Miezaha Hiambany lafa Misy Raha Tsy Hainao

1. Ino ty fahaiza namean’i Jehovah antsika, le ino ty antony?

TENA miavaky ty fomba namoronan’i Jehovah antsika. Nataony hahay handiniky tsika, hianatsy raha vaovao, noho hahay hampiasa ty fahaizantsika. Fa manino Jehovah ro namoro antsika manahaky ani-zay? Satria teany ho hitantsika ty atao hoe fahaiza a-Ndranahary sady teany hampiasa soa ty saintsika tsika lafa manompo azy.​—Ohab. 2:1-5; Rom. 12:1.

2. a) Ino ty tokony ho haintsika mikasiky antsika? (Joba 37:23, 24) (Henteo koa sary io) b) Manino ro mahasoa antsika ty mieky hoe voafetra avao ty raha haintsika?

² Marina fa niforonin’i Jehovah hana fahafaha hahay raha maro tsika, fe voafetra avao koa ty raha haintsika. (Vakio Joba 37:23, 24.) Diniho moa Joba. Nametraky fanontanea maro taminy Jehovah mba hahatakarany hoe mbo maro ty raha tsy hainy. Nanampy an’i Joba raha zay mba hahatsapa hoe mila miambany noho manova ty fomba fisainany ie. (Joba 42:3-6) Handramby soa koa tsika laha miambany, ka mieky hoe mbo maro ty raha tsy haintsika. Laha tiarovintsika avao raha zay, le hiambany tsika ka matoky hoe hambaran’i Jehovah antsika ty raha tena tokony ho haintsika mba hahafahantsika handramby fanapahan-kevitsy soa.​—Ohab. 2:6.

3. Ino ty raha hodinihintsika amy lahatsoratsy toy ato?

³ Hodinihintsika ato ty raha sisany tsy haintsika noho ty raha sarotsy mety hatrehintsika. Hodinihintsika koa hoe manino ro misy mahasoa azy ty hoe misy raha sisany tsy haintsika. Hanampy antsika ty fandiniha an’ny hevitsy reo mba hatòky hoe ambaran’i Jehovah, azy “fara tampony amy fahaiza” iny antsika ze raha tena tokony ho haintsika.​—Joba 37:16.

TSY HAINTSIKA HOE MBIA VO HO AVY TY FARANY

4. Laha hentea ty Matio 24:36, ino ty raha tsy haintsika?

⁴ Vakio Matio 24:36. Tsy haintsika hoe mbia vo ho avy ty faran’ny tontolo toy. Ndre Jesosy aza tsy nahay ty “andro noho lera”a hiavian’ny raha zay tamin’ie tan-tany etoy. Nivola tamy apostoliny rey ie tafara atoy hoe Jehovah raiky avao ro mana fahefà amy raha zay, na mana zo hahay ty fotoa hisehoani-zay. (Asan’ny Apostoly 1:6, 7) Fa hain’i Jehovah hoe mbia ty fotoa handravany an’ny tontolo toy, fe tsy haintsika hoe mbia ty hanaovany ani-zay.

5. Tsy haintsika hoe mbia ty hiavin’ny farany. Ino ty mety ho vokatsini-zay amintsika?

⁵ Laha hentea ty raha nivolanin’i Jesosy, le tsy haintsika hoe mbia ty hiavian’ny farany. Vokatsini-zay, le mety tsy hanam-pahareta na ho kivy tsika, sirtò laha fa ela ty nandinasantsika ty andron’i Jehovah. Mety ho sarotsy amintsika koa ty hiaritsy kizakizaky ataon’olo na ty fianakaviantsika antsika. (2 Pet. 3:3, 4) Azo inoa fa laha nihaintsika ty andro hiavian’ny farany, le mety ho nanam-pahareta noho nahavita niaritsy kizakizaky ataon’olo antsika avao tsika.

6. Manino ro mahasoa antsika ty tsy fahaizaintsika ty fotoa hiavian’ny farany?

⁶ Laha ty marina, tsy volanin’i Jehovah amintsika ty fotoa hiavian’ny farany satria teany laha ty fitiavantsika azy noho ty fatokisantsika azy ro antony anompoantsika azy. Ta hanompo an’i Jehovah mandrakizay tsika, fa tsy hoe zisiky hiavian’ny farany avao. Tsy tokony hifantoky marè amy fotoa hiavian’ny andron’i Jehovah tsika, fa tokony hifantoky amy ty raha soa hiseho amy fotoa io. Hanampy antsika hifandramby marìny amy Jehovah raha zay, hatòky azy, noho hanao ze azontsika atao mba hampifalea azy avao.​—2 Pet. 3:11, 12.

