Soa ty Minama amy Rahalahy noho Anabavy!

1-2. Ino ty anisan’ny raha tena vatan-draha amy Jehovah, le ino ty teany hataontsika?

ANISAN’NY raha tena vatan-draha amy Jehovah ty fomba anandesantsika ty hafa. Niresahin’i Jesosy hoe tokony ho teantsika manahaky ty vatantsika ty namantsika. (Mat. 22:37-39) Tafilitsy amy zay ty fiezahantsika ho soa fanahy amin’olo tsy mitovy finoa amintsika. Manahaky an’i Jehovah Ndranahary tsika laha manao ani-zay, “satria ie mampiboaky ty masoandrony amy ty raty fanahy noho ty soa fanahy sady mandatsaky ora amy ty marina noho ty tsy marina.”​—Mat. 5:45.

² Marina fa tean’i Jehovah ty olo iaby, fe ty olo manoriky ty safàny ro teany marè. (Jaona 14:21) Teany hanahaky azy koa tsika. Mampirisiky antsika ie mba ho “tea marè” ty rahalahy noho anabavy noho“hifandramby am-po” amin-drozy. (1 Pet. 4:8; Rom. 12:10) Tokony ho teantsika manahaky ty longontsika na namantsika tena teantsika io zany rozy.

3. Ino ty tokony hotiarovintsika mikasiky ty fitiava?

³ Manahaky folera mila fikarakarà io ty fitiava. Mila manao raha avao tsika mba hampitombo azy. Nanoro hevitsy ty Kristiana apostoly Paoly hoe: “Mifankatiava avao manahaky mpirahalahy io.” (Heb. 13:1) Tean’i Jehovah tsika laha miezaky ho tea ty hafa avao. Hodinihintsika amy lahatsoratsy toy ato hoe manino tsika ro tokony hifandramby marìny amy mpiara-manompo amintsika, le ino ty hanampy antsika hanao ani-zay avao.

MANINO TSIKA RO TOKONY HIFANDRAMBY MARÌNY AMY MPIARA-MANOMPO?

4. Laha hentea ty Salamo 133:1, ino ty azontsika atao mba ho lafovily amintsika avao ty hoe miharo raiky amy mpiara-manompo? (Henteo koa sary reo.)

⁴ Vakio Salamo 133:1. Ekentsika fa marina raha nisoratin’ny mpanao salamo io hoe “soa” sady “mahafalifaly” ty minama amin’olo tea an’i Jehovah. Fe mety tsy ho tsapantsika raha zay kindraiky. Laha misy hazo raiky, ohatsy, fa mpihitanao avao sanandro, le mety tsy ho hitanao ty hasoany. Manahaky ani-zay koa, fa mifankahita matetiky amy mpiara-manompo tsika, sady mety fa ho sanandro mihintsy aza anatin’ny herinandro. Mety tsy ho tsapantsika amy zay hoe tena soasoa vatany ty miharo raiky amin-drozy. Fe ino ty azontsika atao mba ho lafovily amintsika avao rozy? Laha eritseretintsika hoe lafovily amy fiangona ty rahalahy noho anabavy sady lafovily amintsika kiraidraiky koa, le hitombo ty fitiavantsika an-drozy.

5. Mety hanao akory ty olo lafa mahita hoe mifankatea ty vahoakin’i Jehovah?

⁵ Tena falifaly ty olo vo sambany manatriky fivoria lafa mahita ty fifankatiavantsika. Mety hahavy an-drozy hahatsapa raha zay hoe nahita ty fahamarina rozy. Zao ty nivolanin’i Jesosy: “Laha mifankatea nareo, le zay ro hahaizan’olo iaby fa mpianatsiko nareo.” (Jaona 13:35) Diniho ty raha niainan’i Chaithra. Mpianatsy amy iniversité ie sady nianatsy Baiboly tamy Vavolombelon’i Jehovah. Lafa nasà hanatriky fivoriamben’ny vondrom-paritsy ie, le nandeha. Lafa vita ty andro voalohany, le zao ty nivolaniny tamy mpampianatsy Baiboly azy iny: “Mbo tsy nandrakoky ahy zao mihintsy ty ray aman-dreniko. Fe tamy fivoriambenareo iny, le nisy nandrakoky in-52 aho tanatin’ny ndraiky andro avao! Tsapako hoe nampiasa ty vahoakiny Jehovah mba hampisehoany hoe teany aho. Teako aho laha lasa fianakaviany koa.” Nandroso avao Chaithra, le natao batisa tamy 2024 iny. Hitantsika baka amy zay fa lafa mahita ty asa soa ataontsika ty olo, anisani-zay ty fifankatiavantsika, le ho voatosiky hanompo an’i Jehovah rozy.​—Mat. 5:16.

