Ampeo Hanompo an’i Jehovah ty Olo Ampianarinao Baiboly

1-2. a) Manino ty mpianatsy Baiboly sisany ro misalasala hanaraky ty fahamarina? b) Ino ty hodinihintsika ato?

MISALASALA ho lasa Vavolombelon’i Jehovah va iha? Mety matahotsy vasa iha tsy no hanohitsy anao ty mpiaraky miasa aminao, ty namanao, na ty fianakavianao. Na mety hieritseritsy koa iha hoe tsy ho vitanao mihintsy ty hanoriky ty fitsipiki-Ndranahary. Laha zay ty tsapanao, le azo antoky fa hainao ty raha tsapan’ny mpianatsy Baiboly sisany noho ty antony mahavy an-drozy misalasala hanoriky ty fahamarina.

² Tsapan’i Jesosy hoe mety hisaka ty olo raiky tsy handroso ara-panahy ty tahotsy. (Mat. 13:20-22) Fe niezaky avao ie nanampy an’olo nisalasala hanori-dia azy rey. Nampeany rozy 1) mba hahay ty antony misaka an-drozy tsy handroso, 2) mba ho tea marè an’i Jehovah, 3) mba hanao amy pilasy voalohany ty fanompoa azy, le 4) mba hahay hiatriky raha sarotsy. Akory ty anorihantsika ty raha nivolanin’i Jesosy tamy mpianatsiny rey, lafa tsika mampiasa ty boky hoe Ho Azonao Tavy ty Fiaina Zisiky Farany! mba hanampea ty mpianatsy Baiboly tsy hisalasala hanoriky ty fahamarina?

AMPEO MPIANATSINAO INY MBA HAHAY TY ANTONY MISAKA AZY TSY HANDROSO

3. Ino ty mety nisaka an’i Nikodemosy tsy hanori-dia an’i Jesosy?

³ Nisarotsy tamy Nikodemosy ty hanori-dia an’i Jesosy satria nanam-pahefà tamy Jiosy teo ie. Vo enim-bola teo ho eo ty nanombohan’i Jesosy ty fanompoany, le fa nihain’i Nikodemosy hoe nisolotena a-Ndranahary ie. (Jaona 3:1, 2) Fe nivony ie lafa namonjy an’i Jesosy, “satria natahotsy an’ny Jiosy rey.” (Jaona 7:13; 12:42) Mety nieritseritsy vasa ie hoe ho maro ty raha hafoiny lafa lasa mpianatsin’i Jesosy ie.a

4. Akory ty nanampean’i Jesosy an’i Nikodemosy mba hahay ty raha tea-Ndranahary hataony?

⁴ Nahay ty Lalànan’i Mosesy, Nikodemosy, fe nila fanampea ie mba hahay hoe ino ty tean’i Jehovah hataony. Akory ty nanampean’i Jesosy azy? Nahafoy ty fotoany Jesosy, ka nifampiresaky tamy Nikodemosy ndre haly ty andro. Nivolanin’i Jesosy mazava soa tamy Nikodemosy ty raha tsy maintsy ataony mba hahavy azy ho lasa mpianatsiny: tsy maintsy mibebaky ie, tsy maintsy atao batisa anaty rano, noho mampiseho finoa ty Anaki-Ndranahary.​—Jaona 3:5, 14-21.

5. Akory ty azontsika anampea ty mpianatsintsika mba hahay ty raha misaka azy tsy handroso?

⁵ Ndre mahay soa ty Soratsy Masy aza ty mpianatsy Baiboly raiky, le mety mila ampea ie mba hahaizany ty raha misaka azy tsy handroso. Mety hisaka azy tsy handroso ara-panahy ty asany na ty fanoheran’ny fianakaviany. Miezaha zany hahafoy fotoa manahaky an’i Jesosy, mba hanampea an’ny mpianatsinao iny. Azonao atao ty manasa azy hiaraky hino kafè na hitsangatsanga miaraky aminao. Laha manao ani-zay iha, le mety tsy hisalasala hiresaky aminao ty raha sarotsy mahazo azy ie. Ampirisiho ie hanao ze fanovà tokony hataony, tsy hoe mba hampifalea anao, fa mba hampisehoany hoe teany Jehovah.

