Tena Handramby Soa Iha Laha Midary Olo

Pasitera tamy Fiangona Mitambatsy ta Kanada ao babako, ka saky avy ty Lahady maray le nampanaoviny Sekoly Alahady zahay amy zokiko ampela zay. Lafa 11:00 amy zay zahay nandeha nivavaky niaraky aminy. Bakeo niaraky nivory amy mama amy Efitrano Fanjakà any zahay folakandron’iny. Tsy nisarotsy aminay ty nahita hoe tsy nitovy mihintsy fiangona roe reo.

Niresaky ty raha nianarany tamy Baiboly ao tamy namany taloha rezay mamako. Bob noho Marion Hutcheson ty anaran-drozy. Naneky ty fahamarina koa rozy. Nandesin-drozy morovaly niaraky amy anakilahin-drozy telo rezay aho tamy 1958, mba hanatriky fivoriambe iraisam-pirenena ta New York any. Naharitsy valo andro fivoriambe io le ho zao ty foto-kevitsiny: “Ty Sitrapo-Ndranahary.” Tsapako henanizao hoe tsy nimora amin-dozy ty nanday ahy hamonjy ani-fivoriambe io. Fe anisani-raha tsy mety halinoko mihintsy fivoriambe io.

MARO TY RAHALAHY NOHO ANABAVY NANAMPY AHY HANDROSO

Nipetraky tamy pilasy misy fambolea noho fiharea rey zahay tamy zaho mbo nimpamaraky. Tena niteako ty nikarakara ani-biby niharenay rey. Nieritseritsy aho tamy zay hoe teako laha lasa veterinera aho. Niresahini-mamako tamy anti-panahy amy fiangona eo raha iny. Soa fanahy anti-panahy iny lafa niresaky amiko. Niresahiny moramora tamiko hoe fa miay amy “andro farany” tsika henanizao, ka laha mbo mandany fotoa maro hianara amy iniversitè eny aho, le tsy ho zarizary ty fifandrambesako amy Jehovah. (2 Tim. 3:1) Nanapa-kevitsy amy zay aho fa tsy hianatsy amy iniversitè eny.

Fe mbo niasa loha aho hoe ino ty hataoko lafa vita ty fianarako tamy lisè eny. Le nanompo tsy tampaky aloha aho saky farani-herinandro, fe fa fahazara avao raha zay tamiko, sady tsy nieritseritsy hanao mpisava lala zao aho. Tsy vitani-zay fa mbo nampirisiky ahy hiasa tontolo andro amy orinasa bevata raiky ta Toronto ao zay koa babako noho dadatoako. Samby tsy Vavolombeloni-Jehovah moa rozy. Sefosefo tamy orinasa io ao dadatoako ka farany aho naneky.

Lasa nanapatapaky fanompoa noho fivoria aho lafa ta Toronto any satria nanao asa fanampiny noho ninama tamin’olo tsy Vavolombelo. Niaraky nipetraky tamy dadabeko tsy Vavolombelo zay tse aho tamy voalohany, fe nimaty ie tafara atoy ka tsy maintsy nila trano hafa aho.

Rambesiko sahala amy ray aman-dreniko io ty fianakaviani-Hutchesons, azy nanday ahy tamy Fivoriambe tamy 1958 rey. Nitaomin-drozy hipetraky miaraky amin-drozy aho le nampean-drozy handroso ara-panahy. Natao batisa miaraky amy anakin-drozy atao hoe John zay aho tamy 1960. Nanomboky nanao mpisava lala John, ka lasa te hanoka fotoa maro hitoria koa aho. Hitani-rahalahy tamy fiangona teo fa tena niezaky aho ka lasa nivoatendry ho mpiandraikitsy Fivoria Mikasiky Fiaina Noho Fanompoa. Zay moa ty ikaiha azy henanizao.

NAHAZO NAMA TENA SOA SADY NILASA MPISAVA LALA

Nanambaly ani-Randi Berge aho tamy 1966. Mpisava lala tena nazoto ie ka parè hifindra amy pilasy mila mpitory fanampiny. Tena nila ze hahasoa anay mpiandraikitsini-faritsinay zay ka nampirisihiny zahay mba hanampy fiangona a Orillia, a Ontario any. Le nandeha vatany zahay.

