Manaraky Fampitandrema va Iha?

1. Ino ty hataon’i Jesosy tsy ho ela?

TENA miavaky andro iainantsika zao! Kely sisa le hisy raha bevata maro hiseho. Hitsara ty olo iaby an-tany eto Jesosy afarafara ao. Teany ho haintsika hoe ino ty raha hiseho aloha kelin’ny hitsaràny ani-zao tontolo zao. Farany nanome “famantara” ho an’ny mpianatsiny ie mikasiky ty fanatrehany tsy hita maso noho ty “farani-zao tontolo zao.” (Mat. 24:3) Hita amy Matio toko faha-​24 noho 25, noho amy Marka toko faha-​13 voho Lioka toko faha-​21 ao famantara io.

2. Ino ty hodinihintsika ato, le manino raha io ro hanampy antsika?

² Niresaky fanohara telo Jesosy mba hanampea antsika ho parè amy andro io. Fampitandrema ho antsika raha rey. Tsy ino fanohara telo niresahiny io fa ty fanohara mikasiky ty aondry noho aosy, ty virjiny mahihitsy noho gegy, noho mikasiky ty talenta. Ho hitantsika amy fanohara reo kiraidraiky fa mianky amy ty raha ataon’olo raiky ro hitsaràn’i Jesosy azy. Handiniky an’ny fanohara telo reo tsika amy lahatsoratsy toy ato, le hohenteantsika hoe ino ty azontsika ianara baka amy raha rey. Ndao hodinihintsika tse ty fanohara mikasiky ty aondry noho aosy.

TY AONDRY NOHO AOSY

3. Ombia Jesosy ro hitsara ty olo?

³ Niresaky mikasiky ty aondry noho aosy Jesosy tamy fanoharany raiky zay. Teany haseho baka amy raha io fa mianky amy ty fomba andrambesan’olo raiky ty vaovao soa noho ty fomba anohanany ty rahalahiny voahosotsy ro hitsaràny azy. (Mat. 25:31-46) Amy “fijalea bevata” Jesosy ro hitsara hoe aondry sa aosy ty olo raiky, zany hoe aloha kelin’ny Aramagedona. (Mat. 24:21) Hanao manahaky ty ataon’ny mpiarakandro manavaky ty aondry amy ty aosy rey Jesosy amy fotoa zay, satria havahiny ze olo nanoha ty voahosotsy mpanori-dia azy, noho ze tsy nanao ani-zay.

4. Laha hentea ty Isaia 11:3, 4, manino tsika ro afaky matoky hoe hanao ty rariny Jesosy lafa hitsara ty olo? (Henteo koa sary toy.)

⁴ Jesosy ro nitendren’i Jehovah ho Mpitsara ty olombelo. Mivola ty Baiboly fa hanao ty rariny avao ie lafa hitsara. (Vakio Isaia 11:3, 4.) Dinihiny ty fandaisam-batan’olo raiky, ty toe-tsainy, noho ty raha volaniny, tafilitsy amy zay ty fomba fandesan-drozy ty rahalahiny voahosotsy. (Mat. 12:36, 37; 25:40) Ho hain’i Jesosy hoe ia ro nanoha ty rahalahiny voahosotsy noho nanampy an-drozy tamy asa nataon-drozy.a Maro ty fomba azon’olo manahaky aondry io ampisehoa hoe manoha ty rahalahin’i Kristy rozy, fa ty tena bevata, manampy an-drozy amy asa fitoria. Lafa hitsara amy zay Jesosy, le hataony hoe “olo marina” rozy sady ho afaky ‘hiay mandrakizay’ an-tany eto. (Mat. 25:46; Apok. 7:16, 17) Tena hahazo valisoa bevata vatany rozy! Laha tsy mivaliky mihintsy rozy amy fijalea bevata noho afarani-zay, le tsy hifafa anatin’ny “bokin’ny fiaina” ao ty anaran-drozy.​—Apok. 20:15.