7. Ino ty raha haintsika?

⁷ Soa laha ty raha haintsika ro ifantohantsika. Haintsika hoe nanomboky tamy 1914 ty andro farany. Tsy hoe nanome faminania mikasiky an’ny tao io avao Jehovah, fa nambarany antsika amy an-tsipiriany koa hoe ino ty raha hiseho amy tany toy iaby amy fotoa io. Lafa nihitantsika hoe tanteraky faminania rey, le resy lahatsy tsika hoe fa “marìny andro bevatan’i Jehovah iny.” (Zef. 1:14) Haintsika koa ty asa tean’i Jehovah hataontsika. Tsy ino zay fa ty hiresaky amin’olo farani-ze maro mikasiky an’ny “vaovao soan’ny Fanjakà iny.” (Mat. 24:14) Fa torỳ amy tany 240 noho amy fivolana 1 000 mahery hafatsy io henanizao. Tsy mila mahay ty “andro noho lera” hiavian’ny farany tsika, laha ta hafana fo hitory an’ny hafatsy io.

TSY HAINTSIKA TY RAHA ATAON’I JEHOVAH

8. Ino ty tean’ny hovolany amy hoe “asa atao-Ndranahary marina iny”? (Mpitoriteny 11:5)

⁸ Tsy haintsika mihintsy “ty asa atao-Ndranahary marina” iny. (Vakio Mpitoriteny 11:5.) Mampiseho ty raha ataon’i Jehovah, na ty raha engàny hiseho mba hahatanteraky ty sitrapony ty hoe asa atao-Ndranahary. Tsy haintsika hoe manino ty raha raiky ro engàn’i Jehovah hiseho, na hoe ino ty hataony mba hanampea antsika. (Sal. 37:5) Ty mpahay siansy zao mbo tsy tena mahay hoe manao akory marina ty fomba itomboan’ajà raiky mbo an-tron-dreniny ao. Manahaky ani-zay koa, fa tsy tena haintsika ty raha ataon’i Jehovah.

9. Ino ty raha sarotsy mety hatrehintsika lafa tsy haintsika ty raha hataon’i Jehovah?

⁹ Lafa tsy haintsika hoe akory ty anampean’i Jehovah antsika, le mety hisalasala handramby fanapahan-kevitsy sisany tsika. Mety hisalasala tsika ka tsy hahafoy tena hampitombo ty fanompoantsika, ohatsy hoe manatsotra fiaina, na mifindra amy faritany mila mpitory maro any. Na mety hieritseritsy tsika hoe tsy ankasitraha-Ndranahary satria tsy mahatratsy ty raha kendrentsika amy fanompoa, na tsy mahita vokatsy amy fanompoa ndre fa miezaky mafy, na miatriky raha sarotsy amy tetikasan’ny fandamina ndre fa miasa mafy aza tsika. Vokatsini-zay, le mety hahatsapa tsika hoe tsy manampy antsika Jehovah.

10. Ino ty toetsy soa lasa ananantsika lafa tsy haintsika ty raha hataon’i Jehovah?

¹⁰ Tsy tena haintsika ty raha hataon’i Jehovah, ka tokony hahavy antsika hiambany raha zay. Lasa haintsika hoe tena anabo mandilatsy ty fomba fihevitsintsika ty fomba fihevitsin’i Jehovah noho ty fomba fanaovany raha. (Isa. 55:8, 9) Mianatsy hatòky marè an’i Jehovah noho hiantehitsy aminy koa tsika. Rariny zany laha midera an’i Jehovah tsika lafa mahita vokatsy soa amy fanompoa, na lafa mandeha soa ty tetikasan’ny fandamina ataontsika. (Sal. 127:1; 1 Kor. 3:7) Fe laha tsy mifanaraky amy ty nieritseretantsika azy ty raha miseho, le mila tiarovintsika hoe mahay ty kila raha iaby Jehovah. (Isa. 26:12) Mila manao ty anjarantsika avao tsika, le matoky hoe hanao ty anjarany koa Jehovah. Matoky tsika fa hanome antsika ty tari-dala ilàntsika ie, ndre tsy amy fomba mahagaga manahaky ty taloha aza ty anaovany ani-zay.​—Asan’ny Apostoly 16:6-10.

