Manao Ampahafolon-karena va ty Vavolombelo Jehovah?

Aha, tsy manao ampahafolon-karena ty Vavolombelo Jehovah. Fanomeza ze foim-po ro anohàna ty asanay. Ino ty atao hoe ampahafolon-karena, le manino ty Vavolombelo Jehovah ro tsy manao raha io?

Anaty ty lalàna namea ty Israelita taloha ty didy mikasiky ampahafolon-karena. Fe volany ty Baiboly mazava fa tsy mahakasiky ty Kristiana lalàna zay, tafilitsy amy zay ty didy hoe “hamory ty ampahafolon-karena.”​—Hebreo 7:​5, 18; Kolosianina 2:​13, 14.

Fa tsy takỳ sasy ty hanaova ampahafolon-karena noho fanatitsy, fe manahaky ty Kristiana voalohany ty Vavolombelo Jehovah, ka manoha ty fanompoany amy raha roe retoa: Amy fanaova asa fitoria noho fampianara tsy mila karamà, amy fanaova fanomeza ze foim-po.

Manaraky ty torolala ty Baiboly ho ahy ty Kristiana toy zahay hoe: “Engao ty kiraidraiky samby hanao araky ty fanapahan-kevitsiny tam-pony ao, tsy aminalahelo na forosè, fa ty mpanome amim-pifalea ro tea Ndranahary.”​—2 Korintianina 9:7.