5. Ino ty ianarantsika baka amy fanohara mikasiky ty aondry noho aosy, le ia ro afaky mandramby soa baka amy raha io?

⁵ Asehò hoe tsy mivaliky iha. Mihatra amin’olo mitamà hiay mandrakizay an-tany eto avao fanoharan’i Jesosy mikasiky aondry noho aosy iny. Asehon-drozy hoe manam-pinoa rozy ka tohanan-drozy ty rahalahin’i Kristy mba hahavita ty asa fitoria. Arahin-drozy soa koa ty tari-dala baka amy mpanompo azo atokisa noho mahihitsy nitendren’i Jesosy iny. (Mat. 24:45) Fe ndre azy mitamà hiay an-danitsy any rey koa aza mbo mila manoriky ty fampitandrema amy fanohara io. Fa manino? Satria dinihin’i Jesosy soa ty fandaisam-batan-drozy, ty toe-tsain-drozy, noho ty raha volanin-drozy. Tsy maintsy asehon-drozy koa hoe tsy mivaliky rozy. Zay ty antony nahavy an’i Jesosy niresaky fanohara roe hafa mba hampitandrema ty voahosotsy. Hitantsika amy Matio toko faha-​25 ao koa fanohara reo. Ndao hodinihintsika ty fanohara mikasiky ty virjiny mahihitsy noho gegy.

VIRJINY MAHIHITSY NOHO GEGY

6. Akory ty ahità hoe mahihitsy ty limy amy virjiny rey? (Matio 25:6-10)

⁶ Niresaky virjiny 10 nandeha hitsena mpampakatsy Jesosy, amy fanohara mikasiky virjiny iny. (Mat. 25:1-4) Samby nitamà rozy hoe ho tafaraky amy mpampakatsy iny, le hiaraky hanao fety aminy amy mariaziny ao. Nivola Jesosy fa “mahihitsy” ty limy amy virjiny reo, fa ty limy “gegy.” Nioma virjiny mahihitsy rey sady niamby soa. Parè handiny avao rozy zisiky hiavian’ny mpampakatsy iny, ndre haly biby aza ie vo avy. Nanday menaky fanampiny mihintsy aza rozy, amy zay tsy sahira laha ohatsy ka taratara mpampakatsy iny vo avy. Fa nioma zany rozy amy zay mirehitsy avao ty jiron-drozy. (Vakio Matio 25:6-10.) Lafa niavy mpampakatsy iny, le niaraky aminy tamy fety tao virjiny mahihitsy rey. Manahaky ani-zay koa ty hiseho amy ty Kristiana voahosotsy. Ze voahosotsy fa nioma, niamby soa, noho tsy nivaliky zisiky hiavian’ny fotoa hitsaràn’i Kristy avao ro hiaraky amy Jesosy, azy Mpampakatsy iny, amy Fanjakàny an-danitsy any.b (Apok. 7:1-3) Ka manao akory virjiny gegy rey?

7. Nanao akory virjiny limy gegy rey, le ino ty antony?

⁷ Tsy nanahaky an’ny virjiny mahihitsy rey azy virjiny limy gegy rey, satria tsy niparè rozy lafa niavy mpampakatsy iny. Fa nitsilopilopy jiron-drozy rey kanefa tsy nanday menaky fanampiny rozy. Tsy maintsy nandeha nivily menaky rozy laha vo nihain-drozy hoe fa marìny mpampakatsy iny. Mbo tsy nitafimpoly rozy lafa niavy mpampakatsy iny. Lasa amy zay azy “virjiny mahihitsy rey” satria fa niparè, ka “niaraky tamy mpampakatsy iny nilitsy tamy mariazy iny tao, bakeo nahily varavara iny.” (Mat. 25:10) Ndrey amy zay virjiny gegy rey niavy. Ta ho nilitsy tamy mariazy tao koa rozy, fe nivola tamin-drozy mpampakatsy iny hoe: “Tsy haiko nareo.” (Mat. 25:11, 12) Tsy nioma virjiny reo ka tsy nahaliny zisiky hiavian’ny mpampakatsy iny. Ino ty azon’ny voahosotsy ianara baka amy zay?