11. Ino ty raha bevata haintsika?

¹¹ Ka halino fa be fitiava, manao ty rariny, noho hendry Jehovah. Haintsika fa tena lafovily aminy ty raha ataontsika ho azy noho ty mpiara-manompo amintsika. Haintsika koa fa tozoro mamaly soa ty olo tsy mivaliky aminy avao Jehovah.​—Heb. 11:6.

TSY HAINTSIKA TY RAHA HISEHO HAMARAY

12. Laha hentea ty Jakoba 4:13, 14, ino ty raha tsy haintsika?

¹² Vakio Jakoba 4:13, 14. Tsy haintsika hoe ino ty raha hiseho amintsika hamaray. Mety ho “tra-doza amy fotoa tsy ampoizy” tsika amy tontolo toy eto. (Mpito. 9:11) Vokatsini-zay, le tsy haintsika hoe ho tanteraky va ty raha eritseretintsika hatao sa tsy ho tanteraky, na tsy haintsika mihintsy ndre mbo ho velo tsika na ho maty.

13. Mety hanao akory tsika lafa tsy haintsika ty raha hiseho amy hoavy?

¹³ Lafa tsy haintsika hoe ino ty raha hiseho amintsika amy hoavy, le mety ho sarotsy amintsika ty hiaritsy. Ino ty antony? Satria laha miasa loha marè mikasiky ty raha hiseho amy hoavy tsika, le mety tsy ho falifaly. Mety halahelo noho diso fanantenà tsika lafa tratsin’ny loza tampoky, na ty raha tsy ampoizy. Mety ho kivy noho diso fanantenà koa tsika laha tsy tanteraky ty raha nieritseretintsika hatao.​—Ohab. 13:12.

14. Mianky amy ino ty hahasambatsy antsika? (Henteo koa sary reo.)

¹⁴ Laha miaritsy raha sarotsy tsika, le afaky manaporofo hoe ndre ino ndre ino raha miseho, le manompo an’ny Babantsika an-danitsy any iny avao tsika satria tea azy. Asehon’ny tantara amy Baiboly ao, fa tsy tokony hitamà tsika hoe hiaro antsika amy raha sarotsy iaby Jehovah sady tsy ie mihintsy ro mandahatsy ty raha miseho amy fiainantsika. Hainy fa tsy mianky amy ty raha tsy haintsika amy fiainantsika ty hahasambatsy antsika. Mifanohitsy amy zay, fa afaky ho sambatsy tsika laha mila ty tari-dalany noho manoriky ty safàny. (Jer. 10:23) Laha miantehitsy aminy tsika lafa handramby fanapahan-kevitsy, le sahala mivola hoe: “Laha sitrapon’i Jehovah ka velo zahay, le hanao ani-zao na manahaky ani-zao.”​—Jak. 4:15.

15. Ino ty raha haintsika mikasiky ty hoavy?

¹⁵ Marina fa tsy haintsika ty raha hiseho hamaray, fe haintsika hoe mampitamà fiaina mandrakizay antsika Jehovah, na an-danitsy zay na an-tany etoy. Haintsika fa tsy mavandy ie sady tsy misy raha misaka azy tsy hanatanteraky ty raha iaby ampitamaniny. (Titosy 1:2) Ie raiky avao ro afaky “manambara ty raha hiseho afara any, noho manambara mialoha ty raha mbo tsy natao.” Marina vatany raha zay laha hentea ty raha niseho taloha tany, sady mbo zay koa ty raha hiseho amy hoavy. (Isa. 46:10) Haintsika soa fa tsy misy raha mahasaka an’i Jehovah tsy ho tea antsika. (Rom. 8:35-39) Hameany fahendrea, fampahereza, noho hery hahafahantsika hiaritsy tsika, ndre ino ndre ino ty raha miseho amy fiainantsika. Afaky matoky tsika fa hanampy noho hitahy antsika Jehovah.​—Jer. 17:7, 8.

