Fa Nihainao Va?

Tena vatan-draha va ty moziky tamy andron’ny Israelita?

TENA vatan-draha tamy kolontsain’ny Israelita ty moziky. Matetiky miresaky olo nititiky moziky noho nihira ty Baiboly. Laha ty marina, le folo sanjato eo ho eo amy Baiboly ro hira, anisani-zay ty bokin’ny Salamo, Tononkiran’i Solomona, noho Fitomaniana. Mivola ty boky raiky mikasiky fiaina tamy andron’ny Baiboly fa presky nampiasa moziky ty Israelita tamy fiainan-drozy.

Tamy fiaina andavanandro. Nititiky moziky noho nihira ty Israelita mba hampisehoa ty fihetseham-pon-drozy. (Isaia 30:29) Nititiky ampongatapaky, nihirahira, noho nitsinjaky ty ampela lafa nisy mpanjaka vaovao nasia satroboninahitsy, na lafa nandresy tan’aly any ty maramila. Nanao ani-zay koa rozy lafa nanao fety mifandramby amy fanompoa an’i Jehovah. (Mpits. 11:34; 1 Sam. 18:6, 7; 1 Mpanj. 1:39, 40) Nihira koa ty Israelita lafa nisy olo nimaty, mba hampisehoan-drozy ty alahelon-drozy. (2 Tan. 35:25) Hitantsika baka amy zay fa tena nitea moziky ty Israelita.

Tan-tranon’ny mpanjaka ao. Tea nijanjy moziky ty mpanjakan’ny Israely. Nikaihin’i Saoly Mpanjaka ho an-tranony any, ohatsy, Davida mba hititiky harpa ho azy. (1 Sam. 16:18, 23) Lafa nilasa mpanjaka amy zay Davida, le namoro raha maneno sankarazany ie, nanoratsy hira soasoa, sady nandamy antokom-pihira noho mpititiky moziky. Natao tamy tempolin’i Jehovah tao raha reo tafara atoy. (2 Tan. 7:6; Amosa 6:5) Nana mpihira lahilahy noho ampela tan-dapany ao koa Solomona Mpanjaka.​—Mpito. 2:8.

Tamy fanompoa an’i Jehovah. Ty tena bevata marè, nampiasa moziky ty Israelita lafa nanompo an’i Jehovah. Nisy lahilahy 4 000 nititiky moziky mihintsy aza tamy tempoly ta Jerosalema any. (1 Tan. 23:5) Nampiasa kantsỳ rozy, nititiky raha maneno, harpa, noho trompetra. (2 Tan. 5:12) Fe tsy mpititiky mahay reo avao ro nampiasa moziky lafa nanompo an’i Jehovah. Nihira ty Hira Fiakara ty ankamaroan’ny Israelita saky nandeha namonjy fety fatao santao ta Jerosalema any. (Sal. 120-134) Mivola koa ty asa soratsy jiosy fa nanao hira sisany amy Salamoa ao ty Israelita, lafa nihina ty Paska.

Tena mbo vatan-draha amy mpanompo-Ndranahary henanizao koa ty moziky. (Jak. 5:13) Mihira tsika mba hiderà an’i Jehovah. (Efes. 5:19) Mahatiaro ho marìny an’ny rahalahy noho anabavintsika reo tsika lafa miaraky mihira ho an’i Jehovah. (Kol. 3:16) Mampahery antsika koa raha io lafa miatriky raha sarotsy tsika. (Asa. 16:25) Anisan’ny fomba tena soa ampisehoantsika ty finoantsika noho ty fitiavantsika an’i Jehovah ty moziky.