky ro manampy antsika hampitombo ty fitiavantsika a Ndranahary?

⁸ Ino koa ty raha hafa azontsika atao mba hampitomboa ty fitiavantsika ani-Jehovah? Mila mivavaky aminy sanandro tsika le aborakintsika aminy ze anaty fontsika ao. (Sal. 25:4, 5) Hamaly ty vavaky ataontsika Jehovah. (1 Jaona 3:21, 22) Hoy Khanh, ranabavy mipetraky an’Azỳ any: “Ty fahaizako ani-Jehovah avao ro nahavy ahy ho tea azy tamy voalohany. Fe lafa nihitako hoe namaly ty vavaky nataoko ie, le vomaiky aho nitea azy. Vokatsini-zay, le lasa ta hanao raha mampifalifaly azy avao aho.”b

AMPITOMBÒ TY FITIAVANAO TY OLO HAFA

9. Akory ty nampisehoani-Timoty hoe tena tea ani-rahalahy noho anabaviny rey ie?

⁹ Tao vitsivitsy tafarani-nahalasa Kristiana ani-Paoly, le nifankahita amy tanora raiky atao hoe Timoty zay ie. Tea ani-Jehovah Timoty sady nitea ty vahoakiny koa. Nivola tamy Filipianina reo Paoly hoe: “Zaho tsy mahita olo hafa mitovy toetsy aminy [Timoty], afaky hikarakara soa anareo.” (Fil. 2:20) Tsy niresaky mikasiky ty fahaizani-Timoty mandamin-draha na mandahateny Paoly eto. Ty fitiavani-Timoty ani-mpiara-manompo reo ro tena nampieky ani-Paoly. Azo antoky fa tsy nahaliny ani-fitsidihani-Timoty io ty fiangona.​—1 Kor. 4:17.

10. Akory ty nampisehoani-Anna morovaly hoe tena tean-drozy rahalahy noho anabavin-drozy rey?

¹⁰ Mila fomba hanampea ani-rahalahy noho anabavintsika reo koa tsika. (Heb. 13:16) Diniho moa ty raha niainani-Anna, ranabavy niresahintsika tamy lahatsoratsy taloha ao iny. Nisy siklony tamin-drozy any. Tafarani-zay, le nandeha tamy tranoni-fianakavia raiky Vavolombeloni-Jehovah zay rozy morovaly. Nihitan-drozy hoe niombotsy ty tafon-tranoni-fianakavia iny. Lasa naloto iaby amy zay ty sikin-drozy. Hoy Anna: “Nalànay sikin-drozy rey, le nisasanay, bakeo nipasinay sady navalonay soa. Tsy tena bevata raha nataonay iny, fe nisy vokany soa satria lasa mpinama biby zahay zisiky amy zao.” Tea ani-rahalahy noho anabavy rey Anna morovaly ka nanao raha mba hanampea an-drozy.​—1 Jaona 3:17, 18.

11. a) Ino ty raha tsapan’olo matetiky lafa asehontsika hoe teantsika rozy? b) Laha hentea ty Ohabolana 19:17, ino ty ataoni-Jehovah lafa tsika mampiseho fitiava?

¹¹ Laha be fitiava noho soa fanahy amy ty hafa tsika, le ho hitan-drozy hoe miezaky manahaky ani-Jehovah tsika. Tsy hampoizintsika fa mety hankasitraky ty hasoam-panahy asehontsika rozy. Nisy nanampy, ohatsy, Khanh, azy niresahintsika taloha teny iny, tamy ie mbo nitanora le tiarony soa olo nanampy azy reo. Hoy ty asany: “Tena ankasitrahako iaby rahavavy nanampy ahy tamy fanompoa rey. Nalan-drozy tan-trano atoy aho, nandesin-drozy niaraky nihina amin-drozy, le nataon-drozy azo antoky koa hoe niavy an-trano atoy soa. Tsapako henanizao hoe asa be ho an-drozy raha iny. Fe nanao ani-zay rozy satria tea ahy.” Mazava ho azy fa tsy ty olo iaby ro hankasitraky antsika amy ty raha ataontsika ho an-drozy. Zao ty nivolanini-Khanh mikasiky olo nanampy azy rey: “Ta hisaotsy an-drozy aho amy raha soa maro nataon-drozy ho ahy rey, fe tsy haiko hoe aia iaby rozy henanizay. Fe Jehovah mahay ani-zay, ka mivavaky aho mba hamaly soa an-drozy ie.” Marina raha resahini-Khanh zay. Hitani-Jehovah ty raha iaby ataontsika mba hampisehoa hasoam-panahy amy ty hafa, ndre anaka raha kelikely aza. Sahala amy soro lafovily noho trosa tsy maintsy aloany ty fahitany ani-raha zay.​—Vakio Ohabolana 19:17.