6. Akory ty azonao anampea ty mpianatsinao mba hana herim-po hanaraky ty fahamarina? (1 Korintianina 16:13)

⁶ Hahavita hanoriky ty raha ianarany ty mpianatsy Baiboly raiky, laha matoky ie hoe hanampy azy hanoriky ty fitsipikin’ny Baiboly Jehovah. (Vakio 1 Korintianina 16:13.) Azo ohary amy asan’ny mpampianatsy an-dakilasy any ty andraikitsinao. Mpampianatsy manao akory zao ro tena niteanao tamin’iha mbo nianatsy? Azo inoa fa ze mpampianatsy nanam-pahareta nanampy anao mba hahay ty raha ianaranao. Manahaky ani-zay koa ty mpampianatsy Baiboly mahay. Tsy hoe mampianatsy ty raha takì-Ndranahary avao ie, fa manome toky an’ny mpianatsy iny koa hoe ho vitany ty hanova ty fomba fiainany satria hanampy azy Jehovah. Akory ty anaovanao ani-zay?

AMPEO MPIANATSINAO INY MBA HO TEA MARÈ AN’I JEHOVAH

7. Akory ty nanampean’i Jesosy ty olo nijanjy azy mba hampitombo ty fitiavan-drozy an’i Jehovah?

⁷ Hain’i Jesosy fa hahavita hanoriky ty raha nianaran-drozy mpianatsiny rey laha tea an’i Jehovah. Matetiky ie nampianatsy raha hanampy an’ny mpianatsiny rey hampitombo ty fitiavan-drozy an’ny Baban-drozy an-danitsy any iny. Nampitovizin’i Jesosy tamy lahilahy raiky manome raha soa ty anany, ohatsy, Jehovah. (Mat. 7:9-11) Mety tsy nana baba be fitiava manahaky ani-zay ty sisany amin’olo nijanjy an’i Jesosy rey. Eritsereto moa ty raha nitsapan-drozy, lafa naharè an’ny fanoharan’i Jesosy mikasiky an’ny baba be fitiava nitsena ty anany nahery loha iny! Hitan-drozy baka amy fanohara io hoe miferinay ty anany an-tany etoy Jehovah.​—Lioka 15:20-24.

8. Akory ty azonao anampea ty mpianatsinao mba hampitombo ty fitiavan-drozy an’i Jehovah?

⁸ Hanampy ty mpianatsinao ho tea marè an’i Jehovah koa iha, laha resahinao matetiky aminy ty toetsy soan’i Jehovah. Saky mianatsy nareo, le ampeo ie mba hahita hoe ino ty ifandrambesan’ny fianara iny amy fitiavan’i Jehovah antsika. Laha mianatsy mikasiky vilim-panavota nareo, le ampeo ie mba hahatakatsy hoe tea azy Jehovah matoa nanome an’ny Anakilahiny iny. (Rom. 5:8; 1 Jaona 4:10) Azo inoa fa ho tea marè an’i Jehovah ty mpianatsy raiky lafa tsapany hoe tena tea azy manoka Jehovah.​—Gal. 2:20.

9. Ino ty nanampy an’i Michael hiova?

⁹ Diniho moa Michael baka a Indonezỳ any. Nitezà tamy fahamarina ie, fe mbo tsy vita batisa. Nandeha an-dafy any ie lafa ni-18 tao, le nanao sofera lafa tany. Nimpoly Indonezỳ any ie tafara atoy le nanambaly, fe nengàny ty valiny noho ty anany satria nandeha nimpoly niasa tan-dafy any ie. Nianatsy Baiboly valiny io noho ty anak’ampelany tamy zay, le nandroso. Lafa nimaty renin’i Michael, le noly ie mba hikarakara an’ny babany sady naneky hianatsy Baiboly. Niavy tamy fianara 27 amy boky Ho Azonao Tavy ty Fiaina Zisiky Farany! iny ty fianaran-drozy. Tena nidosiky ty fon’i Michael ty hevitsy amy hoe “Diniho Laliky” eo. Nilatsaky ty ranomasony lafa nametsivetsy hoe manao akory ty fihetseham-pon’i Jehovah lafa nijaly anakilahiny iny. Lasa nankasitraky ty vilim-panavota ie sady tapa-kevitsy hiova noho hatao batisa.

