Manino ty Olo ro tsy Mahavita Mampisy ty Filamina?​—Ino ty Volanin’ny Baiboly?

Tsy nahavita nanday filamina an-tany etoy mihintsy ty mpitondra noho ty fikambana iraisam-pirenena. Mbo mandilatsy ty raha niseho tamy Aly Bevata II ty koronta amy tany toy iaby henanizao. Olo fa ho roe tapitrisa, zany hoe fa presky ty ampahefan’ny olo an-tany etoy, ro mipetraky amy tany misy aly rey any.

Fa manino ty olombelo ro tsy mahavita mampisy filamina? Ino ty raha volanin’ny Baiboly?

Antony telo mahavy ty olombelo tsy mahavita mampisy filamina

1. 1. Ty toe-tsain’olo mihintsy ro mahavy an-drozy tsy mahavita mampisy filamina ndre miezaky mafy aza. Fa nivola mialoha ty Baiboly hoe ty olo amy androntsika zao ho “tea tena, ho tea drala, hievotsevotsy, hanambony tena, . . . ho mora mivaliky, . . . tsy ho azo ifanaraha, . . . tsy hahatanjaky ty ainy, hasiaky marè, . . . hahery loha, hirengirengy.”​—2 Timoty 3:2-4.

2. 2. Tsy maintsy mila fanampea amy Mpamoro iny, zany hoe Jehovaha Ndranahary, avao tsika zay vo afaky mandamy ty raha manahira antsika. Ndre olo maromaro aza mitambatsy, le tsy hahavita handamy ty raha manahira antsika mihintsy. Zay mahavy ty Baiboly mivola hoe “tsy ahin’olombelo ty lala ombany. Tsy natao handay raiky ty fiainany koa ty olo.”​—Jeremia 10:23.

3. 3. Misy mpanday raty fanahy mifehy an’ny tontolo toy, le ie ro kaihin’ny Baiboly hoe Satana Devoly, “azy mamitaky ty tany iaby misy olo iny.” (Apokalypsy 12:9) Ka laha mbo “ambany fahefan’ny azy raty iny eo” zao tontolo zao, le hisy avao ty aly noho ty koronta.​—1 Jaona 5:19.

Ia avao ro afaky mampisy ty filamina?

Mivola ty Baiboly fa Ndranahary avao ro hahavita hampisy ty filamina, fa tsy ty olombelo.

• “‘Fa haiko soa ty raha fa nieritseretiko hatao aminareo’, hoy Jehovah. ‘Mieritseritsy hanome anareo fiadana aho fa tsy loza, mba hanananareo ho avy soasoa noho fanantenà.’”​—Jeremia 29:11.

Akory ty hanatanteraha-Ndranahary an’ny fampitamàna io? “Tsy ho ela koa, azy Ndranahary ty fiadana iny le hanorotoro ani-Satana.” (Romanina 16:20) Hampiasa fanjakà raiky an-danitsy any ie mba hampisy filamina an-tany etoy. “Fanjakà-Ndranahary” ty ikaiha an’ny fanjakà io. (Lioka 4:43) Hilongo soa ty olo amy fotoa zay satria hampianarin’ny Jesosy Kristy, azy Mpanjakan’ny Fanjakà io iny.​—Isaia 9:6, 7.

• Laha mila fanazavà misimisy iha, le vakio ty lahatsoratsy hoe “Ino ty Raha Hataon’ny Fanjakà-Ndranahary?”