Laha vo niavy kelikely ta Orillia any zahay, le nanao mpisava lala maharitsy manahaky ani-Randi koa aho. Tena nisy vokany tamiko ty fazotoany! Lafa zaho niezaky nanao soa ty fanompoako, le lasa niteako ty nampiasa Baiboly noho nahita olo mandramby soa ty fahamarina. Tena nifalifaly aho lafa nanampy mpivaly ta Orillia any zay. Nanova ty fiainan-drozy rozy ka lasa mpanomponi-Jehovah.

NIANATSY FIVOLANA VAOVAO NOHO NANOVA TY TOE-TSAINAY

Nifankahita tamy Arnold MacNamara aho lafa ta Toronto any. Anisani-rahalahy nitariky ta Betela ao ie. Nanontaneany zahay vasa mba naniry hanao mpisava lala manoka. Avy le namaly aho hoe: “Ee! Afaky mandeha zahay ndre aia ndre aia laha tsy a Québec any avao!” Nisy vokany amiko ty fomba fahitan’olo sisany manao safà anglè a Kanada any, ty olo manao safà fransè a Québec any. Nisy nanohitsy ty fanjakà tany tamy zay, le tean-drozy laha misaraky amy Kanada amy zay Québec ka hahazo fahaleovan-tena.

Nivola Arnold hoe: “Québec avao zao ro hitani-sampana hoe azo andefasa mpisava lala manoka amy fotoa manahaky ani-zao.” Avy le naneky aho. Haiko fa teani-Randi ty hanompo amy faritsy io. Tsapako tafara atoy hoe anisani-fanapahan-kevitsy tena nety tamy fiainako iny!

Lafa nianatsy Fransè tanatini-limy herinandro zahay amy Randi, le nalefa ta Rimouski any miaraky mpivaly hafa rezay. Tokotokony ho 540 kilometatsy avaratsini-Montréal ty misy ani-tanà io. Tsapako hoe mbo tokony hianatsy marè zahay, sirtò moa lafa mamaky fampandrenesa maromaro am-pivoria any rey aho. Nivola aho ndraiky zay hoe amy fivoriambe ataontsika manaraky io, le hisy “vahiny otrisy” maro ho avy, kanefa raha zao tokony hoe “vahiny baka an’Otrisy any.”

Lafa zahay ta Rimouski ao, le nisy ranabavy efatsy mpitovo mafana fo rezay nanampy anay. Teo koa Rahalahy noho Anabavy Huberdeaus noho anakampelan-drozy roe rezay. Nanofa trano bevata biby zay ry Huberdeaus, le nanampy amy fandoava ani-hofantrano iny ze mpisava lala iaby nipetraky tao. Trano Foty ty nikaihanay azy satria foty ty lokoni-trano io noho ty tohan-trano aminy eo. Nisy 12 na 14 eo zahay nipetraky tamy trano io ao. Mpisava lala manoka zahay amy Randi ka matetiky zahay nitory saky maray, folakandro, noho saky hariva. Tena nifalifaly zahay satria tozoro nisy olo afaky hiaraky manompo aminay avao, ndre amy hariva asotry rey.

Tena nifandramby marìny amy mpisava lala tsy nivaliky rey zahay ka lasa sahala amy fianakavianay io mihintsy rozy. Misy fotoa zahay miaraky mamindro, mitsangatsanga, noho miaraky miketriky. Nahay nititiky moziky ty raiky amy rahalahy rey ka matetiky zahay niaraky nihira noho nitsinjaky saky Sabotsy hariva.

Tea nianatsy Baiboly ty ankamaroan’olo ta Rimouski any! Tsy ampy limy tao avao le fa maromaro ty mpianatsy Baiboly natao batisa. Lasa 35 eo ho eo ty mpitory tamy fiangona eo. Tena nifalifaly biby zahay!

Nampiofany hahay hitory zahay ta Québec any. Hitanay hoe tena nanampy anay Jehovah, ndre tamy fanompoa zay ndre tamy ze raha nilànay amy fiaina andavanandro. Niezaky avao koa zahay mba ho tea olo manao safà fransè rey, ho tea ty fivolanan-drozy, noho ty fomban-drozy. Nahavy anay ho tea fomban-tany hafa koa raha zay.​—2 Kor. 6:13.