AMPEO MPIANATSY INY MBA HANAO AMY PILASY VOALOHANY TY FANOMPOA AN’I JEHOVAH

10. Ino ty nataon’i Jesosy mba hanampea an’ny mpianatsiny rey hanao fanovà mba hanompo an’i Jehovah? (Lioka 5:5-11) (Henteo koa sary io.)

¹⁰ Tsiela avao, le nieky mpianatsy voalohandohany rey hoe Jesosy ro Mesia nampitamany. Fe mbo nampeany avao rozy mba hanao amy pilasy voalohany ty asa fitoria. Fa mpianatsin’i Jesosy fa elaela Petera noho Andrea tamy rozy nasàn’i Jesosy hanori-dia azy amy fotoa iaby. (Mat. 4:18, 19) Mpanarato rozy sady atao raha mpiaraky miasa amy Jakoba noho Jaona. Tena nandeha soa ty asan-drozy. (Marka 1:16-20) Azo antoky fa nila hevitsy hameloma ty fianakaviany Petera noho Andrea lafa ‘nengàn-drozy ty haraton-drozy,” mba ho afaky hanori-dia an’i Jesosy rozy. Manino rozy ro parè hamoy ty asan-drozy? Miresaky ty bokin’i Lioka hoe nanao fahagagà Jesosy mba hahavy an-drozy hatòky hoe mahavita manome ze ilàn-drozy Jehovah.​—Vakio Lioka 5:5-11.

11. Akory ty azontsika ampiasà ty raha niainantsika mba hanatanjaha ty finoan’ny mpianatsy Baiboly?

¹¹ Tsy afaky manao fahagagà manahaky an’i Jesosy tsika, fe azontsika resahy amin’olo ampianarintsika iny hoe akory ty anohanan’i Jehovah ty olo manao amy pilasy voalohany ty fanompoa azy. Tiaronao va, ohatsy, hoe akory ty nanampean’i Jehovah anao tamy iha vo nanomboky nivory? Mety niresaky tamy mpampiasa anao vasa iha, le nangataky ho rava aloha mba hamonjeanao fivoria. Lafa mitantara amy mpianatsinao ty raha niainanao iha, le hazavao aminy hoe manino ro nanatanjaky ty finoanao ty nahita fa nanoha anao Jehovah lafa nataonao amy pilasy voalohany ty fanompoa azy.

12. a) Manino ro soa ty manovaova nama lafa mampianatsy? b) Akory ty azonao ampiasà an’ny video rey mba hahavy an’ny fianara iny hisy vokany? Manomeza ohatsy.

¹² Handramby soa koa ty mpianatsinao lafa maharè ty raha nataon’ny Kristiana sisany mba hahafahan-drozy manao amy pilasy voalohany ty fanompoa an’i Jehovah. Ovaovao zany ty olo miaraky aminao lafa mampianatsy iha. Angataho rozy mba hitantara hoe akory ty nahitan-drozy fahamarina, le ino ty nataon-drozy mba hanaova amy pilasy voalohany ty fanompoa an’i Jehovah. Lafa mianatsy amy boky Ho Azonao Tavy ty Fiaina Zisiky Farany! iny koa nareo, le manokàna fotoa mba hanentea an’ny video amy fizarà hoe “Diniho laliky” noho hoe “Diniho koa Retoa.” Aboaho soa, ohatsy, ty torolala amy video hoe Hanome Ze Raha Ilàntsika Jehovah, lafa mianatsy ty fianara 37 nareo.

AMPEO MPIANATSY INY MBA HAHAY HIATRIKY RAHA SAROTSY

13. Akory ty nanampean’i Jesosy ty mpianatsiny mba ho parè hiatriky fanenjeha?

¹³ Matetiky Jesosy niresaky tamy mpanori-dia azy hoe hisy hanenjiky rozy, le anisan’olo hanenjiky an-drozy ty fianakavian-drozy. (Mat. 5:11; 10:22, 36) Lafa narìny ho tampitsy ty fanompoan’i Jesosy, le nampitandrina ty mpiantsiny ie hoe mety hovonoa rozy. (Mat. 24:9; Jaona 15:20; 16:2) Nampirisihiny koa rozy mba hiamby soa lafa mandeha manompo. Nanoro hevitsy an-drozy, ohatsy, ie mba tsy hialy hevitsy amin’olo manohitsy ty raha inoan-drozy, noho hiamby soa amy ty raha volanin-drozy noho ataon-drozy.