12. Akory ty azoni-rahalahy ampisehoa hoe teany ty olo amy fiangona eo? (Henteo koa sary reo.)

¹² Laha rahalahy iha, akory ty azonao ampisehoa hoe tea olo iha sady manao raha mba hanampea an-drozy? Nanontany anti-panahy raiky, ohatsy, rahalahy tanora atao hoe Jordan zay, mba hahaizany hoe ino ty mbo tokony hataony mba hanampea olo amy fiangona eo. Nidera ani-Jordan tse anti-panahy iny amy ty raha soa fa nivitany, le bakeo niresahiny taminy ze raha azony atao. Nampirisihini-anti-panahy iny, ohatsy, Jordan mba ho avy alohaloha amy Efitrano Fanjakà any le hiarahaba ty hafa, hanome valin-teny, hitory tsy tampaky miaraky amy andia-mpitory misy azy, noho hieritseritsy ze raha mbo azony atao mba hanampea ty hafa. Norihini-Jordan soso-kevitsy rey ka lasa nahay raha vaovao ie sady vomaiky nitombo ty fitiavany ani-rahalahy noho anabaviny rey. Haini-Jordan fa tsy hoe voatendry mpikarakara fiangona ty rahalahy raiky zay vo hanampy ty hafa, fa tokony ho zatsy hanao ani-zay avao ie.​—1 Tim. 3:8-10, 13.

13. Manino ty fitiava ro nanampy ani-rahalahy Christian ho voatendry anti-panahy ndraiky?

¹³ Manao akory laha fa nimpikarakara fiangona iha taloha na anti-panahy? Tiarovo fa tsy halinoni-Jehovah ty asa mafy nataonao noho ty fitiava nanosiky anao hanao ani-raha zay. (1 Kor. 15:58) Hitany koa hoe tsy mieny iha fa mbo mampiseho fitiava avao. Nalahelo, ohatsy, rahalahy Christian lafa nalà tsy ho anti-panahy. Fe hoy ty asany: “Tapa-kevitsy aho hoe hanao ze azoko atao avao amy fanompoa ani-Jehovah, ndre anti-panahy aho ndre tsy anti-panahy.” Lafa nandeha ty fotoa, le nivoatendry ho anti-panahy ndraiky Christian. Zao ty nambarany: “Natahotahotsy aho lafa nivoatendry ndraiky. Fe laha mbo teani-Jehovah ho anti-panahy hoasako aho, le hanao ani-raha zay aho satria teako Jehovah noho ty mpiara-manompo amiko.”

14. Ino ty azontsika ianara baka amy raha resahini-ranabavy raiky baka a Géorgie any io?

¹⁴ Asehoni-mpanomponi-Jehovah koa hoe tean-drozy ty olo manodidy an-drozy. (Mat. 22:37-39) Mivola, ohatsy, ranabavy Elena mipetraky a Géorgie any hoe: “Ty fitiavako ani-Jehovah avao ro anisani-antony nahavy ahy nitory tamy voalohany. Fe lafa nitombo ty fitiavako ani-Babako an-danitsy any iny, le nitombo koa ty fitiavako olo. Niezaky aho nandiniky ty raha sarotsy natrehin-drozy, le bakeo nidinihiko hoe ino ty raha mety hidosiky ty fon-drozy. Lafa nieritseritsy raha ho zay aho, le vomaiky ta hanampy an-drozy.”​—Rom. 10:13-15.