8-9. Ino ty azon’ny voahosotsy ianara baka amy fanohara mikasiky virjiny iny? (Henteo koa sary io.)

⁸ Asehò hoe fa mioma noho miamby soa iha. Tsy nivola Jesosy hoe hizara antoko roe ty voahosotsy, ty raiky nioma soa zisiky amy farani-zao tontolo zao, le ty raiky tsy nanao ani-zay. Nanazava ty raha hahazo ty voahosotsy avao ie laha tsy mioma rozy ka tsy miaritsy zisiky farany. Tsy hahazo ty valisoan-drozy rozy laha tsy manao ani-zay. (Jaona 14:3, 4) Tena vatan-draha raha zay fa tsy saintsay! Tena tokony handramby am-po ty fampitandrema amy fanohara mikasiky virjiny io tsika, ndre mitamà hiay an-danitsy any ndre ho an-tany etoy. Tsy maintsy miamby avao tsika kiraidraiky, mioma, noho parè hiaritsy zisiky farany.​—Mat. 24:13.

⁹ Lafa baka niresaky an’ny fanohara mikasiky virjiny iny Jesosy mba hampisehoa hoe mila mioma noho miamby soa avao tsika, le nanao fanohara mikasiky talenta koa. Asehon’ny fanohara io fa tena mila mazoto miasa tsika.

TALENTA

10. Akory ty nampisehoan’ny mpanompo roe rey hoe azo atokisa rozy? (Matio 25:19-23)

¹⁰ Niresaky mikasiky mpanompo telo Jesosy amy fanohara mikasiky talenta iny. Ty roe amy mpanompo reo tsy nivaliky tamy tompon-drozy, fa ty raiky nivaliky. (Mat. 25:14-18) Nasehon’ny mpanompo roe rey hoe maeva atokisa rozy ka niasa mafy rozy mba hampitomboa an’ny dralan’ny tompon-drozy rey. Alohan’ny handehanan’ny tompon-drozy io an-tany hafa any, le nanankinany talenta rozy. Drala be raha io. Niasa mafy ty roe amy mpanompo rey sady nampiasa soa an’ny drala iny. Ino ty vokany? Lafa niavy tompon-drozy iny, le fa nisy tombony roe mandilatsy an’ny drala namea an-drozy iny ty niazon-drozy. Nidera an-drozy tompon-drozy iny, ka niaraky ‘nifalifaly taminy rozy.’(Vakio Matio 25:19-23.) Ka nanao akory mpanompo fahatelo iny? Nataony akory drala namean’ny tompony azy iny?

11. Ino ty nahazo an’ny mpanompo “kamo” iny, le ino ty antony?

¹¹ Nahazo talenta raiky mpanompo fahatelo iny, fe olo “kamo” ie. Nitamà tompony iny hoe hampiasàny soa talenta namea azy iny. Fe tsy zay ty nataony fa naleviny raha iny. Lafa nimpoly tompony iny, le mbo talenta raiky iny avao ty nameany azy. Tsy nana toe-tsay soa mpanompo io. Tsy mba niala tsiny tamy tompony ie satria tsy nampitombo an’ny dralany iny. Vomaiky aza ie nivola hoe “olo sarotsarotiny” tompony iny. Tsy nanaja azy mpanompo io ka tsy nahazo hatò taminy. Tsy zay avao fa mbo nalà taminy talenta iny sady niroasy baka an-tranon’ny tompony ao ie.​—Mat. 25:24, 26-30.