14. Akory ty anampeantsika ty mpianatsy Baiboly mba ho parè hiatriky fanenjeha? (2 Timoty 3:12)

¹⁴ Akory ty azonao atao mba hanampea ty mpianatsinao ho parè hiatriky fanenjeha? Resaho aminy ty raha mety hovolanin’ny mpiaraky miasa aminy, ty namany noho ty longony. (Vakio 2 Timoty 3:12.) Mety ho kizahin’ny mpiaraky miasa aminy mpianatsy iny satria niova. Mety hisy hikinokino ty raha inoany amy Baiboly ao, le mety ho fianakaviany mihintsy ro hanao ani-zay. Fe laha ampiomaninao mialoha mpianatsinao iny mba hiatriky fanenjeha, le ho parè ie lafa tena miseho raha zay.

15. Laha enjehin’ny fianakaviany ty mpianatsy Baiboly raiky, ino ty raha mety hanampy azy?

¹⁵ Laha misy manenjiky an’ny mpianatsinao iny, ohatsy, ty fianakaviany, le ampirisiho ie mba hieritseritsy ty antony mety mampeloky an-drozy. Mety mieritseritsy ty longony hoe voafitaky ie, na mety mieritseritsy rozy hoe vandy ty raha ampianarin’ny Vavolombelon’i Jehovah. Nisy fotoa aza ndre ty fianakavian’i Jesosy nanohitsy azy. (Marka 3: 21; Jaona 7:5) Ampianaro ty mpianatsinao hoe ilà ty manam-pahareta noho soa fanahy lafa miresaky amin’olo, anisani-zay ty longony.

16. Akory ty azontsika anampea ty mpianatsy Baiboly mba hahay handanjalanja lafa miresaky ty raha inoany?

¹⁶ Ndre kinto amy fahamarina aza ty longon’ny mpianatsy iny, le tsy soa laha manazava raha maro amin-drozy indraiky mandeha ie. Ankoatsini-zay, mety fa ho entsaky resaky koa rozy, ka tsy hahefa hiresaky aminy sasy amy manaraky. Ka lafa miresaky ty raha inoany zany ty mpianatsinao, le ampirisiho ie mba hanao ze hahavy ty fianakaviany ho parè hiresaky aminy ndraiky amy manaraky. (Kol. 4:6) Afaky manasa ty fianakaviany, ohatsy, ie mba hilitsy amy jw.org ao. Hanampy an-drozy hahay raha maro mikasiky ty Vavolombelon’i Jehovah raha zay, amy ze fotoa hanenteany azy.

17. Akory ty azonao ampiofana ty mpianatsy Baiboly mba hahay hamaly fanontanean’olo mikasiky ty Vavolombelon’i Jehovah? (Henteo koa sary io.)

¹⁷ Afaky mampiasa ty lahatsoratsy hoe “Fanontanea Fapetrakin’olo Mikasiky ty Vavolombelo Jehovah” amy jw.org ao iha, mba hanampea an’ny mpianatsinao iny hanoma valin-teny tsotra mikasiky ty fanontanea mety hapetrakin’ny longony na ty mpiaraky miasa aminy. (2 Tim. 2:24, 25) Saky ho tampitsy ty fianara kiraidraiky, le ka halino ty mampiasa ty fizarà hoe “Mieritseritsy ty Olo Sisany Hoe” amy boky Ho Azonao Tavy ty Fiaina Zisiky Farany! iny. Ampirisiho mpianatsinao iny mba hiresaky ty valin-teniny manoka. Ka misalasala manome torohevitsy azy laha misy raha azo hasoavy. Laha manao ani-reo iha, le hanampy an’ny mpianatsinao iny tsy hatahotsy hiaro ty finoany.