6. Manino ro miaro antsika ty mifandramby marìny amy rahalahy noho anabavintsika reo?

⁶ Ho voaro tsika laha mifandramby marìny amy rahalahy noho anabavintsika reo. Zao ty nampirisihin’i Paoly ty Kristiana namany: “Miezaha avao mba hifampahery sanandro ... tsy no hisy ho lasa tsy mety volany nareo satria mahavita mamitaky anareo ty ota.” (Heb. 3:13) Lasa sarotsy amintsika ty miezaky hanao ty marina avao lafa kivy marè tsika. Fe mety hampiasa ty mpiara-manompo Jehovah amy fotoa zay mba hanampy antsika. (Sal. 73:2, 17, 23) Tena mahasoa antsika raha zay.

7. Ino ty ifandrambesan’ny fitiava noho ty fiharoa raiky? (Kolosianina 3:13, 14)

⁷ Anisan’ny vahoaky miezaky mafy mba hifankatea tsika, ka maro ty fitahia azontsika. (1 Jaona 4:11) Ty fitiava, ohatsy, ro mahavy antsika “hahay hifandefitsy avao,” ka lasa miharo raiky amy mpiara-manompo tsika. (Vakio Kolosianina 3:13, 14; Efes. 4:2-6) Zay mahavy antsika falifaly avao lafa am-pivoria any io satria tsika samby tsika avao ty any.

MIFANOMEZA VONINAHITSY

8. Ino ty ataon’i Jehovah mba hahavy antsika hiharo raiky?

⁸ Fahagagà ty hoe miharo raiky ty rahalahy noho anabavy maneran-tany. Vitan’i Jehovah ty manao ani-zay ndre tsy lavorary aza tsika. (1 Kor. 12:25) Mivola ty Baiboly hoe “ampianari-Ndranahary hifankatea tsika.” (1 Tes. 4:9) Zany hoe mampiasa ty Soratsy Masy Jehovah, le resahiny amintsika ao hoe ino ty tokony hataontsika mba hahavy antsika hifandramby marìny. Ka laha mandiniky soa ty raha ampianariny tsika noho manoriky ty raha ianarantsika le maneky “ampianari-Ndranahary.” (Heb. 4:12; Jak. 1:25) Zay mihintsy ty ataon’ny Vavolombelon’i Jehovah.

9. Ino ty ianarantsika baka amy Romanina 12:9-13 mikasiky fifanomeza voninahitsy?

⁹ Akory ty hanampean’ny Safà-Ndranahary antsika hifandramby marìny? Niresaky mikasiky ani-zay Paoly amy Romanina 12:9-13. (Vakio.) Henteo soa fa mivola andininy io hoe “mifanomeza voninahitsy, le tokony ho voalohany nareo amy fanomeza voninahitsy ty olo hafa.” Ino ty dikani-zay? Tsika mihintsy ro tokony hanao raha voalohany mba “hifandramby am-po” amin’olo. Asehontsika raha zay amy alalan’ny fanengà hadisoa, fahaiza mandramby vahiny, noho mba mizara ty raha ananantsika, na matariky. (Efes. 4:32) Ka mandiny ty rahalahy noho anabavinao hifandramby marìny aminao, fa iha mihintsy ro manaova ani-zay “voalohany.” Ho tsapanao amy zay fa marina raha nivolanin’i Jesosy toy: “Mahasambatsy marè ty manome tany ty mandramby.”​—Asan’ny Apostoly 20:35.