12. Mampiseho an’ia henanizao mpanompo roe tsy mivaliky rey?

¹² Mampiseho ty voahosotsy tsy mivaliky, mpanompo roe tsy mivaliky rey. Le Tompo iny amy zay mampiseho an’i Jesosy. Manasa an-drozy ie mba ‘hiaraky hifalifaly aminy.’ Hahazo ty valisoan-drozy an-danitsy any rozy lafa hovelomy amy fameloma voalohany. (Mat. 25:21, 23; Apok. 20:5b) Ka manao akory mpanompo kamo iny? Tena ohatsy raty ie ka fampitandrema ho an’ny voahosotsy. Manino tsika ro mivola ani-zay?

13-14. Ino ty ianaran’ny voahosotsy baka amy fanohara mikasiky talenta iny? (Henteo koa sary io.)

¹³ Asehò hoe mazoto miasa iha. Mbo manahaky fanohara mikasiky virjiny iny avao fanohara mikasiky talenta toy, satria tsy nivola mialoha Jesosy hoe ho lasa kamo ty voahosotsy. Nanazava avao Jesosy hoe ino ty hahazo an-drozy laha lasa kamo rozy. Tsy ho vitan-drozy ty hanao raha mba hahavy an-drozy “ho azo antoky hoe voakaiky noho voafily [rozy]”, ka tsy hengà hilitsy amy Fanjakà an-danitsy any.​—2 Pet. 1:10.

¹⁴ Hita mazava soa amy fanoharan’i Jesosy mikasiky virjiny noho talenta io fa tsy maintsy mioma, miamby soa, noho mazoto miasa ty Kristiana voahosotsy. Fe mbo niresaky raha hafa koa va Jesosy mba hampitandrema ty voahosotsy? Eka! Hitantsika amy Matio 24:40, 41 ao raha nivolanin’i Jesosy mba hampitandrema ty voahosotsy io.

IA RO “HANDESY”?

15-16. Manino ty Matio 24:40, 41 ro manampy ty voahosotsy hahay hoe mila miamby avao rozy?

¹⁵ Talohan’ny niresahan’i Jesosy an’ny fanohara telo reo, le niresaky ty fitsarà farany ty voahosotsy ie mba hahità hoe ia ro nahazo hatò taminy. Niresaky mikasiky lahilahy roe niasa tam-baibò tany noho ampela roe nanodiky vato fikoseha vary ie. Atao raha samby nitovy ty asa nataon’ny lahilahy rey, le nitovy koa ty ahin’ampela rey. Fe nivola Jesosy hoe ty raiky amin-drozy “handesy le ty raiky hengà.” (Vakio Matio 24:40, 41.) Bakeo nampirisiky ty mpanori-dia azy ie hoe: “Miambena avao zany satria tsy hainareo ty andro hiavian’ny Tomponareo.” (Mat. 24:42) Mbo mitovy amy zay koa ty raha niresahin’i Jesosy lafa ie baka niresaky fanohara mikasiky virjiny iny. (Mat. 25:13) Mifandramby va raha nivolaniny reo? Eka. Ze tena voahosotsy noho tsy mivaliky ro ‘handesin’i Jesosy’ hilitsy amy Fanjakà an-danitsy any.​—Jaona 14:3.

¹⁶ Asehò hoe miamby soa iha. Tsy havory miaraky amy ty voahosotsy “nifiliny”, ze voahosotsy tsy mahavita miamby. (Mat. 24:31) Fe tsy ty voahosotsy avao ro mila miamby noho tsy mivaliky mihintsy, fa anisani-zay koa lafa kila mpanompo-Ndranahary mitamà hiay mandrakizay an-tany eto.