18. Akory ty azonao ampirisiha ty mpianatsinao ho lasa mpitory? (Matio 10:27)

¹⁸ Nampirisiky ty mpianatsiny Jesosy mba hitory ty vaovao soa amin’olo. (Vakio Matio 10:27.) Laha manomboky mitory miaraky amy fiangona ty mpianatsy raiky, le hahatsapa ty fanampean’i Jehovah sady vomaiky hatòky azy. Akory ty azonao anampea ty mpianatsinao mba ho lasa mpitory? Lafa misy fampandrenesa amy fiangona eo hoe hisy ezaky manoka, le ampirisiho ie mba handiniky hoe ino ty azony atao mba hahafeno fepetra ho lasa mpitory. Volano aminy hoe tena mora ty mitory lafa misy ezaky manoka. Mety hahasoa azy koa fampiofana amy fivoria andavanandro rey. Lafa miezaky mandramby anjara amy raha rey ie, le hahay hanazava soa ty raha inoany.

ASEHÒ HOE ATOKISANAO MPIANATSINAO INY

19. Akory ty nampisehoan’i Jesosy hoe natoky ty mpianatsiny ie, le akory ty azontsika anahafa azy?

¹⁹ Nivola tamy mpianatsiny rey Jesosy talohan’ny niakarany tan-danitsy any hoe ho tafaraky ndraiky rozy ndraiky andro any. Fe tsy azon-drozy hoe ty fiakaran-drozy ho an-danitsy any ty tean’i Jesosy hovolany. Ndre tsy niazon’ny mpianatsiny rey safàny iny, le natoky Jesosy hoe tsy hivaliky aminy rozy. (Jaona 14:1-5, 8) Hain’i Jesosy fa elaela vo ho azon-drozy ty raha sisany nampianariny, anisani-zay ty hoe ho an-danitsy any rozy. (Jaona 16:12) Afaky matoky koa tsika hoe maniry ta hampifaly an’i Jehovah ty olo ampianarintsika.

20. Akory ty nampisehoan’ny ranabavy raiky a Malawi any hoe natoky ty mpianatsiny ie?

²⁰ Mila matoky avao tsika hoe maniry hanao raha soa ty olo ampianarintsika. Diniho ty raha niseho tamy Chifundo, ranabavy a Malawi any. Nampianatsy Baiboly an’ny somonjara mana anara Alinafe, mivavaky amy Katolika zay ie. Lafa vita ty fianara 14 amy boky Ho Azonao Tavy ty Fiaina Zisiky Farany! iny, le nanontaneany mpianatsiny iny ie hoe akory ty hevitsiny mikasiky fampiasà sary lafa mivavaky. Neloky marè Alinafe ka namaly hoe: “Safidiko manoka zay!” Nieritseritsy amy zay Chifundo hoe mety fa tsy hianatsy Baiboly sasy Alinafe. Fe nanam-pahareta ie, le mbo nampianatsy azy avao sady nitamà hoe ho azony avao raha zay lafa mandeha ty fotoa. Vola vitsivitsy tafara atoy, le napetrakin’i Chifundo amy mpianatsiny iny fanontanea amy fianara 34 ao iny hoe: “Ino ty soa niazonao lafa nianatsy mikasiky an’i Jehovah noho ty raha hafa amy Baiboly ao iha?” Zao ty nitantaranin’i Chifundo: “Nivola raha soa maro Alinafe, anisani-zay ty hoe tsy mandramby anjara amy raha volanin’ny Baiboly hoe raty ty Vavolombelon’i Jehovah.” Tsiela tafarani-zay, le tsy nampiasa sary sasy Alinafe sady nahafeno fepetra hatao batisa.

21. Ino iaby ty azontsika atao mba hahavy an’ny mpianatsy iny haniry hijano amy fahamarina ao avao?

²¹ Marina fa Jehovah ro “mampitombo,” fe mana andraikitsy koa tsika hanampy ty mpianatsy Baiboly handroso. (1 Kor. 3:7) Tsy ampy avao ty hoe mampianatsy azy ty raha tea-Ndranahary hataony, fa ampeantsika koa ie mba hampitombo ty fitiavany an’i Jehovah. Ampirisihintsika koa ie mba hampiseho ty fitiavany azy, ka hanao azy amy pilasy voalohany. Ampianarintsika hiantehitsy amy Jehovah koa ie lafa miatriky raha sarotsy. Laha asehontsika hoe matoky an’ny mpianatsy iny tsika, le vomaiky ie ho resy lahatsy hanoriky ty fitsipikin’i Jehovah sady hijano amy fahamarina ao avao.