TSY TENA HO TAKATSINTSIKA HOE MAHAY SOA ANTSIKA JEHOVAH

16. Ino ty raha hain’i Jehovah mikasiky antsika, le ino ty tsapanao baka amy zay? (Salamo 139:1-6)

¹⁶ Vakio Salamo 139:1-6. Mahay soa ty mikasiky antsika Mpamoro antsika iny. Hainy ty raha eritseretintsika noho ty raha tsapantsika. Hainy ty raha volanintsika, ty raha an-tsaintsika noho ty raha am-pontsika any. Hainy koa ty raha iaby ataontsika noho ty antony anaovantsika an’ny raha iny. Nivola Davida Mpanjaka hoe tsy lavitsy antsika Jehovah sady tozoro parè hanampy antsika avao. Ino ty tsapanao lafa hainao hoe mahay soa anao azy Ndranahary farani-ze mahery, noho Faran’ny Anabo sady Mpamoro ty lanitsy noho ty tany iny? Hoy Davida: “Tsy takatsin’ny saiko ty fahaizanao. Anabo marè raha zay ka tsy takatsiko.”​—Sal. 139:6, f.a.p.

17. Manino ro mety ho sarotsy amintsika ty hieky hoe mahay soa antsika Jehovah?

¹⁷ Mety ho sarotsy amintsika ty hahita hoe Baba be fitiava tena mikarakara antsika Jehovah. Mety ho antoni-zay ty raha niainantsika, ty kolontsaintsika, na ty raha ninoantsika taloha tany. Na mety hieritseritsy koa tsika hoe tena raty ty raha nataontsika taloha tany, ka tsy hidary antsika mihintsy Jehovah sady hiala lavitsy antsika. Nisy fotoa Davida nahatsapa ani-zay mihintsy. (Sal. 38:18, 21) Na mety hieritseritsy koa ty olo raiky miezaky hanova ty fomba fiainany noho miezaky manaraky ty fitsipiki-Ndranahary hoe: ‘Laha tena mahay ahy Ndranahary, manino aho ro mbo ampirisihiny hiala amy fomba fiaina fa ara-dalàna amiko?’

18. Manino ro handramby soa tsika laha mieky hoe Jehovah ro tena mahay soa antsika tany ty vatantsika? (Henteo koa sary reo.)

¹⁸ Afaky matoky tsika hoe Jehovah ro tena mahay soa antsika tany ty vatantsika. Ndre hitany aza ty handrantsika sady hainy ty antony mahavy antsika hahatsapa noho hanao raha raiky, le mbo tea antsika avao ie. (Rom. 7:15) Lafa haintsika hoe hitan’i Jehovah ty toetsy soa ananantsika, le vomaiky tsika mazoto manompo azy sady tsy ta hivaliky aminy mihintsy.

19. Ino ty raha haintsika soa mikasiky an’i Jehovah?

¹⁹ Haintsika hoe fitiava Jehovah, sady marina vatany raha zay. (1 Jaona 4:8) Haintsika fa lafa misy raha ampanaoviny antsika, na andrarany antsika, le porofon’ny fitiavany antsika zay, sady teany hana fiaina soa tsika. Haintsika fa tean’i Jehovah hahazo fiaina mandrakizay tsika. Nanome ty vilim-panavota ie mba hahatanteraky ani-zay. Manome toky antsika ty vilim-panavota hoe afaky manompo an’i Jehovah araky ty itiavany azy tsika, ndre manao fahadisoa aza. (Rom. 7:24, 25) Haintsika koa fa “bevata mandilatsy ty fontsika Ndranahary, sady mahay ty kila raha iaby.” (1 Jaona 3:19, 20) Hitan’i Jehovah ty raha iaby mikasiky antsika, sady matoky ie fa ho vitantsika ty hanao ty sitrapony.

20. Ino ty hanampy antsika tsy hiasa loha marè amy ty raha tsy haintsika?

²⁰ Ambaran’i Jehovah antsika ze fanazavà tena ilàntsika. Tsy tokony hiasa loha marè amy raha tsy haintsika zany tsika, fa tokony hifantoky amy ze tena vatan-draha. Laha manao ani-zay tsika, le asehontsika fa matoky tanteraky an’i Jehovah, “Azy fara tampony amy fahaiza iny” tsika. (Joba 36:4) Marina fa misy raha tsy haintsika henanizao. Fe haintsika fa hampianatsy antsika raha vaovao avao Jehovah amy hoavy, sady ho falifaly tsika satria hianatsy raha mahatseriky mikasiky an’ny Ndranaharintsika iny avao mandrakizay.​—Mpito. 3:11.