Tsy Hahatiaro Mangiky Loatsy Iha Laha Ampeanao ty Hafa​—Ino ty Volanin’ny Baiboly?

Maro ty olo mahatiaro mangiky noho tsy mana nama amy tany toy iaby. Mivola ty manam-pahaiza mikasiky fahasalamà sisany fa azo resè raha zay. Fomba raiky azo andresea azy zao ty fiezaha hanampy ty hafa.

• “Lasa misy dikany kokoa ty fiainantsika lafa tsika manampy ty hafa, sady tsy hahatiaro ho raiky na tsy misy midary tsika.”​—U.S. National Institutes of Health.

Miresaky ty fomba sisany azontsika anampea ty hafa ty Baiboly. Hanampy antsika tsy hahatiaro mangiky ty fanoriha an’ny torohevitsy reo.

Ino ty azonao atao?

Miezaha hatariky. Milà fotoa ahafahanao miaraky amy ty hafa mivanta, le zarao amy ty hafa ze raha anananao. Ho lasa mpinama marè nareo amy zay, satria matetiky ty olo lafa anaova raha ho zay, le falifaly sady ta hanao raha koa.

• Torolalan’ny Baiboly: “Miezaha ho zatsy manome, amy zay hamea koa nareo.”​—Lioka 6:38.

Ampiasao ty herinao mba hanampea ty hafa. Lafa mahita olo miatriky raha sarotsy iha, le milà fomba hanampea azy. Azonao atao, ohatsy, ty mijanjy azy soa na manampy azy amy fanaova raha sisany. Hampaivaiva azy raha zay.

• Torolalan’ny Baiboly: “Tea amy fotoa iaby ty tena nama.”​—Ohabolana 17:17

Laha mila fanazavà fanampiny mikasiky ty fomba hanasoavanao ty finamànao amy ty hafa iha, le vakio ty lahatsoratsy hoe “Fianakaviana sy Namana.”