10. Ino ty hanampy antsika hazoto “hifanome voninahitsy”? (Henteo koa sary io.)

¹⁰ Lafa baka niresaky amintsika Paoly hoe tsika ro tokony voalohany amy fanomeza voninahitsy olo, le nampirisiky antsika koa ie mba “hazoto hiasa, fa tsy ho kamo.” Be zotom-po noho miasa mafy ty olo mazoto miasa. Lafa misy raha ampanaovy azy, le tanterahiny soa raha iny. Mampirisiky antsika ty Ohabolana 3:27, 28 hoe: “Ka misalasala manao soa amy ze tokony hanaovan-tsoa, laha mbo azonao atao avao ty manampy.” Midika raha zay fa lafa mahita olo mila fanampea tsika, le manao ze azontsika atao tsika mba hanampea azy malaky. Tsy tokony hisalasala mihintsy tsika hanampy azy. Tsy tokony hieritseritsy koa tsika hoe fa hisy olo hafa hanampy azy na hikarakara azy.​—1 Jaona 3:17, 18.

11. Ino ty hanampy antsika hifandramby marìny?

¹¹ Akory koa ty ampisehoantsika hoe manome voninahitsy ty hafa tsika? Mila engàntsika malaky ty hadisoany laha nanao raha nampeloky antsika ie. Zao ty resahin’ny Efesianina 4:26: “Ka engà ho tratsin’ny masoandro milentiky ty helokinareo.” Ino ty antony? Mivola ty andininy faha-27 hoe ‘hanome pilasy an’i Devoly’ tsika laha manao ani-zay. Resahin’i Jehovah matetiky amintsika amy Safàny ao hoe tokony hifanenga hadisoa tsika. Mampirisiky antsika ty Kolosianina 3:13 hoe “mahaiza avao ... mifanenga hadisoa tanteraky.” Hifandramby soa amin’olo tsika laha tsy mifantoky amy hadisoany noho ty raha tsy mety ataony. Laha manenga hadisoa koa tsika, le “hiharo raiky avao sady hilongo soa satria fa naharon’ny fanahy masy.” (Efes. 4:3) Hitantsika baka amy zay, fa laha mifanenga hadisoa tsika le hiharo raiky noho hilongo soa.

12. Akory ty hanampean’i Jehovah antsika hahavita hanenga hadisoa?

¹² Marina fa mety ho sarotsy amintsika ty hanenga ty hadisoan’olo nanao raha nampeloky antsika. Fe ho vitantsika ty hanenga hadisoa lafa ampean’ny fanahi-Ndranahary tsika. Lafa baka nampirisiky antsika ty Soratsy Masy mba “hifandramby am-po” noho “hazoto hiasa,” le nampirisiky antsika koa hoe: “Tokony harehitsin’ny fanahy nareo.” Midika raha zay fa afaky manampy antsika hafana fo noho hazoto hanao raha soa ty fanahy masy. Tafilitsy amy zay ty hoe hifandramby am-po noho hanenga hadisoa tanteraky. Zay mahavy antsika mangataky mafy amy Jehovah mba hampeany io.​—Lioka 11:13.

“KA ENGÀ HISY RAHA HAMPISARATSARAKY ANAREO”

13. Ino ty raha mety hampisy fisaratsaraha amy fiangona eo?

¹³ Misy “karazan’olo” baka amy fiavia samby hafa ty amy fiangona eo. (1 Tim. 2:3, 4) Midika raha zay fa tsy hitovy koa ty safidy ataontsika, ohatsy, hoe amy resaky fisìkina noho pozim-bolo, ty fomba ikarakarantsika ty fahasalamantsika, na ty fialam-boly ataontsika. Ka laha tsy mitandrina soa zany tsika amy raha reo, le mety hampisy fisaratsaraha. (Rom. 14:4; 1 Kor. 1:10) Fe soa avao fa “ampianari-Ndranahary hifankatea tsika,” ka mitandrina mba tsy hieritseritsy hoe ty safidy ataontsika ro soa marè mandilatsy ty safidy ataon’olo hafa.​—Fil. 2:3.