Tsy nampoizinay fa nitendreni-sampana hifindra a Tracadie, tanà amy sisini-antinanani-New Brunswick any zahay. Tena nisarotsy aminay raha zay satria vo baka nifindra trano zahay sady zaho koa amin’io nahita asa tapa-potoa tamy lakilasy raiky zay tao. Tsy vitani-zay fa vo lasa mpitory ty sisany amin’olo nampianarinay rey, le zahay koa anatini-hamboatsy Efitrano Fanjakà.

Nivavaky mikasiky ani-fifindrà iny avao zahay tamy farani-herinandro iny, le bakeo nandeha nitsidiky ani-Tracadie. Tena tsy nitovy tamy Rimouski ty tany. Fe ndre zay le nanapa-kevitsy ho any avao zahay satria any ty teani-Jehovah hisy anay. Nitsapa toetsy ani-Jehovah zahay ka hitanay ty nangalany ze raha iaby mety hanakasaka anay. (Mal. 3:10) Tena nifandramby soa tamy Jehovah Randi sady tsy tea tena. Olo teatea somonga koa ie ka lasa tsy nisarotsy aminay ty nifindra.

Robert Ross avao ro anti-panahy tamy fiangonanay vaovao iny ao. Fa nimpisava lala tao avao rozy amy Linda valiny, le nanapa-kevitsy hijano ao avao rozy lafa niteraky ani-anakilahin-drozy voalohany iny. Marina fa niteza rozy, fe tena nampahery anay rozy satria tea nandramby vahiny noho nazoto nitory.

NAHAZO FITAHIA MARO ZAHAY LAFA NANOMPO TAMY PILASY MILA FANAMPEA

Nimpisava lala ta Tracadie ao tanatini-roe tao zahay. Tsy nampoizinay ndraiky tafarani-zay fa nivoatendry hanao ty asani-faritsy zahay. Nanompo tamy faritsy manao safà anglè amy zay koa zahay tanatini-fito tao, kanefa zahay talohani-zay tamy faritsy manao safà fransè ta Québec any. Nidera ahy tamy lahateny nataoko rey tse Léonce Crépeault, azy mpiandraikitsini-vondrom-paritsinay ta Québec any zay. Fe bakeo amy zay ie nanontany ahy hoe: “Akory ty hahavy ani-raha rey ho mora orihy?”a Nanampy ahy raha zay mba hieritseritsy hoe ino ty hataoko mba hahavy ty fampianarako hazava soa noho mora azo.

Anisani-tsy halinoko mihintsy fanendrea niazoko tamy Fivoriambe Iraisam-pirenena ta Montréal any tamy 1978 zay. “Finoa Mandresy” ty foto-kevitsini-fivoriambe iny tamin’io. Nivoatendry hiasa amy Sampan-draharaha Mikarakara Hany aho tamy zay. Olo 80 000 eo zahay, le nisy fomba fiasa vaovao natao mba hizarà ani-hany iny. Tena nivaovao tanteraky ty raha iaby, ndre ty mpiaraky miasa zay, ndre ty ketriky, ndre ty fomba nikarakarà ani-hany iny. Nana frizidera 20 eo ho eo zahay, fe nisy fotoa raha rey tsy nandeha. Tsy afaky nilitsy tamy stady iny tao zahay talohani-hanombohani-andro voalohany iny. Le teo avao zahay zisiky sasakaly satria nisy laboly ty tao. Namelo laforo amy zay zahay amy halikin’iny mba hanaova sakafo maray. Nivozaky biby zahay, fe maro ty raha nianarako baka amy mpiasa an-tsitrapo namako rey. Tena niasa mafy rozy, matotsy, sady teatea somonga. Mbo mpinama avao zahay zisiky henanizao. Tena nifalifaly aho satria afaky nanatriky ani-fivoriambe miavaky natao ta Québec any iny. Anisani-tany nisy fanenjeha mafy ty tany tanelanelani-1940 noho 1960 eo.

Maro koa ty raha nianarako baka amy mpiandraikitsy namako tamy fivoriambe natao ta Montréal any iny. David Splane ro nimpiandraikitsini-fivoriambe tanatini-tao raiky. Anisani-Filan-kevi-pitantana moa ie henanizao. Lafa niavy amy zay ty fivoriambe manaraky, le lasa zaho ro nivoatendry ho mpiandraikitsini-fivoriambe iny. Fe ndre zay, le tena nanoha ahy David.