17. Manino tsika ro tsy tokony hiasa loha laha amy androntsika zao Jehovah vo mifily olo sisany mba ho voahosotsy?

¹⁷ Mahay soa an’i Jehovah tsika le zay ty antony mahavy antsika matoky hoe manao ty rariny ie lafa mitsara. Tsy miasa loha zany tsika laha amy androntsika zao Jehovah vo manapa-kevitsy hoe hifily olo sisany tsy mivaliky mba ho voahosotsy.c Tiarontsika ty raha nivolanin’i Jesosy tamy fanohara mikasiky tanimboaloboky iny. Nivola ie fa nisy mpiasa fa tamy lera faha-11, zany hoe tamy 5 hariva vo niasa. (Mat. 20:1-16) Nisy olo sisany fa niasa tamy tanimboaloboky tany liany nimaray, fa ty ilany fa hariva vo nanomboky niasa. Fe nitovy avao ty karama namea an-drozy. Manahaky ani-zay koa ty voahosotsy. Hahazo ty valisoan-drozy an-danitsy any rozy ndre nombia ty nifiliana an-drozy, laha tsy mivaliky zisiky farany rozy.

ARAHO SOA TY FAMPITANDREMA

18-19. Ino ty nianarantsika tamy fanoharan’i Jesosy rey?

¹⁸ Ino ty nidinihintsika tato? Hita tamy fanohara mikasiky aondry noho aosy iny fa mila tsy mivaliky amy Jehovah mihintsy azy mitamà hiay mandrakizay an-tany etoy rey, henanizao noho amy fijalea bevata ho avy tia. Aloha kelin’ny Aramagedona, le hitsara ty olo tsy mivaliky Jesosy ka “hahazo fiaina mandrakizay” rozy.​—Mat. 25:46.

¹⁹ Nandiniky fanohara roe koa tsika teo, le samby misy fampitandrema ho an’ny voahosotsy tao. Tamy fanoharan’i Jesosy mikasiky virjiny mahihitsy noho gegy iny, le nasehoni-azy limy rey hoe hendry rozy. Nioma rozy sady niamby soa, ka niparè handiny ndre ombia ndre ombia ty niavian’ny mpampakatsy iny. Fa azy virjiny gegy rey tsy nioma. Farany tsy nampilirin’ny mpampakatsy iny amy mariaziny ao rozy. Tokony hioma koa tsika mba ho parè handiny avao ndre ombia ndre ombia ty fotoa hanamperan’i Jesosy ani-zao tontolo zao. Nandiniky mpanompo roe tsy nivaliky sady nazoto niasa rey koa tsika tamy fanoharan’i Jesosy mikasiky talenta iny. Niasa mafy ho an’ny tompon-drozy rozy ka nankasitrahany. Fa azy mpanompo kamo iny tsy nankasitrahany. Ino ty fianara ho antsika? Tokony hiasa mafy amy fanompoa an’i Jehovah avao tsika zisiky farany. Le tamy farany tsika nandiniky hoe tena mila miamby avao ty voahosotsy, amy zay rozy ‘handesin’i Jesosy’ an-danitsy any mba hahazo ty valisoan-drozy. Tena fa tsy linin-drozy ty hiavian’ny fotoa ‘hamoria’ an-drozy an-danitsy any mba hiaraky amy Jesosy. Lafa vita ty aly Aramagedona, le halàn’i Jesosy ho valy rozy amy mariazin’ny Anak’aondry iny.​—2 Tes. 2:1; Apok. 19:7, 9.

20. Ino ty hataon’i Jehovah ho ani-ze olo manaraky soa ty fampitandremany?

²⁰ Tena fa mihamarìny ty fotoa hitsaràn’i Jesosy ty olo, fe tsy misy antony tokony hampatahotsy antsika. Laha tsy mivaliky avao tsika, le hamean’ny Babantsika be fitiava an-danitsy any iny “hery mandilatsy ty an’olombelo”, amy zay tsika “ho afaky ... hitsanga anatrehan’ny Anak’olo eo.” (2 Kor. 4:7; Lioka 21:36) Ndre mitamà hiay an-danitsy any tsika ndre an-tany etoy, le hampifalifaly an’ny Babantsika iny tsika laha manaraky soa ty fampitandrema tamy fanoharan’i Jesosy rey. Tena soa fanahy amintsika Jehovah, ka ho ‘hita voasoratsy amy bokin’ny’ fiaina ao ty anarantsika.​—Dan. 12:1; Apok. 3:5.