HAMALY SOA ANTSIKA JEHOVAH LAHA MAMPISEHO FITIAVA AMY TY HAFA TSIKA

15-16. Laha hentea sary reo, ino ty vokany lafa mampiseho fitiava amy ty hafa tsika?

¹⁵ Lafa mampiseho fitiava amy rahalahintsika reo tsika, le tsy rozy avao ro mandramby soa. Lafa nanomboky kelikely, ohatsy, ty arety mandripaky COVID-19, le niezaky rahalahy Paolo morovaly nanampy ranabavy be tao maro hahay hampiasa fitaova elektroniky mba hitoria. Nisahira tse ranabavy raiky zay tamy voalohany, fe lasa nahay avao ie lafa nandeha ty fotoa. Afaky nampiasa ty fitaovany ie mba hanasà ty longony hanatriky Fahatiarova. Nanatriky Fahatiarova tamy vidéoconférence ty enimpolo amin-drozy! Nandramby soa baka amy fanampea nataoni-Paolo morovaly ranabavy iny noho ty fianakaviany iaby. Nivola tamy Paolo ranabavy iny tafara atoy hoe: “Misaotsy anao nampianatsy anay fa be tao io. Tsy ho halinoko mihintsy ty fomba nikarakarani-Jehovah anay noho ty ezaky nataonao mba hanampea anay.”

¹⁶ Tena nandrambesani-Paolo fianara bevata raha niseho io. Lasa nitiarony hoe ty fitiava ro vatan-draha marè mandilatsy ty fahaiza. Hoy ty asany: “Mpiandraikitsini-faritsy aho taloha. Tsapako henanizao hoe ndre mety fa halinoni-rahalahy noho anabavy reo aza lahateny nataoko rey, le mbo tiaron-drozy avao raha nataoko ho an-drozy rey.”

17. Ia koa ty mandramby soa lafa tsika mampiseho fitiava?

¹⁷ Lafa mampiseho fitiava amy ty hafa tsika, le ty vatatenantsika mihintsy ro handramby soa sady tsy hampoizintsika raha zay. Tena marina raha zay laha hentea ty tantarani-Jonathan, mipetraky a Nouvelle-Zélande any. Nahita rahalahy mpisava lala zay ie tamy sabotsy folakandro zay. Nitory raiky rahalahy io sady nafana biby ty andro. Farany ie nanapa-kevitsy hiaraky hitory amy mpisava lala iny lafa sabotsy nanaraky iny. Tsy niambiny tamy fotoa io hoe tena hahasoa azy fihetsiky soa nataony io. Hoy ty asany: “Tsy de nitea nanompo mihintsy aho bakany zay. Fe lafa nijanjy ty fomba fampianarani-rahalahy io noho nahita ty vokatsy soa niazony tamy fanompoa aho, le lasa nitea nitory. Lasa mpinama biby zahay amy rahalahy iny, le nampeany aho mba handroso ara-panahy, hahazo tavy fanompoa, noho hifandramby soa amy Jehovah.”

18. Ino ty teani-Jehovah hataontsika?

¹⁸ Teani-Jehovah tsika iaby laha mampitombo ty fitiavantsika azy noho ty olo hafa. Nihitantsika tato fa afaky mampitombo ty fitiavantsika ani-Jehovah tsika laha mamaky noho mametsivetsy ty Safàny, sady miresaky aminy tsy tampaky amy alalani-vavaky. Vomaiky ho tea ani-rahalahy noho anabavintsika reo koa tsika laha manao raha mba hanampea an-drozy. Lafa mitombo ty fitiavantsika, le hifandramby soa amy Jehovah noho ty mpiara-manompo tsika. Ho falifaly tsika satria ho mpinama mandrakizay!