14. Ino ty raha mila iezahantsika atao avao, le ino ty antony?

¹⁴ Tsy hampisy fisaratsaraha anivon’ny fiangona eo koa tsika laha miezaky hifampahery noho hifanampy avao. (1 Tes. 5:11) Tato ho ato, le maro tamin’olo fa tsy nitory sasy na nalà tsy ho anisan’ny fiangona rey ro nimpoly. Tokony ho rambesintsika soa rozy! (2 Kor. 2:8) Zao ty nivolanin’ny ranabavy raiky fa tsy nitory tanatin’ny folo tao, lafa nimpoly nivory tamy Efitrano Fanjakà any ndraiky: “Nifalifaly iaby ty olo lafa nahita ahy sady nitanjatanjahin-drozy ty tanako.” (Asan’ny Apostoly 3:19) Tsotra fihetsiky nataon’ny mpiara-manompo azy io, fe nisy vokany taminy. Zao ty niresahiny: “Tsapako hoe nanampy ahy ho falifaly ndraiky Jehovah.” Laha miezaky mampahery ty hafa tsika, le afaky mampiasa antsika Kristy mba hamelombelo ty olo “miasa mafy noho manday enta mavesatsy.”​—Mat. 11:28, 29.

15. Ino koa ty azontsika atao mba hahavy antsika hiharo raiky? (Henteo koa sary io.)

¹⁵ Ino koa ty fomba hafa hanampy antsika hiharo raiky? Ty raha volanintsika. Zao ty resahin’ny Joba 12:11: “Tsy ty sofy va ro mahay ty resaky rentsika, manahaky ty lela mahay tsiron-kany?” Manandra ty sakafo karakarany, ohatsy, ty mpiketriky raiky mahay mba ho azony antoky hoe matsiro sakafo iny, alohan’ny hihinan’olo azy. Manahaky ani-zay koa, fa tokony hodinihintsika soa ty raha hovolanintsika alohan’ny hiresahantsika azy. (Sal. 141:3) Ataontsika azo antoky avao hoe mampahery, mamelombelo, noho “mahasoa ty olo mijanjy azy” ty raha volanintsika.​—Efes. 4:29.

16. Ia ro tena tokony hiezaky hanao resaky mampahery?

¹⁶ Ty lahilahy manambaly noho ty ray aman-dreny ro tena tokony hitandrina mba hampahery ty raha volaniny. (Kol. 3:19, 21; Titosy 2:4) Tokony ho modely koa ty anti-panahy, ka hanao resaky mampahery noho mamelombelo satria mpiarakandro ty aondrin’i Jehovah rozy. (Isa. 32:1, 2; Gal. 6:1) Soa laha tiarovintsika ohabola amy Baiboly ao toy: “Tena soasoa ty safà volany amy fotoa mety!”​—Ohab. 15:23.

TOKONY HO TEA “AMY ATAO NOHO AMY FAHAMARINA KOA” TSIKA

17. Ino ty azontsika atao mba ho azo antoky hoe tena tea an’ny rahalahy noho anabavintsika reo tsika?

¹⁷ Mampirisiky antsika apostoly Jaona hoe ‘tsy tokony ho am-bava na an-dela avao ty fitiavantsika, fa tokony aseho amy atao noho amy fahamarina koa.’ (1 Jaona 3:18) Teantsika laha baka am-pontsika ty fitiavantsika an’ny rahalahy noho anabavintsika reo. Ino ty hanampy antsika hahavita ani-zay? Hahavita ani-zay tsika laha miaraky matetiky amin-drozy, mifandramby marìny amin-drozy noho miezaky ho tea an-drozy marè. Miezaha zany hila fomba hiaraha amy ty hafa, ohatsy, hoe lafa am-pivoria any na amy fanompoa eny. Miezaha koa mba hamangivangy an-drozy. Laha manao ani-reo tsika, le mampiseho hoe “ampianari-Ndranahary hifankatea.” (1 Tes 4:9) Ho tsapantsika amy zay hoe ‘soa sady mahafalifaly vatany lafa miharo petraky noho miharo raiky ty mpirahalahy!’​—Sal. 133:1.