Nanao ty asani-faritsy tanatini-36 tao zahay. Tamy 2011 amy zay aho nivoatendry ho mpampianatsy amy Sekolini-Anti-panahy. Fa 75 ty kitrely niroroanay amy Randi tanatini-roe tao latsaky, fe tsy nisera soro iaby nataonay rey. Saky tampitsy ty herinandro, le nifalifaly biby anti-panahy rey satria nahatsapa rozy hoe tena nanampy an-drozy hifandramby soa amy Jehovah ty Filan-kevi-pitantana.

Tafarani-zay aho nampianatsy tamy Sekolini-Mpitory Fanjakà Iny. Nahatiaro vozaky avao mpianatsy rey matetiky satria tena nifeno ty fandaharam-potoanay: Nianatsy tanatini-fito lera eo ho eo zahay sanandro, nanao devoara tan-trano any tanatini-telo lera saky hariva, le nanao asa karazani-efatsy na limy sankerinandro. Nivola tamin-drozy zahay amy mpampianatsy namako rey fa tsy ho nivitan-drozy raha iaby reo laha tsy nanampy an-drozy Jehovah. Tiaroko avao fa tena nitseriky mpianatsy rey lafa nahita hoe nahavita raha maro mandilatsy ty nieritseretin-drozy rozy lafa niantehitsy tamy Jehovah.

TENA HANDRAMBY SOA IHA LAHA MIDARY OLO

Tena nidary olo mamako, le zay ro nahavy ty olo nampianariny Baiboly handroso. Zay koa ro nanampy ani-babako hanova ty fomba fahitany ty fahamarina. Telo andro tafarani-nahafatesani-mamako, le tsy nampoizinay fa niavy tamy Efitrano Fanjakà any babako mba hanatriky lahateny ho ani-besinimaro, le mbo nivory avao ie 26 tao tafara atoy. Tsy nivita batisa mihintsy aloha babako, fe mivola amiko anti-panahy rey hoe tozoro ie avao ro avy voalohany am-pivoria ao.

Tena modely soa ho anay amy anabaviko rey mamako. Samby mpanomponi-Jehovah tsy mivaliky iaby henanizao anabaviko telo rey miaraky amy ty valin-drozy. Manompo amy biròni-sampana ty roe amin-drozy: Ty raiky a Portigaly any, le raiky a Haïti any.

Mpisava lala manoka a Hamilton, a Ontario atoy henanizao zahay amy Randi. Tamy zahay mbo nanao ty asani-faritsy, le tena niteanay ty niaraky amy mpitory rey nanao fimpolia mitsidiky noho nampianatsy Baiboly. Fe henanizao le zahay mihintsy ro mahita ty fandrosoani-olo ampianarinay rey. Tena mahafalifaly anay raha zay! Satria koa zahay lasa mpinama amy rahalahy noho anabavy amy fiangonanay vaovao toy eto, le mampahery anay ty mahita ty fomba anampeani-Jehovah an-drozy, ndre amy raha soa zay ndre lafa anatini-fotoa sarotsy.

Tena velom-pankasitraha zahay lafa mandiniky ty lasa, satria maro ty olo nampiseho hoe midary anay. Anjaranay koa henanizao ro miezaky “mila ze hahasoa” ty hafa ka mampirisiky an-drozy hanao ze fara herin-drozy amy fanompoa ani-Jehovah. (2 Kor. 7:6, 7) Misy fianakavia raiky zay, ohatsy, samby mpisava lala iaby rozy an-trano ao laha tsy nahoda iny avao. Nanontaneako amy zay nahoda iny vasa mba fa nieritseritsy hanao mpisava lala. Nivola ie hoe fa manoha an-drozy telo moroanaky ie. Le hoy ty asako: “Mety mahavita manoha an-drozy mandilatsy ani-Jehovah va iha?” Nampirisihiko ie mba hanao mpisava lala amy zay ho falifaly manahaky ani-valiny, anakilahiny, noho anakampelany iny. Lasa mpisava lala ie enim-bola tafarani-zay.

Mbo hiezaky avao zahay amy Randi ‘hanambara ty raha mahatseriky ataoni-Jehovah amy taranaky afara any’, le mitamà zahay hoe hahita fifalea amy fanompoa ani-Jehovah koa rozy manahaky anay.​—Sal. 71:17, 18.