Fa Afaky Nanenga Hadisoa Jehovah Taloha ty Nampisy ty Vilim-panavota

Tsy misy fomba ahazoantsika fanengà hadisoa laha tsy amy alalan’ny sorom-panavota nataon’i Jesosy iny avao. (Efes. 1:7) Fe mivola ty Baiboly hoe: “Be fandefera [Ndranahary] ka nanenga ty fahotà natao taloha”, zany hoe ty fahotà natao talohan’ny nanomezan’i Jesosy ty vilim-panavota. (Rom. 3:25) Ndre mbo tsy nisy ty vilim-panavota le fa afaky nanenga hadisoa Jehovah. Fe mbo nifanaraky amy ty fitsipikiny mikasiky ty rariny avao raha nataony zay. Manao akory zao?

Nampitamà Jehovah hoe hisy ‘taranaky’ raiky hanavotsy ani-ze mino azy noho mino ty raha ampitamaniny. Sahala fa nanome ty vilim-panavota zany Jehovah lafa nivola an’io. (Gen. 3:15; 22:18) Natoky tanteraky Ndranahary fa hanao soro ty ainy Anakilahiny teany iny, amy fotoa voatondrony. (Gal. 4:4; Heb. 10:7-10) Lafa tan-tany etoy Jesosy, le namean’i Jehovah fahefà hanenga ty fahotan’olo ie ndre mbo tsy nanome ty vilim-panavota aza. Afaky nanenga ty fahotani-ze olo nino azy Jesosy, satria hainy fa hanafaky ty fahotan-drozy ty soro hataony.​—Mat. 9:2-6.